Gold Investment: આજે સોનામાં રોકાયેલા 50,000 વર્ષ 2036માં કેટલા થશે? સમજો 10 વર્ષના રિટર્નનું પૂરું ગણિત

Gold Investment: ભારતીય પરિવારોમાં સોનું હંમેશાથી માત્ર પહેરવા માટેના ઘરેણાં જ નહીં, પરંતુ એક સૌથી સુરક્ષિત અને ભરોસાપાત્ર રોકાણ તરીકે પસંદ કરવામાં આવે છે. હાલમાં સોનાના ભાવ રેકોર્ડ સ્તરે છે, ત્યારે રોકાણકારોના મનમાં એક મોટો સવાલ છે કે જો આજે સોનામાં 50,000 નું રોકાણ કરવામાં આવે, તો આવનારા 10 વર્ષ પછી એટલે કે 2036 માં તેની વેલ્યુ કેટલી થશે?

વર્લ્ડ ગોલ્ડ કાઉન્સિલના લેટેસ્ટ ડેટા અને જૂના રિટર્નના આધારે ચાલો એકદમ સરળ ભાષામાં સમજીએ કે અલગ-અલગ વાર્ષિક રિટર્ન મુજબ 2036 સુધીમાં તમારું રોકાણ કેટલો નફો આપી શકે છે.

છેલ્લા 10 વર્ષમાં સોનાએ આપ્યું છે બમ્પર રિટર્ન

ભવિષ્યનો અંદાજ લગાવતા પહેલા એ જોવું જરૂરી છે કે છેલ્લા એક દાયકામાં સોનાની કિંમતો કેટલી ઝડપથી વધી છે. વર્ષ 2016 માં 10 ગ્રામ (24 કેરેટ) સોનાનો સરેરાશ ભાવ લગભગ 28,623 હતો. જે હવે 2026 ના ટ્રેન્ડ મુજબ વધીને અંદાજે 1,53,250 પ્રતિ 10 ગ્રામ સુધી પહોંચી ગયો છે.

આજે રોકેલા 50,000 વર્ષ 2036 માં કેટલા થશે?

શેરબજાર કે સોનામાં હંમેશા એકસરખું રિટર્ન મળતું નથી. ભૂતકાળમાં 18.6% રિટર્ન મળ્યું એટલે ભવિષ્યમાં પણ એટલું જ મળશે તે જરૂરી નથી. વર્લ્ડ ગોલ્ડ કાઉન્સિલના GLTER મોડલ મુજબ, 2026 થી 2040 વચ્ચે સોનાનું સરેરાશ અંદાજિત રિટર્ન વાર્ષિક 5.2% રહી શકે છે.

ચાલો અલગ-અલગ અંદાજ મુજબ 2036 ની વેલ્યુ સમજીએ:

જો વાર્ષિક 5.2% રિટર્ન મળે (WGC ના અંદાજ મુજબ): તો 50,000 ના 2036 માં અંદાજે 83,000 થી વધુ થશે.

જો વાર્ષિક 10% રિટર્ન મળે (સામાન્ય અંદાજ): તો આ રકમ વધીને અંદાજે 1,29,000 આસપાસ થઈ શકે છે.

જો વાર્ષિક 18.6% રિટર્ન જળવાઈ રહે (છેલ્લા 10 વર્ષ મુજબ): તો તમારા 50,000 ની વેલ્યુ 2,75,000 થી પણ વધુ થઈ શકે છે!

સોનાના ભાવમાં વધઘટ કેમ થાય છે?

સોનાના ભાવ ક્યારેય સીધી રેખામાં નથી વધતા. તેની કિંમતો નક્કી કરવામાં નીચેના પરિબળો મુખ્ય ભાગ ભજવે છે:

અમેરિકન ફેડરલ રિઝર્વ (US Fed) ના વ્યાજ દરોના નિર્ણયો.

અમેરિકન ડોલર (USD) ની મજબૂતી કે નબળાઈ.

વૈશ્વિક સ્તરે વધતી મોંઘવારી અને જીઓ-પોલિટિકલ ટેન્શન (યુદ્ધ કે આંતરરાષ્ટ્રીય વિવાદ).

દુનિયાભરની સેન્ટ્રલ બેંકો દ્વારા સોનાની સતત ખરીદી.

ફિઝિકલ ગોલ્ડ ખરીદતા પહેલા આ છુપા ખર્ચાઓ ધ્યાનમાં રાખો

જો તમે માત્ર રોકાણના હેતુથી સોનાના સિક્કા કે ઘરેણાં ખરીદો છો, તો તમારું ચોખ્ખું રિટર્ન ઘટી શકે છે. કારણ કે તેમાં અમુક ખર્ચાઓ જોડાયેલા હોય છે ખરીદી પર 3% GST લાગે છે. ઘરેણાં પર મેકિંગ ચાર્જ અને વેસ્ટેજનો ખર્ચ ચૂકવવો પડે છે. ખરીદતી અને વેચતી વખતના ભાવમાં મોટો તફાવત હોય છે.

સ્માર્ટ ઇન્વેસ્ટમેન્ટ ટિપ

જો તમારો હેતુ માત્ર રોકાણ કરીને સારો નફો કમાવવાનો છે, તો ફિઝિકલ ગોલ્ડની જગ્યાએ પેપર અથવા ડિજિટલ વિકલ્પો પસંદ કરો. આજના સમયમાં Gold ETF, ડિજિટલ ગોલ્ડ અથવા ગોલ્ડ મ્યુચ્યુઅલ ફંડ્સમાં રોકાણ કરવું વધુ ફાયદાકારક અને સુરક્ષિત સાબિત થઈ શકે છે. તેમાં કોઈ મેકિંગ ચાર્જ કે ચોરી થવાનો ડર રહેતો નથી.

આ પણ વાંચો- Rentomojo IPO: બ્લેકરોક અને ગોલ્ડમેન સૅક્સે લગાવ્યો મોટો દાવ! આજથી ખુલ્યો ઇશ્યૂ, રોકાણ કરતા પહેલા જાણો 5 મોટી વાતો

(Disclaimer: અહીં આપેલી માહિતી માત્ર એજ્યુકેશન અને જાણકારી માટે છે. બજારમાં રોકાણ કરવું જોખમોને આધીન છે. કોઈપણ પ્રકારનું રોકાણ કરતા પહેલા હંમેશા તમારા સર્ટિફાઇડ ફાઇનાન્સિયલ એક્સપર્ટની સલાહ ચોક્કસ લો.)