Income Tax Return: 31 જુલાઈ સુધીમાં ITR ફાઈલ કરવાનું ચૂકી ગયા છો? ટેન્શન ના લો, જાણો હવે તમારી પાસે કયા છે ઓપ્શન

Income Tax Return: ઓગસ્ટ મહિનો શરૂ થઈ ગયો છે અને તેની સાથે જ રૂપિયા-પૈસાને લગતા ઘણા નિયમો પણ બદલાઈ ગયા છે. નોકરિયાત વર્ગ માટે ITR-1 અને ITR-2 ફોર્મ દ્વારા ઈન્કમ ટેક્સ રિટર્ન ફાઈલ કરવાની છેલ્લી તારીખ 31 જુલાઈ હતી. જો તમે કોઈ કારણસર આ ડેડલાઈન ચૂકી ગયા છો, તો હવે તમારે ચિંતા કરવાની જરૂર નથી. આવકવેરા વિભાગ તમને હજુ પણ એક તક આપે છે, પરંતુ હવે તેના માટે તમારે થોડો દંડ ચૂકવવો પડશે. ચાલો જાણીએ હવે તમારી પાસે કયા વિકલ્પો બચ્યા છે.

31 ડિસેમ્બર સુધી ફાઈલ કરી શકાશે ‘બિલેટેડ રિટર્ન'

જો તમે 31 જુલાઈ સુધીમાં તમારું રિટર્ન સબમિટ નથી કરી શક્યા, તો તમે આ વર્ષે 31 ડિસેમ્બર સુધી તમારું રિટર્ન ફાઈલ કરી શકો છો. સમયમર્યાદા વીતી ગયા પછી ફાઈલ થતા રિટર્નને ‘બિલેટેડ રિટર્ન' કહેવામાં આવે છે. જોકે, આ વિકલ્પ પસંદ કરવાથી તમારે પેનલ્ટી ભરવી પડશે અને બાકી નીકળતા ટેક્સ પર વ્યાજ પણ આપવું પડશે. આ ઉપરાંત, આવા ટેક્સપેયર્સનું રિફંડ આવવામાં પણ સામાન્ય કરતાં વધુ સમય લાગી શકે છે.

બિલેટેડ રિટર્ન પર કેટલી લાગશે પેનલ્ટી?

* જો તમારી વાર્ષિક આવક 5 લાખ રૂપિયાથી વધુ છે, તો તમારે 5000 રૂપિયાનો દંડ ચૂકવવો પડશે.

* જો તમારી વાર્ષિક આવક 5 લાખ રૂપિયા કે તેથી ઓછી છે, તો તમારે માત્ર 1000 રૂપિયાની પેનલ્ટી ભરવાની રહેશે.

* આ ઉપરાંત, ઈન્કમ ટેક્સ એક્ટના સેક્શન 234A હેઠળ, જો તમારો કોઈ ટેક્સ ચૂકવવાનો બાકી નીકળતો હશે, તો તેના પર તમારે વ્યાજ પણ ચૂકવવું પડશે.

આ ટેક્સપેયર્સ 31 ઓગસ્ટ સુધી વિના પેનલ્ટી ફાઈલ કરી શકશે રિટર્ન

એવા ટેક્સપેયર્સ જેમને ITR-3 અથવા ITR-4 ફોર્મ ભરવું જરૂરી છે અને જેમને ટેક્સ ઓડિટની કોઈ જરૂર નથી, તેમના માટે રિટર્ન ફાઈલ કરવાની છેલ્લી તારીખ 31 ઓગસ્ટ છે. આ કેટેગરીમાં મુખ્યત્વે સેલ્ફ-એમ્પ્લોયડ પ્રોફેશનલ્સ, ફ્રીલાન્સર્સ અને નાના વેપારીઓનો સમાવેશ થાય છે. જે ટેક્સપેયર્સે સેક્શન 44AD અને 44ADA હેઠળ પ્રિઝમ્પટિવ ટેક્સેશન સ્કીમ પસંદ કરી છે, તેઓ પણ 31 ઓગસ્ટ સુધી પોતાનું રિટર્ન ફાઈલ કરી શકે છે.

RBIની મોનેટરી પોલિસીની બેઠક પર પણ રહેશે નજર

આ મહિનામાં રિઝર્વ બેંક ઓફ ઈન્ડિયાની મોનેટરી પોલિસી કમિટીની મહત્વપૂર્ણ બેઠક પણ યોજાવા જઈ રહી છે. આ બેઠક 3 ઓગસ્ટના રોજ શરૂ થશે અને તેના પરિણામો 5 ઓગસ્ટના રોજ જાહેર થશે. જો RBI આ મીટિંગમાં વ્યાજ દરો (રેપો રેટ) વધારવાનો નિર્ણય લેશે, તો હોમ લોન, કાર લોન અને પર્સનલ લોન મોંઘી થઈ જશે, જેનાથી લોકોની EMI વધી શકે છે. જોકે, માર્કેટના જાણકારોના મતે આ વખતે રેપો રેટ વધવાની શક્યતા ઘણી ઓછી છે.

જો તમે 31 જુલાઈની ડેડલાઈન ચૂકી ગયા છો, તો શક્ય તેટલી વહેલી તકે પેનલ્ટી સાથે 31 ડિસેમ્બર પહેલા તમારું બિલેટેડ રિટર્ન ફાઈલ કરી દો. છેલ્લી ઘડીની ભીડ અને સિસ્ટમ ક્રેશ જેવી સમસ્યાઓથી બચવા માટે કામ વહેલું પતાવવું જ હિતાવહ છે.

આ પણ વાંચો- RBI New FD Rules: બેંકોની મનમાનીનો અંત! હવે 3 કરોડની FD પર તમામ ગ્રાહકોને મળશે એક સમાન વ્યાજ, જાણો ક્યારથી લાગુ થશે નવો નિયમ