PNBની શાનદાર ઓફર: 666 દિવસની FD પર ગ્રાહકોને મળશે બમ્પર વ્યાજ, જાણો સંપૂર્ણ વિગત

PNB FD rates : પંજાબ નેશનલ બેંકના ગ્રાહકો માટે એક શાનદાર સમાચાર છે. જો તમે સુરક્ષિત રોકાણ કરીને સારો નફો કમાવવા માંગો છો, તો બેંકની ફિક્સ ડિપોઝિટ સ્કીમ તમારા માટે બેસ્ટ વિકલ્પ સાબિત થઈ શકે છે. ગ્રાહકોની સંખ્યાની દ્રષ્ટિએ સ્ટેટ બેંક ઓફ ઇન્ડિયા પછી PNB દેશની બીજી સૌથી મોટી સરકારી બેંક છે. હાલમાં PNB દ્વારા એક ખાસ 666 દિવસની FD સ્કીમ ચલાવવામાં આવી રહી છે, જેમાં ગ્રાહકોને આકર્ષક વ્યાજ મળી રહ્યું છે.

ઓછામાં ઓછા 7 દિવસ માટે ખોલાવી શકાય છે ખાતું

PNB માં તમે ઓછામાં ઓછા 7 દિવસ માટે સૌથી ટૂંકી મુદતની FD ખોલાવી શકો છો. આ ઉપરાંત, લાંબા ગાળાના રોકાણ માટે બેંક વધુમાં વધુ 10 વર્ષ સુધીની મુદત પણ ઓફર કરે છે. સામાન્ય રીતે આ સરકારી બેંક પોતાની અલગ-અલગ FD સ્કીમ્સ પર 3.00 ટકાથી લઈને 7.40 ટકા સુધીનું વ્યાજ આપી રહી છે.

666 દિવસની FD પર કોને કેટલું વ્યાજ મળશે?

સામાન્ય નાગરિકો (59 વર્ષ સુધી): બેંક દ્વારા 6.50 ટકા લેખે વ્યાજ આપવામાં આવી રહ્યું છે.

સિનિયર સિટીઝન (60 વર્ષથી વધુ): 60 વર્ષ કે તેથી વધુ ઉંમરના વડીલોને આ સ્કીમ પર 7.00 ટકા વ્યાજ મળી રહ્યું છે.

સુપર સિનિયર સિટીઝન (80 વર્ષ કે તેથી વધુ): 80 વર્ષથી વધુ ઉંમરના ગ્રાહકોને બેંક સૌથી વધુ 7.30 ટકા વ્યાજ ઓફર કરે છે.

ખાસ નોંધવા જેવી બાબત એ છે કે, આ તમામ વ્યાજદરો 3 કરોડ રૂપિયાથી ઓછી રકમની ડિપોઝિટ પર જ લાગુ પડે છે.

સિનિયર સિટીઝન માટે ખાસ ફાયદો

પંજાબ નેશનલ બેંક હંમેશા પોતાના વડીલ ગ્રાહકોનું ખાસ ધ્યાન રાખે છે. બેંક સામાન્ય નાગરિકોની સરખામણીમાં સિનિયર સિટીઝનને FD પર 0.50 ટકા વધુ વ્યાજ આપે છે. જ્યારે 80 વર્ષથી વધુ ઉંમરના સુપર સિનિયર સિટીઝનને સિનિયર સિટીઝન કરતા પણ 0.30 ટકા વધારાનું વ્યાજ આપવામાં આવે છે. તાજેતરના નવા સુધારા મુજબ ગ્રાહકો આ ફાયદાઓનો લાભ લઈ શકે છે.

વ્યાજદરો કોણ નક્કી કરે છે?

તમને જણાવી દઈએ કે PNB હોય કે દેશની અન્ય કોઈ બેંક, તમામની FD ના વ્યાજદરો રિઝર્વ બેંક ઓફ ઈન્ડિયાના રેપો રેટ પર નિર્ભર હોય છે. RBI ની મોનેટરી પોલિસી કમિટી દર બે મહિને પોતાની બેઠક યોજે છે, જેમાં દેશની વર્તમાન અર્થવ્યવસ્થા અને મોંઘવારી દરને ધ્યાનમાં રાખીને રેપો રેટ નક્કી કરવામાં આવે છે.

આ પણ વાંચો-ભારતમાં Microsoftનો મોટો AI દાવ, હૈદરાબાદમાં ખોલ્યું નવું ક્લાઉડ રીજન, જાણો પાણી વિના સર્વર ઠંડા રાખતી આ ટેકનોલોજી વિશે