અકસ્માતમાં મૃત્યુ સાબિત થાય તો પોસ્ટમોર્ટમ રિપોર્ટ જરૂરી નથી: ગ્રાહક પંચનો ઐતિહાસિક ચુકાદો, વીમા કંપનીને 2.25 કરોડ ચૂકવવા આદેશ

Consumer Commission, Insurance, Accidental Death: વીમાક્ષેત્રે ગ્રાહકલક્ષી ક્રાંતિ લાવતો એક ઐતિહાસિક નિર્ણય સુરત જિલ્લા ગ્રાહક કમિશન (મેઈન) દ્વારા કરવામાં આવ્યો છે. કમિશને સ્પષ્ટ રીતે જણાવ્યું છે કે, જો વીમાધારકનું અકસ્માતને કારણે અવસાન થયું હોવાનું સ્પષ્ટપણે સાબિત થતું હોય, તો માત્ર પોસ્ટમોર્ટમ (PM) રિપોર્ટ ન કરાવ્યો હોવાના ટેકનિકલ કારણને આગળ ધરીને પર્સનલ એક્સિડેન્ટ વીમો નામંજૂર કરી શકાય નહીં. આ ચુકાદા દ્વારા ગ્રાહક પંચે મૃતકના પતિ અને તેમના 3 સંતાનોને વીમા કંપની પાસેથી 2.25 કરોડ રૂપિયાનો ક્લેઈમ, વ્યાજ અને વળતર સહિત ચૂકવવાનો આદેશ આપ્યો છે, જે વીમાધારકોના હિતમાં એક મોટો વિજય છે.

ઘટનાની વિગતો અને વીમા કંપનીનું વલણ

આ કેસ સંજય અગ્રવાલ અને તેમની પત્ની દીપમાલા અગ્રવાલ સાથે સંબંધિત છે. દીપમાલા અગ્રવાલ પાસે રિલાયન્સ ફાઈનાન્સિયલ પ્રોટેક્શનની પર્સનલ એક્સિડેન્ટ પોલિસી હતી. 4-10-2020ના રોજ દીપમાલા વૃંદાવન સ્ટુડિયો (ઉમરગામ) ખાતે સિરિયલના શૂટિંગ દરમિયાન સ્ટેજ પર ઊભા હતા. અકસ્માતવશ તેમનું સંતુલન બગડતા, તેઓ આશરે 10થી 15 ફૂટ ઊંચેથી નીચે પટકાયા હતા. આ ગંભીર અકસ્માતમાં તેમને કમરના ભાગે તીવ્ર ઈજા થઈ હતી. તેમને તાત્કાલિક સુરતની મહાવીર સુપર સ્પેશિયાલિસ્ટ હોસ્પિટલમાં દાખલ કરવામાં આવ્યા, જ્યાં નિદાન થયું કે તેમના કમરની નીચેનો ભાગ સંપૂર્ણપણે પેરેલાઈઝડ થઈ ગયો છે. દુર્ભાગ્યે, 25-10-2020ના રોજ સારવાર દરમિયાન વધુ કોમ્પ્લીકેશન્સ ઊભા થતા દીપમાલા અગ્રવાલનું અવસાન થયું.

તેમના પતિ સંજય અગ્રવાલે જ્યારે 2.25 કરોડ રૂપિયાના વીમા ક્લેઈમ માટે અરજી કરી, ત્યારે વીમા કંપનીએ 21-4-2022ના રોજ ક્લેઈમ નામંજૂર કર્યો. કંપનીએ કારણ દર્શાવ્યું કે દીપમાલાનું પોસ્ટમોર્ટમ કરાવવામાં આવ્યું ન હતું અને વીમા પોલિસીની શરતો મુજબ PM રિપોર્ટ રજૂ કરવામાં આવ્યો ન હોતો. આ ટેકનિકલ આધાર પર ક્લેઈમ રિજેક્ટ કરવામાં આવ્યો હતો.

સુરત જિલ્લા ગ્રાહક કમિશને વીમા કંપની દ્વારા દર્શાવેલા ટેકનિકલ કારણને સ્પષ્ટપણે નામંજૂર કર્યું. કમિશને તાર્કિક દલીલ કરી કે, જ્યારે મૃત્યુનું કારણ સ્પષ્ટપણે અકસ્માત હોય અને તે સંબંધિત તમામ તબીબી પુરાવાઓ હાજર હોય, ત્યારે માત્ર પોસ્ટમોર્ટમ રિપોર્ટના અભાવે વીમાનો કાયદેસરનો લાભ અટકાવી શકાય નહીં.

આ ચુકાદો વીમા ક્ષેત્રે એક સીમાચિહ્નરૂપ સાબિત થશે. તે વીમા કંપનીઓની ટેકનિકલ જોગવાઈઓના દુરુપયોગ સામે સામાન્ય વીમાધારકોના હિતોનું રક્ષણ કરે છે. આ નિર્ણય દર્શાવે છે કે, ગ્રાહક સુરક્ષા કાયદાનો ઉદ્દેશ્ય વીમાધારકોને અન્યાયથી બચાવવાનો છે, અને માત્ર ઔપચારિકતાના અભાવે વાસ્તવિક ક્લેઈમ નકારી શકાય નહીં. આ ચુકાદો ભવિષ્યમાં આવા અનેક કિસ્સાઓમાં ન્યાયનો માર્ગ મોકળો કરશે.

આ પણ વાંચો- G20 શિખર સંમેલન: પ્રાદેશિક અખંડિતતાનો રણટંકાર અને PM મોદીના મહત્ત્વપૂર્ણ પ્રસ્તાવો