RBI MPC Meeting: રિઝર્વ બેંકે રેપો રેટ 5.25% પર જાળવી રાખ્યો, જાણો તમારા ખિસ્સા પર શું અસર થશે અને 2027 માટે શું છે મોંઘવારીનો અંદાજ

RBI MPC Meeting: ભારતીય રિઝર્વ બેંક (RBI)ની મોનિટરી પોલિસી કમિટી (MPC) ની બેઠક 8 એપ્રિલના રોજ પૂર્ણ થઈ છે. સામાન્ય માણસ અને લોન ધારકોને રાહત આપતા આરબીઆઈએ વ્યાજદરોમાં કોઈ ફેરફાર કર્યો નથી. RBI એ પોતાનો રેપો રેટ 5.25 ટકા પર યથાવત રાખવાનો મોટો નિર્ણય લીધો છે. બેંકનું આ પગલું દર્શાવે છે કે, હાલની વૈશ્વિક અનિશ્ચિતતાઓ (જેમ કે ભૌગોલિક રાજકીય તણાવ અને કોમોડિટીના ભાવમાં ઉતાર-ચઢાવ) અને સ્થાનિક મોંઘવારી વચ્ચે બેંક ખૂબ જ સાવધાનીપૂર્વક સંતુલન જાળવી રહી છે.

નાણાકીય વર્ષ 2027 માટે મોંઘવારીનો નવો અંદાજ રિઝર્વ બેંકે આગામી નાણાકીય વર્ષ 2027 માટે રિટેલ (છૂટક) મોંઘવારીનો અંદાજ 4.6 ટકા નક્કી કર્યો છે, જ્યારે કોર મોંઘવારી દર 4.4 ટકા રહેવાનું અનુમાન છે. અલગ અલગ ત્રિમાસિક (Quarter) ગાળાની વાત કરીએ તો:

પ્રથમ ત્રિમાસિક (Q1): રિટેલ મોંઘવારી 4 ટકા પર જાળવી રખાઈ છે (તેમાં કોઈ બદલાવ કરાયો નથી).

બીજા ત્રિમાસિક (Q2): મોંઘવારીનો અંદાજ 4.2 ટકાથી વધારીને 4.4 ટકા કરાયો છે.

વૈશ્વિક પડકારો છતાં ભારતીય અર્થવ્યવસ્થા મજબૂત RBI ગવર્નર સંજય મલ્હોત્રાએ પ્રેસને સંબોધતા જણાવ્યું હતું કે, હાલમાં ગ્લોબલ ઇકોનોમીમાં ઘણા પડકારો અને અનિશ્ચિતતાઓનું વાતાવરણ છે. ગ્લોબલ સપ્લાય ચેનમાં મુશ્કેલીઓ જોવા મળી રહી છે, જેના કારણે વૈશ્વિક ગ્રોથ ઘટવાનું જોખમ રહેલું છે. પશ્ચિમ એશિયાના સંકટ અને હોર્મુઝ સ્ટ્રેટમાં ચાલી રહેલા તણાવની અસર ગ્રોથ અને સપ્લાય ચેન પર પડી શકે છે.

જોકે, તેમણે સ્પષ્ટ કર્યું કે ભારતીય અર્થવ્યવસ્થાના પાયા (Fundamentals) ખૂબ જ મજબૂત છે. સપ્લાય ચેન સુધારવા માટે ઘણા સારા પગલાં લેવાયા છે અને સરકારના યોગ્ય નિર્ણયોના કારણે વૈશ્વિક યુદ્ધની ભારત પર બહુ મર્યાદિત અસર થઈ છે. ગવર્નરે ચેતવણી આપી કે મોંઘા ક્રૂડ ઓઈલના કારણે મોંઘવારી વધવાનું જોખમ રહેલું છે. એનર્જી માર્કેટની અસ્થિરતાના કારણે ઇન્ડસ્ટ્રી, ખેતી અને સર્વિસ સેક્ટર પર અસર પડી શકે છે. પરંતુ સારી વાત એ છે કે, શહેરી વિસ્તારોમાં ખપત (Consumption) માં મજબૂતાઈના સંકેતો મળી રહ્યા છે.

વિદેશી હૂંડિયામણ અને બેન્કિંગ સેક્ટર માટે મોટી જાહેરાતો

રેકોર્ડ રિઝર્વ: ગવર્નરે માહિતી આપી કે 3 એપ્રિલ સુધીમાં ભારતનો વિદેશી મુદ્રા ભંડાર (Forex Reserves) 697 અબજ ડોલર પર પહોંચી ગયો છે. દેશ પાસે પૂરતું વિદેશી હૂંડિયામણ છે, જે આવનારા 11 મહિના સુધી આયાત (Import) ને કવર કરવા માટે સક્ષમ છે.

રૂપિયાની સ્થિરતા: બેંકની એક્સચેન્જ રેટ પોલિસીમાં કોઈ ફેરફાર કરાયો નથી. રૂપિયાની વેલ્યુને સ્થિર રાખવા માટે RBI યોગ્ય પગલાં લેતી રહેશે.

બેન્કિંગ નિયમો લેવાશે હળવા: સિસ્ટમમાં પૂરતી લિક્વિડિટી જાળવવા પર ભાર મુકવામાં આવ્યો છે. બેંકોનો ક્રેડિટ ગ્રોથ હાલમાં સંતુલિત દિશામાં છે. રોજગાર વધારવા MSMEs માટે ઓનબોર્ડિંગના નિયમો વધુ સરળ બનાવવામાં આવશે.

નિયમોની સમીક્ષા: બેંકોના વર્તમાન નિયમોની પણ સમીક્ષા ચાલી રહી છે, જેથી બેંક બોર્ડના કામકાજને વધુ તર્કસંગત અને સરળ બનાવી શકાય.

એકંદરે, રિઝર્વ બેંકનું માનવું છે કે વૈશ્વિક સ્તરે ભલે ગમે તેટલો તણાવ હોય, પરંતુ ભારત પોતાની સચોટ નીતિઓને કારણે એકદમ સલામત સ્થિતિમાં છે. રેપો રેટમાં કોઈ બદલાવ ન થવાથી હાલમાં હોમ લોન કે ઓટો લોનના EMIમાં કોઈ વધારો નહીં થાય, જે ઉનાળાની શરૂઆતમાં સામાન્ય લોકો અને મધ્યમ વર્ગ માટે એક મોટા રાહતના સમાચાર છે.

આ પણ વાંચો- RBI રેપો રેટ યથાવત્: હોમ લોન અને કાર લોનની EMI ઘટવાની આશા પર પાણી ફર્યું, જાણો ગવર્નરે શું કહ્યું