લોન લેનારાઓને લાગશે મોટો ઝટકો! ડિસેમ્બરમાં RBI 0.50% વધારી શકે છે વ્યાજદર, SBI રિસર્ચનો મોટો દાવો

RBI Repo Rate hike: જો તમે હોમ લોન કે કાર લોન લીધી છે અને EMI ભરી રહ્યા છો, તો ડિસેમ્બર મહિનામાં તમને મોટો ઝટકો લાગી શકે છે. દેશમાં સતત વધી રહેલી મોંઘવારીને કાબૂમાં લેવા માટે રિઝર્વ બેંક ઓફ ઈન્ડિયા કડક પગલાં લેવાની તૈયારીમાં છે. તાજેતરમાં સામે આવેલા 'SBI રિસર્ચ' ના લેટેસ્ટ રિપોર્ટ મુજબ, આગામી ડિસેમ્બરની બેઠકમાં RBI વ્યાજદરમાં સીધો 0.50%નો મોટો વધારો કરી શકે છે.

વ્યાજદર વધવાના મુખ્ય કારણો શું છે?

એસબીઆઈ રિસર્ચના રિપોર્ટમાં સ્પષ્ટ કહેવાયું છે કે, બજારમાં મોંઘવારીનું ભારે દબાણ અને આંતરરાષ્ટ્રીય સ્તરે ક્રૂડ ઓઈલની (કાચા તેલની) ઊંચી કિંમતોને કારણે વ્યાજદર ઘટવાની અત્યારે કોઈ જ શક્યતા નથી. ઓક્ટોબરમાં યોજાયેલી મોનેટરી પોલિસી કમિટીની બેઠક બાદ, RBI ગવર્નર સંજય મલ્હોત્રાએ પણ સંકેત આપ્યા હતા કે ભવિષ્યમાં કાં તો વ્યાજદર વધશે અથવા તેને સ્થિર રાખવામાં આવશે. તે બધું મોંઘવારી અને આર્થિક વિકાસના આંકડાઓ પર નિર્ભર રહેશે.

નોંધનીય છે કે, ઓક્ટોબર મહિનાની શરૂઆતમાં જ MPC એ રેપો રેટ 0.25% વધારીને 5.50% કરી દીધો હતો અને પોતાની નીતિ કડક બનાવી હતી.

SBI રિસર્ચે ડિસેમ્બરની પોલિસી માટે બે શક્યતાઓ દર્શાવી છે:

પ્રથમ વિકલ્પ: રિઝર્વ બેંક સીધો જ રેપો રેટમાં 0.50% નો વધારો કરી દે, જેથી તે 6% ની સપાટીએ પહોંચી જશે.

બીજો વિકલ્પ: રેપો રેટમાં 0.25% નો વધારો કરીને તેને 5.75% કરવામાં આવે અને સાથે જ લિક્વિડિટી એડજસ્ટમેન્ટ ફેસિલિટી (LAF) કોરિડોરમાં 0.25% નો વધારો કરવામાં આવે.

જો બીજો વિકલ્પ અપનાવાય તો, MSF (માર્જિનલ સ્ટેન્ડિંગ ફેસિલિટી) નો દર 6.25% થઈ જશે. રિપોર્ટ મુજબ આ પગલાથી વૈશ્વિક અનિશ્ચિતતા વચ્ચે ભારતીય બજારને સ્થિર રાખવામાં મદદ મળશે.

મોંઘવારી અને ક્રૂડ ઓઈલનું મોટું ટેન્શન

મોંઘવારી હજુ પણ RBI માટે માથાનો દુખાવો બનેલી છે. કન્ઝ્યુમર પ્રાઇસ ઇન્ડેક્સ (CPI) માં સૌથી વધુ અસર કરતી વસ્તુઓની સંખ્યા જે ઓગસ્ટમાં 25 હતી, તે સપ્ટેમ્બરમાં વધીને 31 થઈ ગઈ છે. આ દર્શાવે છે કે વધુ ને વધુ વસ્તુઓ હવે મોંઘી થઈ રહી છે.

રિપોર્ટમાં એવો ડર પણ વ્યક્ત કરાયો છે કે નવેમ્બર મહિનામાં મોંઘવારી દર 6.5% ની ટોચે પહોંચી શકે છે. આ ઉપરાંત, બ્રેન્ટ ક્રૂડ ઓઈલની કિંમત પણ 110 ડોલર પ્રતિ બેરલની આસપાસ રહી શકે છે, જે મોંઘવારીનો ખતરો વધુ વધારશે.

RBIની આગામી મહત્ત્વની MPC બેઠક 2 થી 4 ડિસેમ્બર વચ્ચે યોજાવાની છે. નાણાકીય વર્ષ 2026-27 માટે RBI એ ભારતનો GDP ગ્રોથ 7.1% રહેવાનો અંદાજ મૂક્યો છે, જ્યારે રિટેલ મોંઘવારી ત્રીજા ક્વાર્ટરમાં 6% અને ચોથા ક્વાર્ટરમાં ઘટીને 5.7% રહેવાનું અનુમાન છે. હવે જોવાનું એ રહેશે કે ડિસેમ્બરની આ બેઠક બાદ સામાન્ય જનતાના ખિસ્સા પર EMI નો કેટલો બોજ વધે છે.

આ પણ વાંચો- UPIથી મોટી રકમ લેનારાઓ માટે કામના સમાચાર! જાણો કેટલા ટ્રાન્ઝેક્શન પર આવી શકે છે ઇન્કમ ટેક્સની નોટિસ, એક્સપર્ટ પાસેથી સમજો નિયમો