Rules Change 2026: નવા વર્ષના પહેલા જ દિવસે મોંઘવારીનો ડામ, ગેસ સિલિન્ડરથી લઈને બેન્ક રજાઓ સુધી.. જાણો આજથી લાગુ થયેલા 5 મોટા ફેરફાર!

Rules Change 2026: નવા વર્ષ 2026ની શરૂઆત ઉજવણી સાથે થઈ છે, પરંતુ તેની સાથે જ સામાન્ય જનતા અને વેપારીઓ માટે કેટલાક આર્થિક ફેરફારો પણ આવ્યા છે. આજથી એટલે કે 1 જાન્યુઆરી, 2026થી દેશભરમાં કેટલાક મહત્વપૂર્ણ નિયમો અને ભાવોમાં ફેરફાર થયો છે. નવા વર્ષની સવાર કેટલાક લોકો માટે રાહત લઈને આવી છે, તો કેટલાક માટે મોંઘવારીનો ઝટકો સાબિત થઈ છે. તમારી રોજિંદા જીવનશૈલી અને બજેટ પર સીધી અસર કરતા આ 5 મોટા ફેરફારો વિશે જાણવું અત્યંત જરૂરી છે. ચાલો વિગતવાર જાણીએ કે આજથી કયા નિયમો બદલાયા છે અને તમારા ખિસ્સા પર તેની શું અસર થશે.

1. કોમર્શિયલ ગેસ સિલિન્ડરના ભાવમાં તોતિંગ વધારો

વર્ષ 2026ના પહેલા જ દિવસે વેપારીઓ અને હોટેલ સંચાલકોને મોંઘવારીનો ડામ લાગ્યો છે. ઓઈલ માર્કેટિંગ કંપનીઓએ 19 કિલોના કોમર્શિયલ LPG સિલિન્ડરના ભાવમાં સીધો 111 રૂપિયાનો વધારો ઝીંક્યો છે. આ ભાવ વધારાને કારણે રાજધાની દિલ્હીમાં જે સિલિન્ડર પહેલા 1580.50 રૂપિયામાં મળતો હતો, તે હવે વધીને 1691.50 રૂપિયા થઈ ગયો છે. જ્યારે આર્થિક રાજધાની મુંબઈમાં ભાવ 1531.50 રૂપિયાથી વધીને 1642.50 રૂપિયા પર પહોંચી ગયો છે. જોકે, સામાન્ય જનતા માટે રાહતના સમાચાર એ છે કે 14 કિલોના ઘરેલુ ગેસ સિલિન્ડરના ભાવમાં કોઈ જ ફેરફાર કરવામાં આવ્યો નથી. ગૃહિણીઓને ગેસ સિલિન્ડર એપ્રિલ 2025ના જૂના ભાવે જ મળવાનું ચાલુ રહેશે, જેથી ઘરનું બજેટ ખોરવાશે નહીં.

એક તરફ ગેસ મોંઘો થયો છે, તો બીજી તરફ હવાઈ મુસાફરી કરનારાઓ માટે સારા સમાચાર છે. સરકારે વિમાન ઈંધણ એટલે કે ATF (Aviation Turbine Fuel)ના ભાવમાં ઘટાડો કર્યો છે. દિલ્હીમાં જેટ ફ્યુઅલની કિંમત જે પહેલા 99,676 રૂપિયા પ્રતિ કિલોલીટર હતી, તે ઘટીને હવે 92,323 રૂપિયા પ્રતિ કિલોલીટર થઈ ગઈ છે. ઈંધણના ભાવમાં થયેલા આ ઘટાડાનો સીધો લાભ મુસાફરોને મળી શકે છે, કારણ કે ઓપરેટિંગ કોસ્ટ ઘટતા એરલાઇન્સ કંપનીઓ આગામી દિવસોમાં વિમાનની ટિકિટના ભાવમાં ઘટાડો કરી શકે છે.

3. નવી કાર ખરીદવી હવે મોંઘી પડશે

જો તમે નવા વર્ષ 2026માં નવી કાર ખરીદવાનું સપનું જોઈ રહ્યા હોવ, તો તમારે તમારા બજેટમાં વધારો કરવો પડશે. આજથી એટલે કે 1 જાન્યુઆરીથી ઘણી દિગ્ગજ કાર ઉત્પાદક કંપનીઓએ પોતાના વાહનોના ભાવમાં વધારો કરી દીધો છે. કંપનીઓએ આ માટે ઉત્પાદન ખર્ચમાં થયેલા વધારાને મુખ્ય કારણ ગણાવ્યું છે. સ્ટીલ, પ્લાસ્ટિક અને અન્ય રો-મટીરીયલ મોંઘું થવાને કારણે કારના ભાવમાં આ વધારો કરવામાં આવ્યો છે, જેની સીધી અસર ગ્રાહકોના ખિસ્સા પર પડશે.

4. ઓસ્ટ્રેલિયામાં ભારતીય પ્રોડક્ટ્સ પર ઝીરો ટેરિફ

વ્યાપાર જગત માટે આજનો દિવસ ઐતિહાસિક છે. ભારત અને ઓસ્ટ્રેલિયા વચ્ચેના વ્યાપાર કરારના સફળતાપૂર્વક 3 વર્ષ પૂર્ણ થયા છે. આ કરારના ભાગરૂપે આજથી ઓસ્ટ્રેલિયા ભારતથી નિકાસ થતી 100% પ્રોડક્ટ્સ (તમામ વસ્તુઓ) પર ઝીરો ટેરિફ એટલે કે શૂન્ય ટેક્સ લાગુ કરી રહ્યું છે. આ નિર્ણયથી ભારતીય નિકાસકારોને મોટો ફાયદો થશે અને ઓસ્ટ્રેલિયાના માર્કેટમાં ભારતીય વસ્તુઓ વધુ સ્પર્ધાત્મક બનશે. કાપડ, જેમ્સ એન્ડ જ્વેલરી અને અન્ય ક્ષેત્રોના વેપારીઓ માટે આ સમાચાર ખૂબ જ પ્રોત્સાહક છે.

5. જાન્યુઆરી મહિનામાં 16 દિવસ બેન્કો બંધ રહેશે

નવા વર્ષની શરૂઆતમાં જ બેન્કિંગને લગતા કામકાજ પતાવવા માટે તમારે રજાઓનું લિસ્ટ ચેક કરવું પડશે. RBIની યાદી મુજબ, જાન્યુઆરી 2026માં કુલ 16 દિવસ બેન્કો બંધ રહેવાની છે. જેમાં મકરસંક્રાંતિ અને 26 જાન્યુઆરી (પ્રજાસત્તાક દિવસ) જેવી જાહેર રજાઓ ઉપરાંત શનિ-રવિની રજાઓનો પણ સમાવેશ થાય છે. આટલી લાંબી રજાઓને કારણે બેન્ક શાખાઓમાં થતા કામકાજને અસર થઈ શકે છે. જોકે, ગ્રાહકો માટે નેટ બેન્કિંગ, મોબાઈલ બેન્કિંગ અને ATM જેવી ઓનલાઈન સેવાઓ 24 કલાક ચાલુ રહેશે, તેથી ડિજિટલ વ્યવહારોમાં કોઈ અડચણ આવશે નહીં.

આ પણ વાંચો - ગુજરાત પર વેસ્ટર્ન ડિસ્ટર્બન્સની ઘાત: સૌરાષ્ટ્ર અને ઉત્તર ગુજરાતમાં આજે પણ માવઠાની આગાહી, ખેડૂતો ચિંતાતુર