સુકન્યા સમૃદ્ધિ યોજના કેલ્ક્યુલેટર: દીકરી માટે બનાવો 71 લાખથી વધુનું ફંડ, જાણો લેટેસ્ટ વ્યાજ દર અને નવા નિયમો

Sukanya Samriddhi Scheme details: શું તમે પણ તમારી દીકરીના સુરક્ષિત ભવિષ્ય, ઉચ્ચ શિક્ષણ અને લગ્નના ખર્ચ માટે ચિંતિત છો? તો સરકારની ‘સુકન્યા સમૃદ્ધિ યોજના' (SSY) તમારા માટે બેસ્ટ વિકલ્પ છે. દીકરીઓ માટે ચાલતી આ એક સરકારી ગેરંટી વાળી સ્કીમ છે, જેમાં અત્યારે અન્ય તમામ સ્મોલ સેવિંગ સ્કીમ્સ કરતા સૌથી વધુ 8.2% વાર્ષિક વ્યાજ મળી રહ્યું છે.

જો તમે દીકરીના જન્મ પછી તરત જ આ સ્કીમમાં રોકાણ શરૂ કરી દો છો, તો 21 વર્ષ પછી તમને જંગી રકમ પાછી મળે છે. આવો સમજીએ આ યોજનાના લેટેસ્ટ નિયમો અને રોકાણનું પૂરું કેલ્ક્યુલેશન.

સુકન્યા સમૃદ્ધિ યોજનાના લેટેસ્ટ નિયમો

દીકરીના જન્મથી લઈને તે 10 વર્ષની થાય ત્યાં સુધી પોસ્ટ ઓફિસ કે બેંકમાં આ ખાતું ખોલાવી શકાય છે. કોઈપણ નાણાકીય વર્ષમાં ઓછામાં ઓછા 250 રૂપિયા અને વધુમાં વધુ 1.5 લાખ રૂપિયા જમા કરાવી શકાય છે. આ યોજનામાં ખાતું ખોલાવ્યાની તારીખથી સળંગ 15 વર્ષ સુધી પૈસા જમા કરાવવાના હોય છે. આ સ્કીમ 21 વર્ષે મેચ્યોર થાય છે. એટલે કે 15 વર્ષ પછીના 6 વર્ષ સુધી તમારે કોઈ પૈસા નથી ભરવાના, છતાં પણ તમારા જમા થયેલા ફંડ પર 8.2%ના દરે ચક્રવૃદ્ધિ વ્યાજ મળતું રહેશે.

જો તમે તમારી દીકરીના નામે દર મહિને 12,500 રૂપિયા એટલે કે વર્ષે મેક્સિમમ 1.5 લાખ રૂપિયા જમા કરો છો, તો 8.2%ના લેટેસ્ટ વ્યાજ દર પ્રમાણે ગણતરી કંઈક આવી થશે:

* દર વર્ષે રોકાણ: 1.5 લાખ રૂપિયા

* 15 વર્ષમાં કરેલું કુલ રોકાણ: 22.5 લાખ રૂપિયા

* 21 વર્ષ પછી મળતી કુલ રકમ (મેચ્યોરિટી): લગભગ 71.82 લાખ રૂપિયા

(નોંધ: સરકાર દર 3 મહિને સ્મોલ સેવિંગ સ્કીમ્સના વ્યાજ દરોની સમીક્ષા કરે છે. જો ભવિષ્યમાં તેમાં કોઈ ફેરફાર થાય તો મેચ્યોરિટીની રકમમાં થોડો ઘણો ફેરફાર આવી શકે છે.)

EEE સ્ટેટસ: ટેક્સમાં મળશે 100% છૂટ

આ સ્કીમમાં રોકાણ કરવાનું સૌથી મોટું કારણ તેનું EEE એટલે કે Exempt, Exempt, Exempt સ્ટેટસ છે. જૂના ટેક્સ રિજીમ મુજબ, ઈન્કમ ટેક્સની કલમ 80C હેઠળ વાર્ષિક 1.5 લાખ રૂપિયાના રોકાણ પર ટેક્સ છૂટ મળે છે. આ ઉપરાંત દર વર્ષે મળતું ચક્રવૃદ્ધિ વ્યાજ પણ સંપૂર્ણપણે ટેક્સ ફ્રી હોય છે. સૌથી સારી વાત એ છે કે 21 વર્ષે જ્યારે તમને 71.82 લાખ રૂપિયા એકસાથે મળશે, તો તેના પર 1 રૂપિયાનો પણ ટેક્સ ચૂકવવો નહીં પડે.

ભણતર અને લગ્ન માટે પૈસા ઉપાડવાના નિયમો

જ્યારે દીકરી 18 વર્ષની થાય અથવા 10મું ધોરણ પાસ કરી લે, ત્યારે તેના ઉચ્ચ શિક્ષણના ખર્ચ માટે ખાતામાં જમા થયેલા કુલ બેલેન્સના 50% સુધીની રકમ ઉપાડી શકાય છે. આ ઉપરાંત, 18 વર્ષની ઉંમર પછી દીકરીના લગ્ન સમયે ખાતું સમય કરતા પહેલા બંધ કરાવવાનો વિકલ્પ પણ મળે છે.

જો તમે જોખમ વગરનું અને સરકારી ગેરંટી વાળું રોકાણ શોધી રહ્યા છો, તો સુકન્યા સમૃદ્ધિ યોજનાથી સારો કોઈ વિકલ્પ નથી. માત્ર 22.5 લાખ રૂપિયાનું રોકાણ કરીને તમે દીકરી માટે લગભગ 72 લાખ રૂપિયાનું મોટું અને ટેક્સ-ફ્રી ફંડ તૈયાર કરી શકો છો.

આ પણ વાંચો- સોહરાબુદ્દીન શેખ એન્કાઉન્ટર કેસ: 21 પોલીસકર્મીઓના છુટકારા સામે ભાઈએ સુપ્રીમ કોર્ટના દરવાજા ખખડાવ્યા

(ડિસ્ક્લેમર: અહીં આપવામાં આવેલી માહિતી માત્ર સામાન્ય જાણકારી માટે છે. માર્કેટમાં રોકાણ બજારના જોખમોને આધીન છે. રોકાણકાર તરીકે કોઈપણ સ્કીમમાં પૈસા લગાવતા પહેલા હંમેશા સર્ટિફાઈડ ફાઇનાન્શિયલ એક્સપર્ટની સલાહ ચોક્કસ લેવી.)