Personal Loan Prepayment: દરેક વ્યક્તિ ઈચ્છે છે કે તેના માથા પરથી દેવાનો બોજ જલ્દીથી જલ્દી ઉતરી જાય. દર મહિને બેન્ક ખાતામાંથી કપાતો EMI કોઈને ગમતો નથી. આથી જ ઘણા લોકો પાસે જ્યારે એકસાથે થોડા પૈસા આવે છે, ત્યારે તેઓ તરત જ પોતાની પર્સનલ લોન પૂરી કરવા દોડી જાય છે. પરંતુ નાણાકીય નિષ્ણાતોના મતે, વર્ષ 2025માં બદલાતા આર્થિક સમીકરણો વચ્ચે માત્ર દેવામુક્ત થવાની ઉતાવળમાં આવો નિર્ણય લેવો હંમેશા ફાયદાકારક નથી હોતો. લોન પ્રિપેમેન્ટ કરતા પહેલા તમારે નફા અને નુકસાનનું સાચું ગણિત સમજવું ખૂબ જ જરૂરી છે, નહીંતર આ નિર્ણય તમારા ખિસ્સા પર ભારે પડી શકે છે.
લોનના હપ્તામાંથી જલ્દી છૂટકારો મેળવવાની ઉતાવળ ભારે પડી શકે છે! પ્રિપેમેન્ટ કરતા પહેલા જાણો તેના ફાયદા અને નુકસાન
Personal Loan Prepayment: શું તમે પર્સનલ લોન સમય પહેલાં પૂરી કરવા માંગો છો? પ્રિપેમેન્ટ કરતા પહેલા ફોરક્લોઝર ચાર્જ અને વ્યાજની બચતનું ગણિત સમજી લો. બધી બચત લોનમાં વાપરતા પહેલા જાણો આ કામની માહિતી.
અપડેટેડ 01:20:15 PM Aug 26, 2026 પર
નાણાકીય નિષ્ણાતોના મતે, વર્ષ 2025માં બદલાતા આર્થિક સમીકરણો વચ્ચે માત્ર દેવામુક્ત થવાની ઉતાવળમાં આવો નિર્ણય લેવો હંમેશા ફાયદાકારક નથી હોતો. લોન પ્રિપેમેન્ટ કરતા પહેલા તમારે નફા અને નુકસાનનું સાચું ગણિત સમજવું ખૂબ જ જરૂરી છે, નહીંતર આ નિર્ણય તમારા ખિસ્સા પર ભારે પડી શકે છે.
શું છે લોન પ્રી-પેમેન્ટ અને ફોરક્લોઝર?
જ્યારે તમે તમારી લોનની નક્કી કરેલી મુદત પૂરી થાય તે પહેલા જ બાકી રહેલી રકમનો અમુક ભાગ કે આખી રકમ બેન્કને ચૂકવી દો છો, તો તેને પ્રી-પેમેન્ટ કહેવાય છે. જો તમે આખી રકમ ભરીને લોન એકાઉન્ટ કાયમ માટે બંધ કરાવી દો છો, તો તેને ‘ફોરક્લોઝર' કહેવામાં આવે છે. આનો મુખ્ય ફાયદો એ છે કે તમારે ભવિષ્યમાં વ્યાજ ચૂકવવું પડતું નથી.
તો પછી નુકસાન ક્યાં છે?
બેન્કો ક્યારેય પોતાનું નુકસાન થવા દેતી નથી. જ્યારે તમે સમય પહેલા લોન પૂરી કરો છો, ત્યારે બેન્કને વ્યાજનું નુકસાન થાય છે. આ નુકસાનની ભરપાઈ કરવા માટે મોટાભાગની બેન્કો તમારી પાસેથી ‘ફોરક્લોઝર ચાર્જ' વસૂલે છે, જે બાકી રહેલી રકમના 2થી 5 ટકા સુધી હોઈ શકે છે.
આ 3 બાબતોનું ધ્યાન રાખ્યા વિના લોન ન ચૂકવતા
1) બધી બચત ખાલી ન કરો: માત્ર હપ્તાના ટેન્શનમાંથી મુક્ત થવા માટે તમારી જમા મૂડી કે ઈમરજન્સી ફંડના પૈસા ક્યારેય લોન ચૂકવવામાં ન વાપરો. અચાનક કોઈ મેડિકલ ઈમરજન્સી કે નોકરી જવાની સ્થિતિ આવે ત્યારે તમારી પાસે પૂરતા પૈસા હોવા જરૂરી છે.
2) વ્યાજ અને ચાર્જનું ગણિત: પ્રી-પેમેન્ટ માત્ર ત્યારે જ સ્માર્ટ નિર્ણય છે જો તમારી ‘વ્યાજમાં થતી બચત' એ બેન્ક દ્વારા લેવામાં આવતા 'ફોરક્લોઝર ચાર્જ' કરતા ઘણી વધારે હોય. જો લોન પૂરી થવામાં થોડા જ મહિના બાકી હોય, તો પ્રી-પેમેન્ટ કરવાનો કોઈ અર્થ નથી.
3) રોકાણ પરના વળતર સાથે સરખામણી કરો: આ સૌથી મહત્વનો મુદ્દો છે. ધારો કે તમે પર્સનલ લોન પર 11% વ્યાજ આપી રહ્યા છો, પણ તમારી પાસે જે વધારાના પૈસા પડ્યા છે તેને કોઈ સારી સ્કીમ કે મ્યુચ્યુઅલ ફંડમાં રોકાણ કરવાથી જો તમને 13 કે 14% વળતર મળી શકતું હોય, તો તે પૈસાથી લોન પૂરી કરવાને બદલે તેનું રોકાણ કરવું વધુ સમજદારી છે.
કોઈપણ પર્સનલ લોન માટે દરેક ગ્રાહક પર એક જ નિયમ લાગુ પડતો નથી. સમય પહેલા લોન બંધ કરવી એ ખરાબ બાબત નથી, પરંતુ તે નિર્ણય લેતા પહેલા કેલ્ક્યુલેટર લઈને બેસો. બાકી રહેલી લોનની મુદત, બેન્કના છુપા ચાર્જિસ અને તમારા ઘરના ઈમરજન્સી ફંડની સ્થિતિ ચકાસ્યા પછી જ ફાઈનલ નિર્ણય લો. સ્માર્ટ નાણાકીય આયોજન એ જ છે જેમાં દેવું પણ ઘટે અને હાથમાં રોકડ પણ સચવાયેલી રહે.
MoneyControl News
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.
