LPG New Connection: નવા ગેસ કનેક્શન પર લાગેલો પ્રતિબંધ ક્યારે હટશે? પેટ્રોલિયમ મંત્રાલયે આપ્યું મોટું અપડેટ

LPG New Connection: જો તમે તમારા ઘરમાં નવો LPG ગેસ કનેક્શન લેવાની તૈયારી કરી રહ્યા છો, તો તમારે થોડી વધુ રાહ જોવી પડી શકે છે. પશ્ચિમ એશિયામાં ચાલી રહેલા ભૌગોલિક રાજકીય તણાવ અને ખાસ કરીને હોર્મુઝ સામુદ્રધુનીને લઈને અમેરિકા અને ઈરાન વચ્ચેના યુદ્ધ જેવા માહોલને કારણે, દેશભરમાં નવા ઘરેલુ LPG કનેક્શન આપવા પર કામચલાઉ પ્રતિબંધ લગાવી દેવામાં આવ્યો છે.

ઓઇલ કંપનીઓએ હાલ પૂરતું નવા કનેક્શનનું બુકિંગ બંધ કરી દીધું છે. જાણો આ સ્થિતિ શા માટે ઊભી થઈ અને ક્યારે તમને નવું કનેક્શન મળી શકશે.

માર્ચ 2026 થી નવા કનેક્શન બંધ

ઓઇલ કંપનીઓના જણાવ્યા અનુસાર, માર્ચ 2026 થી 14.2 કિલો વજનવાળા ઘરેલુ ગેસ સિલિન્ડરના નવા કનેક્શન આપવાનું બંધ છે. કેન્દ્રીય પેટ્રોલિયમ મંત્રાલયે સોશિયલ મીડિયા પર સ્થિતિ સ્પષ્ટ કરતા જણાવ્યું છે કે આ એક અસ્થાયી પગલું છે. મંત્રાલયનું હાલનું મુખ્ય લક્ષ્ય એ છે કે જે જૂના અને વર્તમાન ગ્રાહકો છે, તેમને સમયસર ગેસ મળી રહે અને તેમને કોઈ અછતનો સામનો ન કરવો પડે.

કંપનીઓ અત્યારે નવા ગ્રાહકો ઉમેરવાને બદલે જૂના ગ્રાહકોને ગેસ પહોંચાડવા પર પૂરતું ધ્યાન આપી રહી છે. જે કનેક્શન લાંબા સમયથી બંધ છે તેને ફરી સક્રિય કરવાની કામગીરી ચાલી રહી છે. સરકાર ડુપ્લિકેટ અને નકલી ગેસ કનેક્શન પકડી પાડવા માટે ગ્રાહકો પાસે KYC અપડેટ કરાવી રહી છે, જેથી ગેસનો સાચો ઉપયોગ થઈ શકે.

નવું કનેક્શન નથી મળતું તો શું છે વિકલ્પ?

જે લોકોને તાત્કાલિક ગેસની જરૂર છે અને 14.2 કિલોનું કનેક્શન નથી મળી રહ્યું, તેમના માટે કંપનીઓએ બીજો રસ્તો આપ્યો છે. આવા ગ્રાહકો 5 કિલો અથવા 10 કિલોના સિલિન્ડર લઈ શકે છે. મોટા શહેરોમાં 10 કિલોનો FTL સિલિન્ડર સરળતાથી ઉપલબ્ધ છે, જેને બુક કરીને ડિલિવરી મેળવી શકાય છે.

અમેરિકા-ઈરાન વિવાદની ભારત પર શું અસર થઈ?

ભારત પોતાની LPG જરૂરિયાતનો મોટો હિસ્સો વિદેશથી આયાત કરે છે. પહેલા લગભગ 90 ટકા ગેસ હોર્મુઝ સામુદ્રધુનીના રસ્તેથી આવતો હતો. પરંતુ અમેરિકા અને ઈરાનના તણાવને કારણે આ દરિયાઈ માર્ગે સપ્લાય ખોરવાઈ જવાનો ડર છે.

આ સ્થિતિને પહોંચી વળવા ભારતે ઘરઆંગણે ઉત્પાદન વધાર્યું છે અને અમેરિકાથી પણ LPG ખરીદવાનું શરૂ કર્યું છે. જોકે, અમેરિકાથી આવતો ગેસ લાંબો દરિયાઈ રસ્તો કાપીને આવતો હોવાથી તેનો ખર્ચ વધુ આવે છે. 'ધ હિંદુ' ના રિપોર્ટ અનુસાર, FLDI ના જનરલ સેક્રેટરી પવન સોનીએ જણાવ્યું છે કે હાલમાં ગેસની સપ્લાય સ્થિર છે, પરંતુ પશ્ચિમ એશિયાના તણાવને જોતા ભવિષ્યમાં જહાજો કેટલી સરળતાથી ભારત પહોંચશે તે કહેવું મુશ્કેલ છે.

આ પણ વાંચો-'યુવાનોના મનમાં નવા આઈડિયા આવવા જોઈએ', Gen-Z સાથેના ખેલો ઇન્ડિયા સંવાદમાં પીએમ મોદીએ આપ્યો ખાસ સંદેશ