Rail Budget 2026: વેઇટિંગ ટિકિટનું ટેન્શન થશે દૂર? 10,000 નવા કોચ અને સિનિયર સિટીઝન માટે મોટી જાહેરાતની શક્યતા

Rail Budget 2026: આજે દેશભરની નજર નાણામંત્રી નિર્મલા સીતારમણના બજેટ પર ટકેલી છે. નાણામંત્રી આજે સામાન્ય બજેટની સાથે સાથે રેલવે બજેટ 2026-27 પણ રજૂ કરવાના છે. ભલે વર્ષ 2017 થી રેલવે બજેટને સામાન્ય બજેટ સાથે ભેળવી દેવામાં આવ્યું હોય, પરંતુ સામાન્ય મુસાફરો માટે આજે પણ તેની અગત્યતા ઓછી થઈ નથી. શું આ વખતે મુસાફરી સસ્તી થશે? શું સિનિયર સિટીઝન્સને ફરીથી ટિકિટમાં છૂટ મળશે? આવા અનેક સવાલોના જવાબ આજે મળવાના છે.

વેઇટિંગ લિસ્ટની સમસ્યાનો આવશે અંત?

રેલવે મુસાફરોની સૌથી મોટી ફરિયાદ વેઇટિંગ ટિકિટને લઈને હોય છે. સૂત્રોના જણાવ્યા અનુસાર, આ બજેટમાં સરકાર 10,000 નવા જનરલ અને સ્લીપર કોચ બનાવવાની જાહેરાત કરી શકે છે. જો આમ થશે તો સામાન્ય માણસને કન્ફર્મ ટિકિટ મેળવવામાં મોટી રાહત મળશે. આ ઉપરાંત, નવી વંદે ભારત સ્લીપર ટ્રેનો અને સુરક્ષા માટે 'કવચ 4.0' (Kavach 4.0) ટેકનોલોજી પર પણ મોટું એલાન થવાની શક્યતા છે.

એક્સપર્ટ્સ શું માને છે?

એક્સિસ ડાયરેક્ટ મુજબ, રેલવેના મૂડી ખર્ચ (Capex) માં 10 થી 15 ટકાનો વધારો થઈ શકે છે. બજાજ બ્રોકિંગનું માનવું છે કે સરકારનું મુખ્ય ફોકસ મુસાફરોની સુરક્ષા (કવચ સિસ્ટમ), સ્ટેશન રીડેવલપમેન્ટ અને નવી અમૃત ભારત ટ્રેનો પર રહેશે. મોતીલાલ ઓસ્વાલના મતે, ઇન્ફ્રાસ્ટ્રક્ચર અને રેલવે સેક્ટરમાં 8-10 ટકાનો ગ્રોથ જોવા મળી શકે છે, જેનાથી રેલવે સાથે જોડાયેલી કંપનીઓને ફાયદો થશે.

રેલવે બજેટનો ઇતિહાસ અને વિલીનીકરણ

તમને જણાવી દઈએ કે અંગ્રેજોના શાસનકાળમાં 1924-25 માં પહેલીવાર રેલવે બજેટ અલગથી રજૂ કરવામાં આવ્યું હતું. તેનો હેતુ રેલવેની આવક અને ખર્ચનો અલગ હિસાબ રાખવાનો હતો. જોકે, વર્ષ 2017 માં મોદી સરકારે 92 વર્ષ જૂની આ પરંપરા તોડી નાખી. નીતિ આયોગ અને વિવેક દેબરોય સમિતિની ભલામણ બાદ તત્કાલીન નાણામંત્રી અરુણ જેટલીએ રેલવે બજેટને સામાન્ય બજેટમાં સમાવી લીધું હતું. આનો હેતુ 'એક દેશ, એક બજેટ' ની નીતિને અમલમાં મૂકવાનો અને રેલવેને આર્થિક રીતે વધુ સક્ષમ બનાવવાનો હતો.

ભારતીય રેલવેની તાકાત

ભારતીય રેલવે વિશ્વનું ચોથું સૌથી મોટું રેલ નેટવર્ક છે (અમેરિકા, ચીન અને રશિયા પછી). ભારતમાં આશરે 69,000 થી 70,000 કિમીનું રેલવે નેટવર્ક પથરાયેલું છે. દરરોજ 13,000 થી વધુ પેસેન્જર ટ્રેનો દોડે છે અને વાર્ષિક 70 અબજથી વધુ મુસાફરો તેમાં મુસાફરી કરે છે.

ગયા વર્ષે શું મળ્યું હતું?

વર્ષ 2025-26 ના બજેટમાં રેલવે માટે કુલ 2,65,200 કરોડ રૂપિયા ફાળવવામાં આવ્યા હતા. જેમાં સુરક્ષા માટે 1.16 લાખ કરોડ રૂપિયા અને 50 નવી 'નમો ભારત' ટ્રેનો શરૂ કરવા પર ભાર મૂકવામાં આવ્યો હતો. હવે જોવું રહ્યું કે નિર્મલા સીતારમણ આજે તેમના પટારામાંથી રેલવે મુસાફરો માટે કઈ નવી ભેટ કાઢે છે.

આ પણ વાંચો-Budget 2026 Saree Look: 9 બજેટ- 9 સાડીઓ: નિર્મલા સીતારમણનો 'બજેટ લુક' ફરી ચર્ચામાં, જાણો 2019 થી 2026 સુધીના તેમના સાડી કલેક્શનનો અર્થ