Gujarat Budget 2026-27: ખેડૂતો માટે 11,000 કરોડનું રાહત પેકેજ અને ગૌસેવા માટે મોટી જાહેરાતો, જાણો બજેટના મહત્વના મુદ્દા

Gujarat Budget 2026-27: ગુજરાત સરકારે વર્ષ 2026-27ના બજેટમાં કૃષિ અને પશુપાલન ક્ષેત્રને આર્થિક બૂસ્ટ આપવા માટે અનેક મહત્વના નિર્ણયો લીધા છે. ખેડૂતોને આધુનિક ટેકનોલોજી સાથે જોડવા અને સિંચાઈના નીર છેવાડાના ખેતર સુધી પહોંચાડવા માટે બજેટમાં માતબર રકમની જોગવાઈ કરવામાં આવી છે.

ખેડૂતો માટે આર્થિક કવચ

રાજ્યના અંદાજે 33 લાખ ખેડૂતોને સીધો ફાયદો પહોંચાડવા માટે સરકારે 11,000 કરોડથી વધુનું કૃષિ રાહત પેકેજ જાહેર કર્યું છે. ખેડૂતોને ધિરાણ લેવામાં મુશ્કેલી ન પડે તે માટે કિસાન ક્રેડિટ કાર્ડ (KCC) ની વ્યાજ સહાય પેટે 1539 કરોડની ફાળવણી કરવામાં આવી છે.

સિંચાઈ: પાણીની સમસ્યાનો કાયમી ઉકેલ

કચ્છ: સિંચાઈ સુવિધાઓ માટે 1333 કરોડ

સૌરાષ્ટ્ર: 'સૌની' (SAUNI) યોજના માટે 473 કરોડ.

ઉત્તર ગુજરાત: સુજલામ સુફલામ પાઇપલાઇન માટે 1237 કરોડ.

નળકાંઠા: અમદાવાદના અંતરિયાળ વિસ્તારો માટે 958 કરોડ.

ગૌસેવા અને પશુપાલનમાં નવી પહેલ

ગૌવંશના જતન માટે 'ગૌ માતા પોષણ યોજના' અંતર્ગત 500 કરોડ ફાળવીને સરકારે પશુપાલકોની ચિંતા કરી છે. આ ઉપરાંત, પશુપાલકોની આવક વધારવા માટે રાજ્યના 4 ઝોનમાં બાયો CNG પ્લાન્ટ સ્થાપવાની જાહેરાત કરવામાં આવી છે, જે પશુપાલન ક્ષેત્રે ક્રાંતિકારી ડગલું ગણાશે.

ટેકનોલોજી અને સ્માર્ટ ફાર્મિંગ

ખેતીમાં શારીરિક શ્રમ ઘટાડવા અને ઉત્પાદન વધારવા માટે કૃષિ યાંત્રિકીકરણ પર ભાર મુકાયો છે. ટ્રેક્ટર અને હાર્વેસ્ટર જેવા સાધન માટે 1565 કરોડની સહાય જાહેર કરવામાં આવી છે. તેમજ ડાંગર અને તેલીબિયાં જેવા પાકો પર સંશોધન માટે 6 નવા સેન્ટર ઓફ એક્સલન્સ ઊભા કરવામાં આવશે.

આ બજેટ ખેડૂતની આર્થિક સુરક્ષા અને ખેતીના આધુનિકીકરણ વચ્ચે સંતુલન જાળવતું બજેટ છે. સિંચાઈના નેટવર્કને મજબૂત કરીને અને પશુપાલકોને બાયો-સીએનજી જેવા નવા વિકલ્પો આપીને સરકારે ગ્રામીણ અર્થતંત્રને વેગ આપવાનો પ્રયાસ કર્યો છે.

આ પણ વાંચો-Gujarat Budget 2026-27: યાત્રાધામ અંબાજીમાં કાશી જેવો ભવ્ય કોરિડોર અને દાહોદમાં એરપોર્ટ; પ્રવાસન ક્ષેત્રે માસ્ટરસ્ટ્રોક