દેશમાં બનશે 100 નવા એરપોર્ટ: અમદાવાદ બન્યું ભારતનું ત્રીજું 'હબ એન્ડ સ્પોક' એરપોર્ટ, જાણો મુસાફરોને શું મોટો ફાયદો થશે?

ભારતના એવિએશન સેક્ટરમાં એક મોટો અને ઐતિહાસિક બદલાવ આવી રહ્યો છે. કેન્દ્રીય નાગરિક ઉડ્ડયન મંત્રી રામ મોહન નાયડુએ મંગળવારે ગુજરાતના અમદાવાદ એરપોર્ટ પરથી એક મોટી જાહેરાત કરી છે. દેશમાં રીજનલ કનેક્ટિવિટી વધારવા માટે શરૂ કરાયેલી 'ઉડે દેશ કા આમ નાગરિક' યોજના હેઠળ આગામી 10 વર્ષમાં 30,000 કરોડ રૂપિયાના ખર્ચે દેશમાં 100 નવા એરપોર્ટ બનાવવામાં આવશે.

આ કાર્યક્રમ દરમિયાન મંત્રી રામ મોહન નાયડુએ અમદાવાદ એરપોર્ટ પરથી ભારતની ત્રીજી 'હબ એન્ડ સ્પોક' સર્વિસનું પણ ઉદ્ઘાટન કર્યું હતું. આ ખાસ પ્રસંગે ગુજરાતના મુખ્યમંત્રી ભૂપેન્દ્ર પટેલ અને ગૃહ રાજ્યમંત્રી હર્ષ સંઘવી પણ હાજર રહ્યા હતા.

અમદાવાદ બન્યું દેશનું ત્રીજું 'હબ એન્ડ સ્પોક' એરપોર્ટ

તમને જણાવી દઈએ કે, 'હબ એન્ડ સ્પોક' સર્વિસ શરૂ કરનાર વારાણસી દેશનું સૌથી પહેલું એરપોર્ટ હતું. ત્યારબાદ જુલાઈ મહિનામાં અમૃતસર એરપોર્ટ પર આ સુવિધા શરૂ કરવામાં આવી હતી. હવે અમદાવાદ આ લિસ્ટમાં જોડાઈને દેશનું ત્રીજું આવું એરપોર્ટ બની ગયું છે. આ સર્વિસનો મુખ્ય હેતુ દેશના નાના શહેરોમાંથી આવતા મુસાફરોને મોટા એરપોર્ટ સાથે જોડીને તેમને સીધી આંતરરાષ્ટ્રીય ફ્લાઈટની સુવિધા આપવાનો છે.

એવિએશન સેક્ટરમાં 'હબ એન્ડ સ્પોક' એ એક ખૂબ જ લોકપ્રિય મોડલ છે. આ અંતર્ગત કોઈ એક મોટા એરપોર્ટને 'હબ' બનાવવામાં આવે છે, જ્યારે આસપાસના નાના એરપોર્ટને 'સ્પોક' તરીકે ઓપરેટ કરવામાં આવે છે.

માની લો કે, કોઈ મુસાફરે અયોધ્યાથી લંડન જવું છે. અહીં અયોધ્યા એક નાનું 'સ્પોક' એરપોર્ટ છે. મુસાફર અયોધ્યાથી સીધી ફ્લાઈટ લઈને પહેલા 'હબ' એટલે કે અમદાવાદ એરપોર્ટ આવશે. ત્યારબાદ તે જ એરપોર્ટ પરથી કોઈ પણ અગવડ વિના તે લંડનની કનેક્ટિંગ ફ્લાઈટ પકડી શકશે.

દેશમાં એરપોર્ટની સંખ્યા 74થી વધીને 166 થઈ

નાગરિક ઉડ્ડયન મંત્રીએ આંકડા આપતા જણાવ્યું કે, વર્ષ 2014 માં ભારતમાં માત્ર 74 એરપોર્ટ હતા, જે આજે વધીને 166 થઈ ગયા છે. દેશના ઉડ્ડયન ઈતિહાસમાં આ એક મોટો રેકોર્ડ છે. છેલ્લા 12 વર્ષની કામગીરી જોઈએ તો, સરેરાશ દર 40 દિવસે દેશમાં એક નવું એરપોર્ટ કે નવું ટર્મિનલ બનીને તૈયાર થયું છે.

આગામી 10 વર્ષ માટે સરકારનો મેગા પ્લાન

મંત્રીએ ભારપૂર્વક કહ્યું કે, છેલ્લા 12 વર્ષમાં જે વિકાસ થયો છે તે માત્ર એક શરૂઆત છે. આગામી 10 વર્ષમાં 30,000 કરોડ રૂપિયાનું રોકાણ કરીને 100 નવા એરપોર્ટ તૈયાર કરવાનો લક્ષ્યાંક છે. વડાપ્રધાન નરેન્દ્ર મોદીની અધ્યક્ષતામાં કેન્દ્રીય કેબિનેટે માર્ચ મહિનામાં જ 'ઉડાન' યોજનાના નવા ડ્રાફ્ટને મંજૂરી આપી દીધી હતી. આ યોજના નાણાકીય વર્ષ 2026-27 થી 2035-36 એમ 10 વર્ષ માટે લાગુ રહેશે. આ મેગા પ્રોજેક્ટ માટે કેન્દ્ર સરકારના બજેટમાંથી 28,840 કરોડ રૂપિયાની ફાળવણી કરવામાં આવી છે.

આ પણ વાંચો-ભારતનો GDP ગ્રોથ 7.8% કે માત્ર 2.6%? પૂર્વ નાણા સચિવના દાવા પર સરકારે આપ્યો જડબાતોડ જવાબ, જાણો સાચું ગણિત