ભારતમાં યોજાનાર BRICS સંમેલનથી દેશની અર્થવ્યવસ્થાને થશે આ 4 મોટા ફાયદા, એક્સપર્ટ્સે જણાવ્યો માસ્ટરપ્લાન

BRICS summit : નવી દિલ્હીમાં યોજાવા જઈ રહેલું 18મું બ્રિક્સ સંમેલન ભારત માટે માત્ર રાજકીય દ્રષ્ટિએ જ નહીં, પરંતુ આર્થિક રીતે પણ ગેમ-ચેન્જર સાબિત થવા જઈ રહ્યું છે. જાણીતા આર્થિક નિષ્ણાતોના મતે, વૈશ્વિક મંદી અને અનિશ્ચિતતાના આ સમયમાં બ્રિક્સ દેશોનો આ મેળાવડો ભારતીય અર્થવ્યવસ્થાને નવી ઊંચાઈ પર લઈ જશે.

નિષ્ણાતોના મતે, આ શિખર સંમેલનથી ભારતને વેપાર, વિદેશી રોકાણ અને ઊર્જા ક્ષેત્રે નીચે મુજબના મુખ્ય 4 ફાયદાઓ થઈ શકે છે.

1. નવા એક્સપોર્ટ માર્કેટની શોધ

બ્રિક્સ સંગઠનનું વિસ્તરણ ભારત માટે નિકાસના નવા દરવાજા ખોલી રહ્યું છે. રશિયા, ચીન, યુએઈ, સાઉદી અરેબિયા અને આફ્રિકન દેશોમાં ભારતીય સામાન અને સેવાઓની નિકાસ વધારવાની આ એક શાનદાર તક છે. ભલે અમેરિકા દ્વારા લગાવવામાં આવેલા ટેરિફથી સીધી રાહત ન મળે, પરંતુ અન્ય દેશોમાં નિકાસ વધારીને ભારત અમેરિકન બજાર પરની પોતાની નિર્ભરતા ઘણી હદે ઘટાડી શકશે.

ગ્લોબલ ટ્રેડમાં અમેરિકન ડોલરના દબદબાને તોડવા માટે હવે સ્થાનિક ચલણમાં વેપારને ભારે પ્રોત્સાહન આપવામાં આવી રહ્યું છે. રશિયા સાથે રૂપિયામાં વેપાર વધવાથી પેમેન્ટની સમસ્યાઓ દૂર થશે અને ક્રૂડ ઓઈલ સસ્તામાં આયાત કરવામાં મદદ મળશે. આ ઉપરાંત, CBDC (સેન્ટ્રલ બેંક ડિજિટલ કરન્સી) દ્વારા બ્રિક્સ દેશો વચ્ચે ક્રોસ-બોર્ડર પેમેન્ટને વધુ ઝડપી અને સરળ બનાવવાની કામગીરી તેજ કરવામાં આવી છે.

3. ખાડી દેશોમાંથી મસમોટું વિદેશી રોકાણ

સાઉદી અરેબિયા અને યુએઈ જેવા નવા અને આર્થિક રીતે મજબૂત સભ્ય દેશોના જોડાવાથી ભારતમાં સીધું વિદેશી રોકાણ વધવાની પૂરી શક્યતાઓ છે. નિષ્ણાતો માને છે કે, આ ખાડી દેશો ભારતના ઇન્ફ્રાસ્ટ્રક્ચર, એનર્જી, લોજિસ્ટિક્સ અને મેન્યુફેક્ચરિંગ સેક્ટરમાં મોટું મૂડી રોકાણ કરવા માટે ભારે ઉત્સુક છે.

4. ભારતની ઊર્જા સુરક્ષા થશે મજબૂત

બ્રિક્સ સમૂહમાં હવે રશિયા, સાઉદી અરેબિયા અને યુએઈ જેવા દુનિયાના સૌથી મોટા તેલ ઉત્પાદક દેશો સામેલ છે. આ દેશો સાથે ભારતના મજબૂત વ્યાપારી અને રાજદ્વારી સંબંધો દેશની લાંબા ગાળાની ઊર્જા સુરક્ષાને અકબંધ રાખવા માટે અત્યંત ફાયદાકારક સાબિત થશે.

શું બ્રિક્સની પોતાની કોઈ નવી કરન્સી આવશે?

બજારમાં ચાલતી અટકળો વચ્ચે આર્થિક નિષ્ણાતોએ સ્પષ્ટ કર્યું છે કે હાલમાં બ્રિક્સ દેશોની પોતાની કોઈ 'કોમન કરન્સી' લોન્ચ થવાની શક્યતા નહિવત્ છે. અત્યારે તમામ સભ્ય દેશોનું પૂરું ધ્યાન માત્ર પોતપોતાના સ્થાનિક ચલણમાં વેપાર કરવા અને ડિજિટલ પેમેન્ટ સિસ્ટમને વધુ મજબૂત બનાવવા પર કેન્દ્રિત છે.

આ પણ વાંચો-PF Withdrawal : ઇમરજન્સીમાં પીફમાંથી કેટલા રૂપિયા ઉપાડી શકાય? નોકરિયાતો માટે EPFOના નવા નિયમો જાણી લો