વાહનચાલકો અને ખેડૂતો માટે મોટા સમાચાર: E22થી E30 ઇથેનોલવાળા પેટ્રોલ પરથી એક્સાઇઝ ડ્યુટી સંપૂર્ણ માફ

Excise Duty Petrol Waived: પશ્ચિમ એશિયામાં અમેરિકા અને ઇરાન વચ્ચે ભડકેલા યુદ્ધની સીધી અસર આખી દુનિયા પર પડી રહી છે. વૈશ્વિક ઊર્જાના મુખ્ય માર્ગ ગણાતી 'હોર્મુઝ સ્ટ્રેટ' માંથી ક્રૂડ ઓઇલ અને ગેસનો સપ્લાય ખોરવાઈ ગયો છે. એશિયાથી લઈને યુરોપ સુધી ઇંધણની મોટી અછત ઊભી થવાનો ડર છે. આ વૈશ્વિક સંકટ વચ્ચે ભારતે પોતાની 'એનર્જી સિક્યોરિટી' (ઊર્જા સુરક્ષા) સુનિશ્ચિત કરવા માટે એક બહુ મોટો અને ઐતિહાસિક નિર્ણય લીધો છે. કેન્દ્ર સરકારે પેટ્રોલમાં વધુ ઇથેનોલના મિશ્રણને પ્રોત્સાહન આપવા માટે તેના પર લાગતી સેન્ટ્રલ એક્સાઇઝ ડ્યુટી સંપૂર્ણપણે નાબૂદ કરી દીધી છે.

E22થી E30 પેટ્રોલ પર હવે કોઈ ટેક્સ નહીં

સરકાર દ્વારા સત્તાવાર ગેઝેટ નોટિફિકેશન બહાર પાડવામાં આવ્યું છે. આ નવા નિયમ મુજબ, હવે 22 ટકાથી લઈને 30 ટકા સુધી ઇથેનોલ બ્લેન્ડેડ (મિશ્રિત) પેટ્રોલ પર લાગતી તમામ એક્સાઇઝ ડ્યુટી અને સેસ (ઉપકર) માંથી સંપૂર્ણ મુક્તિ આપવામાં આવી છે. અત્યાર સુધી સરકાર E20 (20 ટકા ઇથેનોલ મિશ્રિત) પેટ્રોલના ઉપયોગ પર ભાર મૂકી રહી હતી. પરંતુ હવે E22, E25, E27 અને E30 શ્રેણીના ગ્રીન પેટ્રોલ પર શૂન્ય ટેક્સ લાગશે. આ પગલાથી દેશમાં ગ્રીન ફ્યુઅલના ઉપયોગને જબરદસ્ત વેગ મળશે.

સામાન્ય ગ્રાહકોને રાહત: આંતરરાષ્ટ્રીય બજારમાં ક્રૂડ ઓઇલના ભાવ આસમાને પહોંચી રહ્યા છે. પરંતુ સરકારે ટેક્સ માફ કરતા, સ્થાનિક બજારમાં પેટ્રોલ અને ડીઝલના ભાવને સ્થિર રાખવામાં મોટી મદદ મળશે. વાહનચાલકોને મોંઘવારીનો સીધો માર સહન કરવો પડશે નહીં.

ખેડૂતોની આવકમાં બમ્પર વધારો: ઇથેનોલ એક બાયોફ્યુઅલ છે, જે મુખ્યત્વે શેરડી, મકાઈ અને અન્ય ખેત પેદાશોમાંથી બનાવવામાં આવે છે. પેટ્રોલમાં ઇથેનોલની માંગ વધવાથી દેશના ખેડૂતોને તેમના પાકના સારા ભાવ મળશે અને સીધો આર્થિક ફાયદો થશે.

આયાત પરની નિર્ભરતા ઘટશે: ભારત દુનિયાનો ત્રીજો સૌથી મોટો ક્રૂડ ઓઇલ આયાતકાર દેશ છે. જો પેટ્રોલમાં 30 ટકા સુધી ઇથેનોલ ભળશે, તો વિદેશથી મંગાવાતા મોંઘા ઓઇલ પરની આપણી નિર્ભરતા ઘણી ઓછી થઈ જશે. પરિણામે દેશનું કિંમતી વિદેશી હૂંડિયામણ બચશે અને અર્થતંત્ર મજબૂત બનશે.

ઓટોમોબાઈલ કંપનીઓ માટે નવો પડકાર

આ નિર્ણય દેશ માટે ગેમ-ચેન્જર સાબિત થશે, પરંતુ નિષ્ણાતોનું માનવું છે કે 30 ટકા ઇથેનોલવાળું પેટ્રોલ હાલના તમામ વાહનોમાં સીધું વાપરી શકાશે નહીં. આ માટે ઓટોમોબાઈલ કંપનીઓએ એડવાન્સ ટેક્નોલોજીવાળા ‘Flex-Fuel Engines' (ફ્લેક્સ-ફ્યુઅલ એન્જિન) બનાવવા પડશે, જે E30 પેટ્રોલ પર સરળતાથી ચાલી શકે. વાહન ઉત્પાદકોએ હવે આ દિશામાં ઝડપથી કામ કરવું પડશે.

કેન્દ્ર સરકારનો આ નિર્ણય માત્ર પર્યાવરણને જ શુદ્ધ નહીં કરે, પરંતુ વૈશ્વિક ક્રૂડ ઓઇલની વધઘટ સામે ભારત માટે એક મજબૂત કવચનું કામ કરશે. આનાથી ખેડૂતથી લઈને સામાન્ય નાગરિક સુધી તમામને લાંબા ગાળે મોટો ફાયદો થવાની પૂરી શક્યતા છે.

આ પણ વાંચો - Stocks to Watch: સેન્સેક્સની એક્સપાયરી, બે લિસ્ટીંગ અને Lenskart, PNB અને Meesho સહિતના શેર્સ પર રહેશે ખાસ નજર