Federal Reserve: ફેડરલ રિઝર્વ આજે વધારી શકે છે 0.25% વ્યાજદર, ભારતીય શેરબજાર પર પડશે સીધી અસર

Federal Reserve: અમેરિકાની મધ્યસ્થ બેંક 'ફેડરલ રિઝર્વ' આજે ઈન્ટરેસ્ટ રેટમાં વધારો કરી શકે છે. રોઇટર્સના એક પોલમાં સામેલ મોટાભાગના અર્થશાસ્ત્રીઓનું માનવું છે કે અમેરિકી સેન્ટ્રલ બેંક વ્યાજદરમાં વધારો કરશે. હવે સૌથી મોટો સવાલ એ છે કે જો અમેરિકામાં વ્યાજદર વધે છે, તો દલાલ સ્ટ્રીટ એટલે કે ભારતીય શેરબજાર પર તેની કેવી અને કેટલી અસર પડશે?

આજે રાત્રે 12 વાગ્યા સુધીમાં આવશે ફેડનો નિર્ણય

ફેડરલ રિઝર્વ વ્યાજદર અંગે શું નિર્ણય લેશે તેનું ચિત્ર આજે 16 સપ્ટેમ્બરના રોજ સ્પષ્ટ થઈ જશે. ભારતીય સમય અનુસાર રાત્રે 11:30 થી 12 વાગ્યા સુધીમાં આ સત્તાવાર જાહેરાત થઈ શકે છે.

જો ફેડરલ રિઝર્વ ઈન્ટરેસ્ટ રેટ વધારશે, તો અમેરિકી ડોલરવધુ મજબૂત બનશે.

બોન્ડ યીલ્ડમાં વધારો થશે અને શેરબજારોમાં ભારે ઉતાર-ચઢાવ જોવા મળશે. નોંધનીય છે કે બજારનું સેન્ટિમેન્ટ પહેલાથી જ થોડું નબળું દેખાઈ રહ્યું છે.

0.25% વ્યાજદર વધવાની પૂરી શક્યતા

એનરિચ મનીના ફાઉન્ડર અને CEO પોનમુદી આર. ના જણાવ્યા અનુસાર, આજે વ્યાજદર વધવાની શક્યતા ખૂબ વધારે છે. ભારતીય શેરબજાર 25 બેસિસ પોઈન્ટ (0.25%) ના વધારાને સરળતાથી પચાવી શકે છે. કારણ કે, બજાર પર તેની અસર પહેલાથી જ જોવા મળી રહી છે. પરંતુ, બજારમાં અસમંજસ એ વાતની છે કે વ્યાજદરને લઈને ફેડરલ રિઝર્વનું ભવિષ્યનું વલણ કેવું રહેશે.

ફેડરલ રિઝર્વના 'ફ્યુચર ગાઇડન્સ' પર રહેશે બજારની નજર

નિષ્ણાતો માને છે કે ભારતીય બજાર માટે 0.25% નો વધારો ચિંતાનો વિષય નથી, પરંતુ ફેડરલ રિઝર્વ આગળ માટે શું કોમેન્ટ્રી (ગાઇડન્સ) આપે છે તે સૌથી મહત્વપૂર્ણ છે. ફેડની જાહેરાત બાદ અમેરિકી બોન્ડ યીલ્ડ કઈ દિશામાં જાય છે, તેના પર રોકાણકારોની નજર રહેશે.

વિદેશી રોકાણકારોના રોકાણ પર પડશે અસર

જો ફેડરલ રિઝર્વ એવા સંકેત આપે છે કે ફુગાવો લાંબા સમય સુધી ઊંચા સ્તરે રહેશે અને ભવિષ્યમાં પણ વ્યાજદર વધતા રહેશે, તો તેની સીધી અસર વિદેશી ફંડોના રોકાણ પર પડશે.

બોન્ડ યીલ્ડમાં ઉછાળો અને ડોલરની મજબૂતીના કારણે વિદેશી રોકાણકારો ભારતીય બજારોમાંથી અંતર જાળવી શકે છે.તેની સૌથી વધુ નકારાત્મક અસર હાઈ-બીટા અને રેટ સેન્સેટિવ સેક્ટર્સ (જેવા કે બેન્કિંગ, ઓટો અને રિયલ એસ્ટેટ) પર જોવા મળશે.

અમેરિકી બોન્ડ યીલ્ડમાં ઉછાળો વધારશે ભારતીય બજારનું ટેન્શન

હાલમાં ભારતની ઈકોનોમી ખૂબ મજબૂત છે, પરંતુ વિદેશી રોકાણકારો ભારતીય બજારમાં વધુ રસ દાખવી રહ્યા નથી. આ ઉપરાંત, ક્રૂડ ઓઈલના ભાવ ઊંચા સ્તરે છે અને રૂપિયો પણ સતત દબાણ હેઠળ છે.

સૌથી મોટી ચિંતા એ છે કે 10 વર્ષના અમેરિકી બોન્ડની યીલ્ડ 5 ટકાના સ્તરે પહોંચી ગઈ છે. જો અમેરિકી બોન્ડ યીલ્ડ નીચે નહીં આવે અને હજુ વધશે, તો ભારતીય શેરબજાર પર દબાણ નોંધપાત્ર રીતે વધી શકે છે. રોકાણકારોએ આજે રાત્રે આવનારા ફેડના નિર્ણય અને આવતીકાલે સવારે ખૂલતા બજાર પર ચાંપતી નજર રાખવી પડશે.

આ પણ વાંચો-લાંબાગાળાના રોકાણકારોએ સારા વેલ્યુએશન જોઇને રોકાણ કરવું જોઇએ- દેવર્ષ વકીલ