Dixon Tech Share Price: Vivo સાથેના જોઈન્ટ વેન્ચરને સરકારની લીલી ઝંડી, શેરમાં 4%નો ઉછાળો, જાણો નવા ટાર્ગેટ

Dixon Tech Share Price: શેરબજારમાં ઈલેક્ટ્રોનિક્સ મેન્યુફેક્ચરિંગ સેક્ટરની દિગ્ગજ કંપની ડિક્સન ટેકનોલોજીસ (Dixon Technologies) ના શેરમાં જબરદસ્ત એક્શન જોવા મળી રહ્યું છે. તાજેતરમાં શુક્રવારે BSE પર કંપનીનો શેર 4% ઉછળીને 14,026.70 રૂપિયાના હાઈ લેવલ પર પહોંચી ગયો હતો. જોકે, દિવસના અંતે તેમાં થોડો ઘટાડો નોંધાયો હતો. આ તેજી પાછળનું મુખ્ય કારણ ચીની સ્માર્ટફોન કંપની Vivo India સાથેના જોઈન્ટ વેન્ચર (JV) ને મળેલી સરકારી મંજૂરી છે.

ભારત સરકાર દ્વારા 'પ્રેસ નોટ 3' હેઠળ આ ભાગીદારીને મંજૂરી મળી ગઈ છે, જેની બજાર લાંબા સમયથી રાહ જોઈ રહ્યું હતું. ડિક્સન માટે આ એક બહુ મોટી વ્યૂહાત્મક જીત (Strategic Win) માનવામાં આવે છે.

શું છે Dixon અને Vivo ની ડીલ?

આ નવું જોઈન્ટ વેન્ચર હજુ સત્તાવાર રીતે રજીસ્ટર થવાનું બાકી છે. આ ભાગીદારીમાં બેઝિક માળખું નીચે મુજબ રહેશે:

શરૂઆતી મૂડી: આ પ્રોજેક્ટ 5 કરોડ રૂપિયાની પ્રારંભિક પેડ-અપ કેપિટલ (Paid-up Capital) સાથે શરૂ થશે.

કામગીરી: આ JV સ્માર્ટફોન અને અન્ય ઈલેક્ટ્રોનિક ગેજેટ્સ માટે ઓરિજિનલ ઇક્વિપમેન્ટ મેન્યુફેક્ચરર (OEM) તરીકે કામ કરશે.

JVથી કેટલી કમાણીની અપેક્ષા છે?

ડિક્સન ટેકનોલોજીસને આ ભાગીદારીથી ભવિષ્યમાં લગભગ 30,000 કરોડ રૂપિયાનું રેવેન્યુ મળવાનો અંદાજ છે. સરકારી મંજૂરી મળ્યા બાદ હવે આગામી 60 થી 90 દિવસમાં કામકાજ શરૂ થવાની વકી છે. જેનો સીધો અર્થ એ છે કે ઓક્ટોબર-ડિસેમ્બર 2026 ના ક્વાર્ટરથી આ JVનું સત્તાવાર પ્રોડક્શન શરૂ થઈ શકે છે.

નોંધનીય છે કે, Vivo ભારતમાં દર વર્ષે આશરે 3.5 કરોડ સ્માર્ટફોન વેચે છે. મેનેજમેન્ટને આશા છે કે નાણાકીય વર્ષ 2027 માં ડિક્સન લગભગ 60 લાખ Vivo ફોન બનાવશે, જે આંકડો વર્ષ 2028 માં વધીને 2 કરોડ યુનિટ થઈ જશે. સૌથી મોટો ફાયદો એ છે કે ડિક્સનની હાલની કમાણી કરતા Vivo ના પ્રોડક્ટ્સમાંથી 20 થી 30% વધુ કમાણી થશે, જેનાથી કંપનીના નફા (Margin) માં જંગી ઉછાળો આવશે.

બ્રોકરેજ ફર્મ્સ થયા બુલિશ, જાણો નવા ટાર્ગેટ પ્રાઈસ:

આ સમાચાર આવતાની સાથે જ મોટા બ્રોકરેજ હાઉસે ડિક્સન ટેકના શેરમાં પોતાના ટાર્ગેટ વધાર્યા છે.

JPMorgan: આ ગ્લોબલ બ્રોકરેજે ડિક્સનના શેરનો ટાર્ગેટ 14,300 રૂપિયાથી વધારીને સીધો 16,700 રૂપિયા કરી દીધો છે. તેમના અંદાજ મુજબ વર્ષ 2027 માં ડિક્સનનું કુલ સ્માર્ટફોન પ્રોડક્શન 4.3 થી 4.4 કરોડ યુનિટ સુધી પહોંચી જશે.

Motilal Oswal: આ ડોમેસ્ટિક બ્રોકરેજે પણ શેરમાં 'Buy' રેટિંગ જાળવી રાખીને ટાર્ગેટ પ્રાઈસ વધારીને 16,100 રૂપિયા કર્યો છે. તેમનું માનવું છે કે ભારતના એન્ડ્રોઇડ સ્માર્ટફોન માર્કેટમાં Vivo નો હિસ્સો લગભગ 23% છે, અને તેમાંથી 67% પ્રોડક્શન આ નવા JV દ્વારા થશે. સાથે જ PLI 2.0 સ્કીમ કંપની માટે પોઝિટિવ સાબિત થશે.

UBS: બ્રોકરેજે શેરમાં 'Buy' રેટિંગ સાથે 13,700 રૂપિયાનો ટાર્ગેટ આપ્યો છે. રિપોર્ટ મુજબ કેલેન્ડર વર્ષ 2025 માં Vivo લગભગ 3.2 કરોડ સ્માર્ટફોન વેચે તેવી શક્યતા છે, જેનો મોટો ફાયદો ડિક્સનને મળશે.

Equirus & Phillip Capital: ઇક્વિરસ માને છે કે આ ડીલ કંપનીના ગ્રોથ માટે ગેમ-ચેન્જર છે. જોકે, ફિલિપ કેપિટલે શેરમાં 'Sell' રેટિંગ જાળવી રાખ્યું છે, કારણ કે તેમના મતે આ ડીલની પોઝિટિવ અસર શેરના ભાવમાં પહેલેથી જ આવી ગઈ છે.

Dixon Techનો શેર શેરબજારમાં શાનદાર પ્રદર્શન કરી રહ્યો છે. માત્ર છેલ્લા 3 મહિનામાં જ આ શેરે રોકાણકારોને 25% જેટલું શાનદાર રિટર્ન આપ્યું છે. હાલમાં કંપનીનું કુલ માર્કેટ કેપિટલાઇઝેશન (Market Cap) 82,000 કરોડ રૂપિયાને પાર કરી ગયું છે. સ્માર્ટફોન સેક્ટરમાં 'મેક ઇન ઇન્ડિયા' હેઠળ આ કંપની ભવિષ્યમાં પણ મોટી છલાંગ લગાવી શકે છે.

આ પણ વાંચો - Oracle Financial Share: 2026માં 52 સપ્તાહની ઊંચાઈ પર પહોંચેલો એકમાત્ર IT શેર, 6 મહિનામાં 50% રિટર્ન, જાણો રોકાણની તક છે કે નહીં?

Disclaimer: મનીકંટ્રોલ.કોમ પર આપવામાં આવેલી સલાહ કે વિચારો એક્સપર્ટ/બ્રોકરેજ ફર્મના અંગત મંતવ્યો છે. વેબસાઇટ કે તેનું મેનેજમેન્ટ તેના માટે જવાબદાર નથી. યુઝર્સને મનીકંટ્રોલ દ્વારા સલાહ આપવામાં આવે છે કે કોઈપણ રોકાણનો નિર્ણય લેતા પહેલા હંમેશા પ્રમાણિત નિષ્ણાતની સલાહ લેવી.