Lenskart Q1 Results: નફામાં 270%નો તોતિંગ ઉછાળો, આવક 2714 કરોડે પહોંચી, જાણો લેટેસ્ટ ડિટેલ્સ

Lenskart Q1 Results: ભારતની દિગ્ગજ આઈવિયર બ્રાન્ડ Lenskart એ પ્રથમ ત્રિમાસિક ગાળામાં (Q1) ધમાકેદાર પ્રદર્શન કર્યું છે. જૂન ક્વાર્ટરમાં કંપનીના નફા અને આવકમાં જંગી ઉછાળો જોવા મળ્યો છે. કંપની માત્ર ભારતમાં જ નહીં, પરંતુ આંતરરાષ્ટ્રીય બજારોમાં પણ ઝડપથી પોતાનો વ્યાપ વધારી રહી છે. આવો જાણીએ કંપનીના લેટેસ્ટ રિઝલ્ટ અને બિઝનેસ ગ્રોથની સંપૂર્ણ માહિતી.

નફા અને આવકમાં મોટો ઉછાળો

Lenskart Solutions એ નાણાકીય વર્ષની પ્રથમ ત્રિમાસિકમાં શાનદાર આંકડા રજૂ કર્યા છે. કંપનીનો ચોખ્ખો નફો વાર્ષિક ધોરણે 270% વધીને સીધો 222 કરોડ પર પહોંચી ગયો છે. નોંધનીય છે કે ગયા વર્ષે આ જ સમયગાળામાં કંપનીનો નફો માત્ર 60 કરોડ હતો.

આવકની વાત કરીએ તો તેમાં 43.3% નો વધારો થયો છે અને તે 2,714.2 કરોડ નોંધાઈ છે, જે ગયા વર્ષે 1,894.5 કરોડ હતી. કંપનીનું EBITDA પણ 75.1% ના ઉછાળા સાથે 588.5 કરોડ રહ્યું છે અને EBITDA માર્જિન 17.7% થી સુધરીને 21.7% થઈ ગયું છે.

લેન્સકાર્ટના PAT માર્જિનમાં પણ બમણો વધારો થયો છે, જે 4%થી વધીને 8.4% પર પહોંચી ગયું છે. કંપનીના ઇતિહાસમાં પહેલીવાર કોન્સોલિડેટેડ પ્રોડક્ટ માર્જિન 70% નો આંકડો પાર કરીને 70.3% નોંધાયું છે. ભારતમાં પ્રોડક્ટ માર્જિન 64.2% રહ્યું છે. કંપનીના જણાવ્યા અનુસાર, ઇન-હાઉસ મેન્યુફેક્ચરિંગ અને પ્રીમિયમ પ્રોડક્ટ્સના ધૂમ વેચાણથી આ ફાયદો થયો છે.

નવા સ્ટોર્સ અને Lenskart Goldનો જલવો

ભારતમાં કંપનીનું વેચાણ અને સ્ટોર્સની સંખ્યા સતત વધી રહી છે. સમાન સ્ટોર સેલ્સ 18.3% રહ્યું, જ્યારે પ્રતિ સ્ટોર વેચાણમાં 24.3% નો વધારો થયો. પ્રથમ ક્વાર્ટરમાં કંપનીએ કુલ 132 નવા સ્ટોર ખોલ્યા, જેમાંથી 116 માત્ર ભારતમાં જ ખૂલ્યા છે. ભારતમાં 50 નવા શહેરોમાં કંપનીએ એન્ટ્રી કરી છે, જેમાં 83 સ્ટોર ટિયર-2 અને નાના શહેરોમાં ખોલવામાં આવ્યા છે. આ સાથે કંપનીના કુલ એક્ટિવ સ્ટોર્સની સંખ્યા 3,459 થઈ ગઈ છે. Lenskart Gold સબસ્ક્રિપ્શન લેનારા મેમ્બર્સની સંખ્યા 93.5 લાખ પર પહોંચી છે, જેનાથી કંપનીને 66 કરોડની કમાણી થઈ છે.

આંખોની તપાસમાં પણ રેકોર્ડ બ્રેક વધારો

આ ત્રિમાસિક ગાળામાં કંપનીએ કુલ 70 લાખ લોકોના આઈ ટેસ્ટ કર્યા છે, જેમાં 39.8% નો વધારો નોંધાયો છે. માત્ર ભારતમાં જ 60 લાખ લોકોની આંખો તપાસવામાં આવી, જેમાંથી અડધા લોકો એવા હતા જેમણે પહેલીવાર આંખની તપાસ કરાવી હોય. ભારતમાં ચશ્માની સરેરાશ વેચાણ કિંમત 6.4% વધીને 1,856 થઈ છે.

ઇન્ટરનેશનલ માર્કેટમાં 38%નો ગ્રોથ

કંપનીના ઇન્ટરનેશનલ બિઝનેસની આવક 38% વધીને 1,203 કરોડ થઈ ગઈ છે. જાપાન, સાઉથ-ઈસ્ટ એશિયા અને મિડલ ઈસ્ટના દેશોમાં કંપનીને જબરદસ્ત રિસ્પોન્સ મળી રહ્યો છે. આંતરરાષ્ટ્રીય સ્તરે આઈવિયર વોલ્યુમમાં 37.6% નો વધારો જોવા મળ્યો છે.

ચીનની કંપનીમાં હિસ્સેદારી વધારશે

Lenskart હવે ચીનની જોઇન્ટ વેન્ચર કંપની Framekart માં પોતાનો હિસ્સો 51% થી વધારીને 70% કરવા જઈ રહી છે. આ ડીલ પાછળ અંદાજે 10.6 કરોડનો ખર્ચ થશે. ઉલ્લેખનીય છે કે, લેન્સકાર્ટની 30% થી વધુ જરૂરિયાતોનું ઉત્પાદન Framekart જ કરે છે. આ ઉપરાંત, કંપની સાઉથ કોરિયામાં OWNDAYS Korea શરૂ કરવાની અને ચીનમાં નવી સબસિડિયરી બનાવવાની પણ તૈયારી કરી રહી છે.

શેરબજારમાં સ્થિતિ

લેટેસ્ટ આંકડા મુજબ, Lenskartનો શેર 585ની આસપાસ ટ્રેડ થઈ રહ્યો છે. છેલ્લા 6 મહિનામાં આ સ્ટોકે 14.04% અને 1 વર્ષમાં 45.13% નું શાનદાર રિટર્ન આપ્યું છે. હાલમાં કંપનીનું કુલ માર્કેટ કેપ 1.02 લાખ કરોડ છે. Lenskartના આ તાજેતરના પરિણામો સ્પષ્ટ કરે છે કે કંપનીની બિઝનેસ સ્ટ્રેટેજી એકદમ સચોટ દિશામાં જઈ રહી છે. નાના શહેરોમાં વિસ્તરણ અને વિદેશી બજારોમાં રોકાણ આવનારા સમયમાં કંપનીને વધુ મજબૂત બનાવશે.

આ પણ વાંચો - Market Outlook: ઘટાડા સાથે બંધ થયા સેન્સેક્સ-નિફ્ટી, જાણો 13 ઓગસ્ટના રોજ કેવી રહેશે બજારની ચાલ

ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.