ChatGPTની પેરેન્ટ કંપની OpenAI અને એલોન મસ્કની કંપની SpaceX વચ્ચેની ભાગીદારીમાં ખટાશ વધતી જોવા મળી રહી છે. Reutersના અહેવાલ અનુસાર, OpenAI તેની AI સર્વિસનો ઍક્સેસ SpaceXની કોડિંગ-ટૂલ કંપની Cursor માટે બંધ કરવાની યોજના બનાવી રહી છે. આ નિર્ણયથી OpenAIના CEO સેમ ઓલ્ટમેન અને એલોન મસ્ક વચ્ચે લાંબા સમયથી ચાલી રહેલો વિવાદ વધુ વકરી શકે છે.
OpenAI અને SpaceX વચ્ચે વિવાદ, AI સર્વિસિસનો કોન્ટ્રાક્ટ જોખમમાં
OpenAI અને Elon Muskની SpaceX વચ્ચેની ભાગીદારી પર ફરી સંકટ ઊભું થયું છે. Reutersના અહેવાલ મુજબ, OpenAI SpaceXની માલિકીની Cursorને પોતાના AI મોડલ્સનો ઍક્સેસ 12 નવેમ્બર 2026 સુધીમાં બંધ કરી શકે છે. OpenAIએ ટેક્નોલોજીના ઉપયોગ અંગે વિશ્વાસનો અભાવ હોવાનું કારણ આપ્યું છે. આ ઘટનાથી Musk અને OpenAI CEO Sam Altman વચ્ચેનો જૂનો વિવાદ વધુ વકરી શકે છે.
અપડેટેડ 01:54:24 PM Aug 29, 2026 પર
OpenAI અને SpaceX વચ્ચે ફરી વધ્યો વિવાદ, Cursorની AI સર્વિસ બંધ થવાની શક્યતા
જૂનમાં SpaceXએ Cursor બનાવનાર સ્ટાર્ટઅપ Anysphereને લગભગ $6,000 કરોડની ઓલ-સ્ટોક ડીલમાં ખરીદવાની જાહેરાત કરી હતી. આ અધિગ્રહણ આ મહિનાની શરૂઆતમાં પૂર્ણ થયું છે.
Cursorની AI સર્વિસ કેમ બંધ થઈ શકે?
OpenAIએ એક બ્લોગ પોસ્ટમાં જણાવ્યું છે કે Cursorને પોતાના AI મોડલ્સનો ઍક્સેસ બંધ કરવાનો નિર્ણય એટલા માટે લેવામાં આવી રહ્યો છે કારણ કે કંપનીને વિશ્વાસ નથી કે SpaceX તેની ટેક્નોલોજીનો ઉપયોગ નક્કી કરાયેલી શરતો અનુસાર કરશે.
OpenAIએ આ અવિશ્વાસ પાછળ એલોન મસ્કની કંપનીઓ દ્વારા OpenAI સાથે કરવામાં આવેલા કોન્ટ્રાક્ટની શરતોના કથિત ઉલ્લંઘનના અગાઉના અનુભવનો ઉલ્લેખ કર્યો છે.
બીજી તરફ, Cursorના કો-ફાઉન્ડર માઇકલ ટ્રુએલનું કહેવું છે કે તેઓ OpenAIના શરૂઆતના યુઝર્સમાંથી એક રહ્યા છે. હાલની સમસ્યાનો ઉકેલ લાવવા માટે તેઓ OpenAIની ટીમ સાથે વાતચીત કરી રહ્યા છે.
OpenAIના જણાવ્યા અનુસાર, SpaceX જેવી મોટી કંપનીઓ સાથે કામ કરવા માટે ખાસ પ્રકારના કોન્ટ્રાક્ટ હોય છે. તેમાં AI ટેક્નોલોજીનો મોટા પાયે અને સુરક્ષિત રીતે ઉપયોગ થાય તે માટે કેટલીક શરતો નક્કી કરવામાં આવે છે.
કંપનીના જણાવ્યા અનુસાર, Cursor માટેની OpenAI સર્વિસ 12 નવેમ્બર 2026 સુધીમાં બંધ થઈ શકે છે. OpenAIએ જણાવ્યું છે કે Cursor સાથેના કરારમાં માલિકીમાં ફેરફાર થયા બાદ ચોક્કસ સમયગાળામાં કોન્ટ્રાક્ટ રદ કરવાનો અધિકાર આપવામાં આવ્યો છે.
Elon Musk vs Sam Altman: વર્ષોથી ચાલી રહ્યો છે વિવાદ
એલોન મસ્ક અને સેમ ઓલ્ટમેન વચ્ચેનો વિવાદ નવો નથી. બંને વચ્ચે છેલ્લા ઘણા વર્ષોથી મતભેદ ચાલી રહ્યા છે અને આ મામલો કોર્ટ સુધી પણ પહોંચી ચૂક્યો છે.
કોર્ટની કાર્યવાહી દરમિયાન મસ્કના વકીલે દલીલ કરી હતી કે મસ્ક અને અન્ય સાક્ષીઓએ ઓલ્ટમેનની વિશ્વસનીયતા અંગે ગંભીર સવાલો ઉઠાવ્યા છે. બીજી તરફ, OpenAIએ આરોપ લગાવ્યો હતો કે મસ્ક કંપની પર નિયંત્રણ મેળવવા માગતા હતા.
એલોન મસ્કે OpenAI વિરુદ્ધ આશરે $15,000 કરોડનો કેસ પણ દાખલ કર્યો હતો. મસ્કે OpenAI અને સેમ ઓલ્ટમેન પર આરોપ મૂક્યો હતો કે તેમણે પોતાના ફાયદા માટે કંપનીના મૂળ નોન-પ્રોફિટ મિશન સાથે છેતરપિંડી કરી અને ચેરિટી પર કબજો કર્યો.
જોકે, આ વર્ષે શરૂઆતમાં ફેડરલ જ્યુરીએ મસ્ક વિરુદ્ધ નિર્ણય આપ્યો હતો અને જણાવ્યું હતું કે તેમણે આ કેસ દાખલ કરવામાં ઘણો સમય લગાવી દીધો હતો.
હવે Cursorને OpenAIની AI સર્વિસનો ઍક્સેસ બંધ કરવાની સંભાવનાએ OpenAI અને Elon Musk વચ્ચેના જૂના વિવાદને ફરી ચર્ચામાં લાવી દીધો છે.
MoneyControl News
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.
