CSM Technologies IPO: 24 જૂને ખુલી રહ્યો છે આ નવો આઈપીઓ, રોકાણ કરવું કે નહીં? જાણો પ્રાઇસ બેન્ડ સહિતની વિગતો

CSM Technologies IPO: શેરબજારના રોકાણકારો માટે વધુ એક કમાણીની તક આવી ગઈ છે. ગોવ-ટેક અને ડિજિટલ ટ્રાન્સફોર્મેશન ક્ષેત્રની જાણીતી કંપની સીએસએમ ટેકનોલોજીસનો આઈપીઓ 24 જૂન, બુધવારથી સબસ્ક્રિપ્શન માટે ખુલી રહ્યો છે. જો તમે પણ શેર બજારમાં પૈસા લગાવવાનું વિચારી રહ્યા છો, તો આ આઈપીઓ અંગેની આ જરૂરી વિગતો તમારે ખાસ જાણવી જોઈએ.

આઈપીઓની મુખ્ય વિગતો અને પ્રાઇસ બેન્ડ

આ આઈપીઓ 24 જૂનથી શરૂ થઈને 29 જૂન સુધી ખુલ્લો રહેશે. કંપની આ ઈશ્યુ દ્વારા બજારમાંથી 146 કરોડ રૂપિયા એકત્ર કરવા જઈ રહી છે. ખાસ નોંધવા જેવી વાત એ છે કે આ આઈપીઓમાં કોઈ ઓફર ફોર સેલ (OFS) નથી. આનો સીધો અર્થ એ છે કે પ્રમોટર્સ પોતાનો હિસ્સો વેચી રહ્યા નથી, પરંતુ કંપની 1.29 કરોડ એકદમ નવા શેર ઈશ્યુ કરશે.

કંપનીએ પોતાના શેરની પ્રાઇસ બેન્ડ 107 થી 113 રૂપિયા નક્કી કરી છે. જો તમે રિટેલ રોકાણકાર છો, તો તમારે ઓછામાં ઓછા 1 લોટ માટે અરજી કરવી પડશે. એક લોટમાં 132 શેર રાખવામાં આવ્યા છે. એટલે કે, અપર પ્રાઇસ બેન્ડ (113 રૂપિયા) મુજબ તમારે ઓછામાં ઓછા 14,916 રૂપિયાનું રોકાણ કરવું પડશે.

ભુવનેશ્વરમાં હેડક્વાર્ટર ધરાવતી સીએસએમ ટેકનોલોજીની શરૂઆત 1998 માં થઈ હતી. આ કંપની સરકારી વિભાગો, પબ્લિક સેક્ટર અને મોટા એન્ટરપ્રાઇઝને ટેકનોલોજી સોલ્યુશન્સ પૂરા પાડે છે. ઈ-ગવર્નન્સ, સિસ્ટમ ઇન્ટિગ્રેશન, એપ ડેવલપમેન્ટ, ક્લાઉડ, ડેટા એનાલિટિક્સ અને આર્ટિફિશિયલ ઈન્ટેલિજન્સના ક્ષેત્રમાં કંપનીને 27 વર્ષથી વધુનો બહોળો અનુભવ છે. આઈપીઓમાંથી મળેલા પૈસાનો ઉપયોગ કંપની પોતાનું જૂનું દેવું ચૂકવવા, બિઝનેસના વિસ્તરણ માટે અને સામાન્ય કોર્પોરેટ જરૂરિયાતો પૂરી કરવા માટે કરશે.

એક્સપર્ટ્સની સલાહ અને રિઝર્વેશન

જાણીતી બ્રોકરેજ ફર્મ આનંદ રાઠીએ રોકાણકારોને આ આઈપીઓમાં રોકાણ કરવાની સલાહ આપી છે. 113 રૂપિયાની અપર પ્રાઇસ બેન્ડ પર કંપનીનો P/E રેશિયો 41.6 ગણો છે. કંપનીનો ટ્રેક રેકોર્ડ અને ફાઇનાન્શિયલ સ્થિતિ જોતા આ વેલ્યુએશન વ્યાજબી માનવામાં આવે છે.

આ ઈશ્યુમાં શેરની ફાળવણી આ મુજબ રહેશે.

ક્વોલિફાઇડ ઇન્સ્ટિટ્યૂશનલ બાયર્સ (QIB) માટે 50 ટકા હિસ્સો

નોન-ઇન્સ્ટિટ્યૂશનલ ઇન્વેસ્ટર્સ (NII) માટે 15 ટકા હિસ્સો

રિટેલ રોકાણકારો માટે 35 ટકા હિસ્સો

બજારનું સેન્ટિમેન્ટ અને જોખમ

એક્સપર્ટ્સનું માનવું છે કે અત્યારે બજારમાં આઈટી કંપનીઓના શેરો પર ભારે વેચવાલીનું દબાણ છે. આર્ટિફિશિયલ ઈન્ટેલિજન્સના વધતા ઉપયોગને કારણે ભારતીય આઈટી સેક્ટર પર અસર પડી છે. હજુ 23 જૂને જ શેર બજારમાં જે મોટો ઘટાડો આવ્યો, તેમાં પણ મોટાભાગની દિગ્ગજ આઈટી કંપનીઓ તૂટી હતી. તેથી આઈપીઓનું લિસ્ટિંગ બજારના તે સમયના મૂડ પર પણ આધાર રાખશે.

આ પણ વાંચો-Market Outlook : ભારે ઘટાડા સાથે બજાર બંધ, રોકાણકારોના 6 લાખ કરોડ સ્વાહા, જાણો 24 જૂને કેવી રહેશે માર્કેટની ચાલ