PhonePe IPO: માર્ચ સુધીમાં આવી શકે છે ફોન-પેનો મેગા IPO, CEO સમીર નિગમે જણાવ્યો ભવિષ્યનો મોટો પ્લાન

PhonePe IPO: ડિજિટલ પેમેન્ટનો ઉપયોગ કરતા લોકો અને શેરબજારના રોકાણકારો માટે એક મોટા સમાચાર સામે આવ્યા છે. દેશની સૌથી મોટી ફિનટેક કંપનીઓમાંની એક 'PhonePe' માર્ચ મહિના સુધીમાં પોતાનો IPO શેરબજારમાં લાવી શકે છે. કંપનીના કો-ફાઉન્ડર અને CEO સમીર નિગમે આ અંગેની સત્તાવાર માહિતી આપી છે.

IPO લાવવા પાછળ NPCI ના નવા નિયમની ભૂમિકા

સમીર નિગમે એક ખાસ ઈન્ટરવ્યુમાં જણાવ્યું કે, UPI ટ્રાન્ઝેક્શન પર મર્ચન્ટ ડિસ્કાઉન્ટ રેટ લાગુ થવાના નિર્ણયથી કંપનીની આવકમાં નોંધપાત્ર વધારો થશે, જે તેમને IPO લાવવાની વધુ નજીક લઈ જશે.

નોંધનીય છે કે, નેશનલ પેમેન્ટ્સ કોર્પોરેશન ઓફ ઈન્ડિયાએ 15 સપ્ટેમ્બરે જાહેરાત કરી હતી કે 2000 રૂપિયાથી વધુના UPI ટ્રાન્ઝેક્શન પર 0.4 ટકા MDR ચાર્જ લાગશે. આ નવો નિયમ આગામી 15 ઓક્ટોબરથી સમગ્ર દેશમાં લાગુ થવા જઈ રહ્યો છે.

ના, સામાન્ય યુઝર્સ પર આની કોઈ જ અસર નહીં થાય. MDR એ એવું કમિશન છે જે દુકાનદારો ડિજિટલ પેમેન્ટ પ્રોસેસ કરવા માટે બેંકોને ચૂકવે છે. એટલે કે ગ્રાહકો માટે UPI પેમેન્ટ પહેલાની જેમ જ બિલકુલ ફ્રી રહેશે. જોકે, નવો નિયમ લાગુ થયા બાદ એ જોવું રસપ્રદ રહેશે કે દુકાનદારો મોટા પેમેન્ટ UPI દ્વારા સ્વીકારવાનું ચાલુ રાખે છે કે નહીં.

પહેલા ટાળ્યો હતો પ્લાન, 12,000 કરોડ એકઠા કરવાનો લક્ષ્યાંક

આ વર્ષની શરૂઆતમાં વૈશ્વિક અશાંતિ અને રોકાણકારોના નબળા સેન્ટિમેન્ટને કારણે PhonePe એ પોતાનો IPO લાવવાનો વિચાર મોકૂફ રાખ્યો હતો. પરંતુ, તમને જણાવી દઈએ કે 20 જાન્યુઆરીના રોજ જ SEBI તરફથી આ બેંગલુરુ બેઝ્ડ ફિનટેક કંપનીને IPO માટે લીલી ઝંડી મળી ગઈ હતી. મીડિયા રિપોર્ટ્સ અનુસાર, PhonePe આ IPO દ્વારા માર્કેટમાંથી અંદાજે 12,000 કરોડ રૂપિયા એકઠા કરવાની મોટી યોજના બનાવી રહી છે.

ફોનપેને કઈ રીતે થશે જંગી ફાયદો?

ભારતમાં થતા કુલ ડિજિટલ UPI ટ્રાન્ઝેક્શનમાં PhonePe નો માર્કેટ શેર 45 ટકાથી પણ વધુ છે. નિયમ મુજબ, MDR ચાર્જમાંથી મળતા કુલ ફંડમાંથી લગભગ 20 ટકા હિસ્સો થર્ડ-પાર્ટી UPI એપ્સને મળશે.આ ગણતરી મુજબ, બજારમાં થતી કુલ MDR કમાણીનો લગભગ 10 ટકા હિસ્સો સીધો PhonePe પાસે આવશે. કંપનીના CEO એ જણાવ્યું કે, છેલ્લા ત્રણ-ચાર વર્ષથી રોકાણકારો સતત પૂછી રહ્યા હતા કે કંપની માત્ર ફ્રી સેવા આપીને કમાણી કેવી રીતે કરશે. હવે MDR લાગુ થવાથી આ પ્રશ્નનો ઉકેલ આવી ગયો છે અને માર્કેટનો રિસ્પોન્સ પોઝિટિવ રહેશે તેવી આશા છે.

આ પણ વાંચો-Federal Reserve: ફેડરલ રિઝર્વ આજે વધારી શકે છે 0.25% વ્યાજદર, ભારતીય શેરબજાર પર પડશે સીધી અસર