ફિલિપાઈન્સમાં આભ ફાટ્યું હોય તેવી આગ! 1000 મકાનો બળીને ખાખ, જુઓ ભયાનક તબાહીનો વાયરલ વીડિયો

Massive Fire Philippines: દક્ષિણ ફિલીપીન્સમાં મંગળવારે રાત્રે એક એવી ઘટના બની જેણે આખી દુનિયાનું ધ્યાન ખેંચ્યું છે. બોંગાઓ સ્થિત એક નાના ટાપુ પર અચાનક ભીષણ આગ ફાટી નીકળી હતી. આ આગ એટલી વિકરાળ હતી કે જોતજોતામાં આખી વસ્તી તબાહ થઈ ગઈ. આગની જ્વાળાઓએ અંદાજે 1000 જેટલા ઘરોને પોતાની ઝપેટમાં લઈ લીધા અને જોતજોતામાં બધું જ રાખ થઈ ગયું. આ દુર્ઘટનાને કારણે એક જ રાતમાં 5000 જેટલા લોકો બેઘર થઈ ગયા છે.

ક્યાં અને કેવી રીતે લાગી આગ?

સમાચાર એજન્સી PNAના રિપોર્ટ મુજબ, આ આગની શરૂઆત 'બારાંગાય લામિયન' (Barangay Lamion) નામના વિસ્તારમાં થઈ હતી. આ વિસ્તારની ભૌગોલિક સ્થિતિ થોડી અલગ છે. અહીં લોકો પાણીની ઉપર લાકડાના થાંભલાઓ ખોડીને તેના પર ઘર બનાવીને રહે છે. મંગળવારે રાત્રે લાગેલી આ આગ સતત 4 કલાક સુધી સળગતી રહી હતી. રાતનો સમય હોવાથી અને પવનની ગતિ તેજ હોવાથી આગે રૌદ્ર સ્વરૂપ ધારણ કરી લીધું હતું.

શા માટે આગ આટલી ઝડપથી ફેલાઈ?

મકાનનું બાંધકામ: અહીંના મોટાભાગના મકાનો લાકડું, વાંસ અને નારિયેળના પાંદડા જેવી હળવી અને જલ્દી સળગી ઉઠે તેવી વસ્તુઓમાંથી બનેલા હતા.

ગીચ વસ્તી: મકાનો એકબીજાની એકદમ અડીને આવેલા હોવાથી આગ એક ઘરમાંથી બીજા ઘરમાં ખૂબ જ ઝડપથી ફેલાઈ ગઈ.

ફાયર બ્રિગેડની મજબૂરી: આ ઘરો પાણીની ઉપર થાંભલા પર હોવાથી ફાયર બ્રિગેડની ગાડીઓ ત્યાં સુધી પહોંચી શકી નહોતી. વળી, રસ્તાઓ સાંકડા હોવાથી બચાવ કામગીરીમાં મુશ્કેલી પડી હતી.

APOCALYPTIC FIRES RIP THROUGH PHILIPPINES — ESTIMATED 1 THOUSAND HOMES DESTROYED pic.twitter.com/H4kj6zAbPf

— RT (@RT_com) February 4, 2026

તબાહીના દ્રશ્યો કેમેરામાં કેદ

આ દુર્ઘટનાના વીડિયો સોશિયલ મીડિયા પર ખુબ વાયરલ થઈ રહ્યા છે. ફૂટેજમાં રાતના અંધકારમાં આકાશને અડી જાય તેવી આગની જ્વાળાઓ અને કાળા ડિબાંગ ધુમાડાના ગોટેગોટા જોઈ શકાય છે. આગની ભયાનકતા એટલી હતી કે દૂરથી પણ આખો વિસ્તાર લાલઘૂમ દેખાતો હતો.

હજારો લોકો ખુલ્લા આકાશ નીચે

આગ શાંત થયા પછીનું દ્રશ્ય અત્યંત હૃદયદ્રાવક છે. લગભગ 1000 જેટલા મકાનો બળીને ખાખ થઈ ચૂક્યા છે. અસરગ્રસ્તોનો પ્રાથમિક આંકડો જ 5000 કરતા વધારે છે. જે લોકો કાલ સુધી પોતાના ઘરમાં હતા, તેઓ આજે ખુલ્લા આકાશ નીચે અથવા કામચલાઉ શેલ્ટરમાં રહેવા મજબૂર બન્યા છે. તેમનું ઘરવખરીનું તમામ સામાન બળી ગયું છે.

તપાસ અને રાહત કામગીરી

આગ કયા કારણોસર લાગી તે હજુ સુધી સ્પષ્ટ થયું નથી, પરંતુ પ્રાથમિક તપાસમાં શોર્ટ સર્કિટ અથવા ગેસ લીકેજની શક્યતા સેવાઈ રહી છે. હાલ તો સ્થાનિક તંત્ર અને સામાજિક સંસ્થાઓ મદદે આવી છે. પીડિત પરિવારોને ખાવાનું, પાણી અને કપડાં પહોંચાડવામાં આવી રહ્યા છે. જોકે, આ ગરીબ પરિવારો માટે ફરીથી જીવન શરૂ કરવું ખૂબ કપરું સાબિત થશે.

આ પણ વાંચો- સોના-ચાંદીમાં ભૂકંપ: ચાંદી એક જ દિવસમાં 9% તૂટી, સોનાના ભાવમાં પણ મોટો ઘટાડો; જાણો આજના લેટેસ્ટ રેટ