‘અભી ન જાઓ છોડકર...' સૂરની દેવી આશા ભોંસલેએ 92 વર્ષની વયે દુનિયાને કહ્યું અલવિદા, સંગીત જગતમાં ઘેરો શોક

Asha Bhosle Death News: ભારતીય સંગીત જગત માટે એક અત્યંત દુખદ સમાચાર સામે આવ્યા છે. ‘સૂરની રાણી' અને કરોડો લોકોના દિલ પર રાજ કરનાર દિગ્ગજ ગાયિકા આશા ભોંસલેનું 92 વર્ષની વયે નિધન થયું છે. શનિવારે તેમને હાર્ટ એટેક આવ્યા બાદ મુંબઈની બ્રીચ કેન્ડી હોસ્પિટલના ICUમાં દાખલ કરવામાં આવ્યા હતા, જ્યાં સારવાર દરમિયાન તેમણે અંતિમ શ્વાસ લીધા હતા. આવતીકાલે સાંજે 4 વાગ્યે તેમના અંતિમ સંસ્કાર કરવામાં આવશે.

પૌત્રીએ આપી હતી તબિયતની જાણકારી

આશા ભોંસલેની તબિયત બગડતા તેમની પૌત્રી જનાઈ ભોંસલેએ સોશિયલ મીડિયા પ્લેટફોર્મ X પર એક પોસ્ટ શેર કરી હતી. તેમણે જણાવ્યું હતું કે, "મારી દાદી આશા ભોંસલેને નબળાઈ અને છાતીમાં ઈન્ફેક્શનને કારણે હોસ્પિટલમાં દાખલ કરવા પડ્યા છે. અમે આપ સૌને પ્રાઈવસી જાળવવા વિનંતી કરીએ છીએ." જોકે, દુર્ભાગ્યવશ ડૉક્ટરોના તમામ પ્રયત્નો છતાં આશા તાઈને બચાવી શકાયા નથી.

7 દાયકા લાંબી શાનદાર સફર

સંગીત સિવાય અભિનય અને બિઝનેસમાં પણ હતા સક્રિય

પ્રથમ ગીત: તેમણે 1943માં મરાઠી ફિલ્મ ‘માઝા બલ' માટે પ્રથમ ગીત રેકોર્ડ કર્યું હતું.

બોલીવુડ ડેબ્યૂ: 1948માં ફિલ્મ ‘ચુનરિયા'ના ગીત 'સાવન આયા'થી તેમને લોકપ્રિયતા મળી.

અભિનય: વર્ષ 2013માં તેમણે મરાઠી ફિલ્મ ‘માઈ'માં મુખ્ય ભૂમિકા ભજવીને લોકોના દિલ જીત્યા હતા.

રેસ્ટોરન્ટ બિઝનેસ: ગાયન સિવાય તેઓ રસોઈના પણ શોખીન હતા અને દુબઈ તેમજ કુવૈતમાં તેમની પોતાની રેસ્ટોરન્ટ્સ પણ છે.

સન્માન અને એવોર્ડ્સ

આશા ભોંસલેને તેમની અપ્રતિમ સેવા બદલ અનેક પુરસ્કારોથી નવાજવામાં આવ્યા છે:

* 7 ફિલ્મફેર એવોર્ડ્સ (શ્રેષ્ઠ ગાયિકા માટે)

* ફિલ્મફેર લાઈફટાઈમ અચીવમેન્ટ એવોર્ડ

* વર્ષ 2000માં દાદાસાહેબ ફાળકે એવોર્ડ

* વર્ષ 2008માં ભારત સરકાર દ્વારા પદ્મ વિભૂષણ સન્માન

આશા તાઈના નિધનથી માત્ર બોલીવુડ જ નહીં, પણ સમગ્ર વિશ્વમાં પથરાયેલા તેમના ચાહકોમાં શોકની લહેર છે. સંગીત જગતમાં તેમણે પાડેલી ખોટ ક્યારેય પૂરી શકાશે નહીં. તેમનો અવાજ હંમેશા ગીતોના માધ્યમથી જીવંત રહેશે.

આ પણ વાંચો- Stock in Focus: કમાણીનો મોકો! Muthoot Financeના શેર પર મળશે 30નું ડિવિડન્ડ, માત્ર 3 દિવસ બાકી, ફટાફટ ચેક કરો વિગતો