અનંત અંબાણીએ રચ્યો ઈતિહાસ: 'વનતારા' માટે મળ્યો પ્રતિષ્ઠિત ગ્લોબલ એવોર્ડ, JFK અને બિલ ક્લિન્ટનની યાદીમાં સામેલ

Vantara Global Humanitarian Award: અનંત અંબાણીએ પ્રાણી કલ્યાણ અને વન્યજીવન સંરક્ષણ ક્ષેત્રે ભારતનું નામ રોશન કર્યું છે. યુનાઇટેડ સ્ટેટ્સ (US) માં આયોજિત એક ભવ્ય સમારોહમાં, તેમને પ્રાણીઓ માટેના તેમના અનોખા પ્રોજેક્ટ 'વનતારા' માટે પ્રતિષ્ઠિત 'ગ્લોબલ હ્યુમેનિટેરિયન એવોર્ડ'થી સન્માનિત કરવામાં આવ્યા છે. આ સન્માન પ્રાણીઓના બચાવ, સારવાર અને પુનર્વસન માટેના તેમના નેતૃત્વ અને સમર્પણને બિરદાવે છે.

ઈતિહાસ રચ્યો: પ્રથમ એશિયન અને સૌથી યુવા

આ એવોર્ડ સાથે અનંત અંબાણીએ એક ખાસ સિદ્ધિ મેળવી છે. તેઓ આ સન્માન મેળવનારા સૌથી યુવા અને પ્રથમ એશિયન વ્યક્તિ બન્યા છે. આ એવોર્ડ અગાઉ હોલિવૂડની પ્રખ્યાત હસ્તીઓ અને અમેરિકાના પૂર્વ રાષ્ટ્રપતિઓ જૉન એફ કેનેડી અને બિલ ક્લિન્ટન જેવી વૈશ્વિક હસ્તીઓને આપવામાં આવ્યો છે. આ સન્માન મળતા જ 'વનતારા' પ્રોજેક્ટ ફરી એકવાર દુનિયાભરમાં ચર્ચાનો વિષય બન્યો છે.

'વનતારા' માત્ર એક રેસ્ક્યૂ સેન્ટર નથી, પરંતુ ઘાયલ, બીમાર અને લુપ્ત થતી પ્રજાતિના પ્રાણીઓ માટે એક આશાનું કિરણ છે. અહીં પ્રાણીઓની સારવાર, સંભાળ અને તેમને સુરક્ષિત વાતાવરણમાં ફરીથી વસાવવાનું કામ મોટા પાયે કરવામાં આવે છે.

આયોજક 'ગ્લોબલ હ્યુમન સોસાયટી' એ વનતારાના વખાણ કરતાં કહ્યું, "વનતારાએ દુનિયાને બતાવ્યું છે કે પ્રાણીઓની મદદ કેવી રીતે કરી શકાય. તે વિશ્વ માટે એક ઉદાહરણરૂપ મોડેલ છે."

સંરક્ષણ ભવિષ્ય નહીં, આજની જવાબદારી છે: અનંત અંબાણી

આ એવોર્ડ સ્વીકારતી વખતે અનંત અંબાણીએ કહ્યું, "આ સન્માન મને 'સર્વભૂત હિતા' એટલે કે બધા જીવોના કલ્યાણના માર્ગ પર વધુ મજબૂતાઈથી ચાલવા માટે પ્રેરણા આપે છે. અમારા માટે સંરક્ષણ એ ભવિષ્યની વાત નથી, પરંતુ આજની જવાબદારી છે."

આ કાર્યક્રમમાં વન્યજીવન સંરક્ષણ ક્ષેત્રના અનેક જાણીતા નિષ્ણાતો હાજર રહ્યા હતા, જેમાં આંતરરાષ્ટ્રીય સ્તરે ડૉ. જૉન પૉલ રોડ્રીગેઝ, મેથ્યૂ જેમ્સ, અને વિલિયમ સ્ટ્રીટ જેવા મહાનુભાવોનો સમાવેશ થતો હતો. ભારતમાંથી પણ ડૉ. નીલમ ખૈરે અને ડૉ. કે.કે. શર્મા જેવા નિષ્ણાતોએ હાજરી આપી હતી.

આ પણ વાંચો - Commodity call: US ફેડના નિર્ણય પહેલા સોનામાં સાવચેતીનો માહોલ, નિષ્ણાત પાસેથી જાણો આજે કઈ કોમોડિટી કરાવશે તગડી કમાણી