હવામાન વિભાગનું મોટું એલર્ટ: દિલ્હી-ગુજરાત સહિત 18 રાજ્યોમાં આજે આકાશમાંથી વરસશે આફત, ઘરની બહાર નીકળતા પહેલા સાવધાન

Today weather update : દેશના મોટાભાગના વિસ્તારોમાં અત્યારે ચોમાસું સંપૂર્ણપણે સક્રિય અને મજબૂત સ્થિતિમાં છે. હવામાન વિભાગની લેટેસ્ટ આગાહી મુજબ, આગામી 3 થી 4 દિવસ સુધી વરસાદનો આ આક્રમક દોર સતત ચાલુ રહેશે. આજે દેશના અનેક ભાગોમાં મૂશળધાર વરસાદની ચેતવણી આપવામાં આવી છે.

હવામાન વિભાગના જણાવ્યા અનુસાર, વરસાદ દરમિયાન 40 થી 60 કિલોમીટર પ્રતિ કલાકની ઝડપે ભારે પવન ફૂંકાઈ શકે છે. સતત પડી રહેલા વરસાદને કારણે પહાડી વિસ્તારોમાં લેન્ડસ્લાઈડ થવાનો અને મેદાની વિસ્તારોમાં જળબંબાકાર તથા પૂર જેવી સ્થિતિ સર્જાવાનો મોટો ખતરો ઉભો થયો છે.

આ 18 રાજ્યોમાં અપાયું ભારે વરસાદનું એલર્ટ

આજે જે રાજ્યોમાં મૂશળધાર વરસાદની આગાહી કરવામાં આવી છે, તેમાં ગુજરાત, મહારાષ્ટ્ર, દિલ્હી-NCR, ઉત્તર પ્રદેશ, બિહાર, ઝારખંડ, પશ્ચિમ બંગાળ, મધ્ય પ્રદેશ, છત્તીસગઢ, રાજસ્થાન, પંજાબ, હિમાચલ પ્રદેશ, ઉત્તરાખંડ, જમ્મુ-કાશ્મીર, ઓડિશા, તેલંગાણા, કેરળ અને પૂર્વોત્તર ભારતના રાજ્યોનો સમાવેશ થાય છે.

દિલ્હી-NCR: આજે રાજધાની દિલ્હી અને આસપાસના વિસ્તારોમાં આકાશમાં કાળા વાદળો છવાયેલા રહેશે. ભારે પવન સાથે જોરદાર વરસાદ ખાબકી શકે છે. જોકે, આવતીકાલથી હવામાન થોડું સાફ થવાની આશા છે.

હિમાચલ પ્રદેશ અને ઉત્તરાખંડ: હિમાચલના ચંબા, કાંગડા, કુલ્લુ અને મંડીમાં આજે અતિભારે વરસાદનું રેડ એલર્ટ છે. જ્યારે ઉત્તરાખંડના દેહરાદૂન, નૈનીતાલ, ઋષિકેશ, બદ્રીનાથ રૂટ (ચમોલી, રુદ્રપ્રયાગ), ઉત્તરકાશી અને અલ્મોડા સહિતના 10 થી વધુ જિલ્લાઓમાં 22 થી 27 જુલાઈ સુધી વીજળીના કડાકા સાથે ભારે વરસાદની આગાહી છે.

જમ્મુ-કાશ્મીર: અહીં સતત વરસાદના કારણે પૂર જેવા હાલાત સર્જાયા છે. 24 જુલાઈ સુધી લોકોને નદી-નાળાથી દૂર રહેવા અને સાવધાન રહેવા જણાવાયું છે.

ગુજરાત અને મહારાષ્ટ્ર: પશ્ચિમ ભારતના આ બંને રાજ્યોમાં પણ મેઘરાજા મન મૂકીને વરસી રહ્યા છે અને આગામી દિવસોમાં પણ ભારે વરસાદ ચાલુ રહેશે.

મધ્ય પ્રદેશ: એમપીમાં ચોમાસું ફરી એક્ટિવ થયું છે. ઉજ્જૈન, ભોપાલ, નીમચ, મંદસૌર, સીહોર, પંચમઢી, નર્મદાપુરમ અને રાયસેન સહિત 18 થી વધુ જિલ્લાઓમાં વરસાદ પડશે.

રાજસ્થાન: થોડા વિરામ બાદ રાજસ્થાનમાં ચોમાસું પરત ફર્યું છે. 22 થી 26 જુલાઈ વચ્ચે કોટા, જયપુર, જોધપુર, ઉદયપુર, અજમેર, બિકાનેર અને ભરતપુરમાં જોરદાર વરસાદની સંભાવના છે.

ઉત્તર પ્રદેશ અને બિહાર: યુપીના મેરઠ, આગ્રા, પ્રયાગરાજ જેવા વિસ્તારોમાં 27 જુલાઈ સુધી રોકાઈ-રોકાઈને વરસાદ પડશે. જ્યારે બિહારના પટના, રોહતાસ અને નવાદામાં ભારે વાવાઝોડા સાથે વરસાદની ચેતવણી છે, જેનાથી ટ્રાફિક જામ અને જળભરાવ થઈ શકે છે.

અન્ય રાજ્યો: પંજાબમાં ભારે પવન સાથે વરસાદનું એલર્ટ છે. ઓડિશામાં 27 જુલાઈ સુધી વરસાદ ચાલુ રહેશે. જ્યારે ઝારખંડના રાંચી, બોકારો, ધનબાદ, જમશેદપુર અને દેવઘર સહિત 14 જેટલા જિલ્લાઓમાં આજે વરસાદની પૂરી શક્યતા છે.

આ પણ વાંચો-આંધ્રપ્રદેશમાં ફરી કોરોનાનો પગપેસારો: 7 નવા કેસ નોંધાયા, કુલ સંક્રમિતોની સંખ્યા 26 પર પહોંચી, 4ના મોત