મોબાઈલ યુઝર્સ માટે મોટા સમાચાર: સાઇબર ફ્રોડ રોકવા સરકાર લાવી રહી છે કડક નિયમો, એપ દ્વારા કેમેરા-માઈક્રોફોન વાપરવા પર લાગશે પ્રતિબંધ

Cyber Fraud Mobile Security Rules India: આજના સમયમાં સ્માર્ટફોન જેટલો ઉપયોગી છે, તેટલો જ સાઇબર ફ્રોડનો ખતરો પણ વધી ગયો છે. આ બાબતને ગંભીરતાથી લઈને કેન્દ્ર સરકાર હવે મોબાઈલ કંપનીઓ પર લગામ કસવાની તૈયારી કરી રહી છે. સરકાર એવા કડક નિયમો લાવી રહી છે જેનાથી તમારી જાસૂસી થતી અટકશે અને ડેટા સુરક્ષિત રહેશે. આ નવા નિયમો હેઠળ મોબાઈલ એપ્સને બેકગ્રાઉન્ડમાં કેમેરા અને માઈક્રોફોન વાપરવા પર સીધો પ્રતિબંધ મુકવામાં આવશે.

સરકારનું કડક વલણ અને 83 નવા નિયમો

ભારત સરકારના ઇન્ફોર્મેશન એન્ડ ટેકનોલોજી મંત્રાલયે મોબાઈલ ફોનની સુરક્ષા માટે કુલ 83 જેટલા માપદંડો તૈયાર કર્યા છે. આ નિયમોનું પાલન કરવું દરેક મોબાઈલ કંપની માટે ફરજિયાત બનાવવામાં આવશે. સૌથી મહત્વની વાત એ છે કે, મોબાઈલ કંપનીઓએ હવે તેમના ફોન જે ટેકનોલોજી પર ચાલે છે, તે 'સોર્સ કોડ'ની માહિતી સરકારને આપવી પડશે.

સરકારનું કહેવું છે કે આ સોર્સ કોડનું ભારતની લેબમાં વિશ્લેષણ કરવામાં આવશે અને જરૂર જણાય તો તેની ઊંડાણપૂર્વક તપાસ પણ થશે. આ ઉપરાંત, કંપનીઓએ કોઈપણ સોફ્ટવેર અપડેટ કે સુરક્ષા સંબંધિત ફેરફારોની જાણકારી 'નેશનલ સેન્ટર ફોર કમ્યુનિકેશન સિક્યોરિટી'ને આપવી પડશે.

ઘણીવાર આપણે નવો ફોન લઈએ ત્યારે તેમાં કંપની તરફથી પહેલેથી જ કેટલીક એપ્સ ઇન્સ્ટોલ કરેલી હોય છે, જેને આપણે ડિલીટ નથી કરી શકતા. સરકારના નવા પ્રસ્તાવ મુજબ, કંપનીઓએ સોફ્ટવેરમાં એવો ફેરફાર કરવો પડશે જેથી યુઝર્સ આવી બિનજરૂરી પ્રી-ઇન્સ્ટોલ્ડ એપ્સને પણ સરળતાથી હટાવી શકે.

સતત મેલવેર સ્કેનિંગ અને સરકારનો તર્ક

સાઇબર હુમલાઓ અને વાયરસથી બચવા માટે ફોનમાં સમયાંતરે ઓટોમેટિક મેલવેર સ્કેનિંગ સિસ્ટમ પણ ગોઠવવામાં આવશે. આ પ્રસ્તાવ આમ તો 2023માં તૈયાર થયો હતો, પરંતુ હવે સરકાર તેને કાયદેસર રીતે લાગુ કરવા માંગે છે. પીએમ મોદીની પ્રાથમિકતાઓમાં નાગરિકોની સાઇબર સુરક્ષા સામેલ છે. ભારત દુનિયાનું બીજા નંબરનું સૌથી મોટું સ્માર્ટફોન માર્કેટ છે, જ્યાં આશરે 75 કરોડ લોકો સ્માર્ટફોન વાપરે છે, તેથી તેમની સુરક્ષા ખૂબ મહત્વની છે.

મોબાઈલ કંપનીઓનો જોરદાર વિરોધ

બીજી તરફ, સ્માર્ટફોન બનાવતી કંપનીઓ આ નિયમોનો સખત વિરોધ કરી રહી છે. 'મેન્યુફેક્ચર્સ એસોસિયેશન ફોર ઇન્ફોર્મેશન ટેકનોલોજી' (MAIT) એ સરકારને આ પ્રસ્તાવ રદ કરવા કહ્યું છે. કંપનીઓની દલીલો નીચે મુજબ છે:

સોર્સ કોડની પ્રાઈવસી: સોર્સ કોડ એ કંપનીની સૌથી મોટી મૂડી હોય છે. એપલે 2014થી 2016 દરમિયાન ચીન અને અમેરિકન એજન્સીઓને પણ સોર્સ કોડ આપવાની ના પાડી દીધી હતી. ભારતીય મેન્યુફેક્ચર્સ પણ આ બાબતે ખૂબ ગંભીર છે.

બેટરી અને સ્ટોરેજની સમસ્યા: કંપનીઓનું કહેવું છે કે જો ફોનમાં સતત મેલવેર સ્કેનિંગ થશે, તો બેટરી જલ્દી ઉતરી જશે. વળી, સરકાર ઈચ્છે છે કે ફોનમાં એક વર્ષનો ડેટા સચવાયેલો રહે, પરંતુ ફોનમાં આટલી સ્પેસ હોતી નથી.

વિશ્વમાં ક્યાંય નથી આવા નિયમો: મોબાઈલ કંપનીઓનો દાવો છે કે આવા આકરા નિયમો તો અમેરિકા અને ચીન જેવા દેશોમાં પણ નથી, જે ભારત લાગુ કરવા જઈ રહ્યું છે.

આગળ શું થશે?

ઇન્ફોર્મેશન એન્ડ ટેકનોલોજી વિભાગના સચિવ એસ. કૃષ્ણને જણાવ્યું હતું કે હાલ આ બધું પ્રારંભિક સ્તર પર છે. કંપનીઓના સૂચનો અને વાંધાઓ પર સરકાર ખુલ્લા મને વિચાર કરશે. ટૂંક સમયમાં જ મંત્રાલય અને મોબાઈલ કંપનીઓ વચ્ચે આ અંગે બેઠક યોજાઈ શકે છે.

જો આ નિયમો લાગુ થશે તો સામાન્ય જનતા માટે સાઇબર ફ્રોડનું જોખમ ઘટશે, પરંતુ મોબાઈલ કંપનીઓ માટે આ એક મોટો પડકાર બની રહેશે.

આ પણ વાંચો- ગુજરાતમાં ખનીજ ચોરો સાવધાન! હવે વાહન પકડાયું તો સીધું 30 દિવસ જેલમાં, ત્રીજી વાર પકડાય તો સરકાર જપ્ત કરી લેશે