ગુજરાતમાં હાડ થીજવતી ઠંડી: 5 શહેરોમાં પારો સિંગલ ડિજિટમાં પહોંચ્યો, જાણો હવામાન વિભાગની નવી આગાહી

Gujarat Weather Update: ગુજરાતમાં વાતાવરણમાં અચાનક પલટો આવ્યો છે અને આખું રાજ્ય જાણે શીતલહેરની લપેટમાં આવી ગયું છે. છેલ્લા 24 કલાકમાં તાપમાનમાં ધરખમ ઘટાડો નોંધાતા લોકો કાતિલ ઠંડીનો અનુભવ કરી રહ્યા છે. ખાસ કરીને પાંચ મોટા શહેરોમાં તો પારો સિંગલ ડિજિટમાં પહોંચી ગયો છે, જેના કારણે જનજીવન પર વ્યાપક અસર પડી છે. મુખ્ય શહેરોમાં તાપમાનમાં મોટો ઘટાડો છેલ્લા 24 કલાકમાં રાજ્યના મુખ્ય શહેરોના તાપમાનમાં જે ઘટાડો જોવા મળ્યો છે તેના આંકડા ચોંકાવનારા છે:

અમદાવાદ: લઘુતમ તાપમાનમાં 5.3 ડિગ્રીનો ઘટાડો થયો છે.

વડોદરા: અહીં તાપમાન 5 ડિગ્રી જેટલું ગગડ્યું છે.

રાજકોટ: રાજકોટમાં સૌથી વધુ 8.4 ડિગ્રી તાપમાન ઘટતા શહેરીજનો ઠૂંઠવાઈ ગયા છે.

કેમ અચાનક વધી ઠંડી?

હવામાન નિષ્ણાંતોના જણાવ્યા અનુસાર, આ કકડતી ઠંડી પાછળ બે મુખ્ય કારણો જવાબદાર છે:

1) વેસ્ટર્ન ડિસ્ટર્બન્સ: થોડા દિવસો પહેલા સર્જાયેલા વેસ્ટર્ન ડિસ્ટર્બન્સના કારણે રાજ્યના કેટલાક ભાગોમાં વરસાદી માહોલ હતો, જે હવે ઠંડા પવનોમાં ફેરવાયો છે.

2) સ્નોફોલ: ઉત્તર ભારતમાં થયેલી હિમવર્ષાના કારણે પવનોમાં ઠંડક વધી છે અને આ ઠંડા પવનો સીધા ગુજરાત તરફ ફૂંકાઈ રહ્યા છે.

હવામાન વિભાગની આગામી 3 દિવસની આગાહી હજી પણ ઠંડીથી રાહત મળે તેવા સંકેતો દેખાઈ રહ્યા નથી. હવામાન વિભાગના જણાવ્યા અનુસાર, આગામી 3 દિવસ સુધી રાજ્યમાં શીતલહેર યથાવત રહેશે. જોકે, આ દરમિયાન તાપમાનમાં 2 થી 3 ડિગ્રીનો સામાન્ય વધારો થઈ શકે છે, પરંતુ ત્યારબાદના 24 કલાકમાં ફરીથી પારો 3 થી 5 ડિગ્રી સુધી નીચે ઉતરે તેવી શક્યતા છે. એટલે કે, આવનારા દિવસોમાં ગુજરાતીઓએ હજુ વધુ તીવ્ર ઠંડીનો સામનો કરવા તૈયાર રહેવું પડશે.

ગુજરાતમાં અત્યારે ઠંડીનો બીજો રાઉન્ડ પૂરા જોરથી શરૂ થયો છે. વયસ્કો અને બાળકોને આ બદલાતા હવામાનમાં તબિયતનું ધ્યાન રાખવા અને ગરમ કપડાંનો પૂરતો ઉપયોગ કરવાની સલાહ આપવામાં આવે છે. આગામી અઠવાડિયું ઠંડીના પ્રકોપ વચ્ચે જ પસાર થવાનું અનુમાન છે.

આ પણ વાંચો- ગ્રીનલેન્ડ પર ટ્રમ્પની ધમકી: સોના-ચાંદીના ભાવ આસમાને, પણ ભારતને થશે બમ્પર ફાયદો! જાણો કઈ રીતે