‘અંગત મિત્ર હોવા છતાં PM મોદી યુદ્ધ રોકવાની વાત કરે છે', પુતિને કર્યા ભારતના વલણના ખુલ્લા દિલે વખાણ

Vladimir Putin on India Russia relations: રશિયા અને યુક્રેન વચ્ચે લાંબા સમયથી ચાલી રહેલા યુદ્ધને લઈને રશિયાના રાષ્ટ્રપતિ વ્લાદિમીર પુતિને એક મોટું નિવેદન આપ્યું છે. પુતિને વડાપ્રધાન નરેન્દ્ર મોદીના શાંતિ પ્રયાસોના ખુલ્લા દિલે વખાણ કર્યા છે. તેમણે સ્પષ્ટ કહ્યું કે, ભારત અને રશિયા વચ્ચે ખૂબ જ ગાઢ અને મૈત્રીપૂર્ણ સંબંધો છે, તેમ છતાં PM મોદી દરેક મુલાકાતમાં યુદ્ધ અટકાવવાની વાત અચૂકપણે કરે છે.

વાલદાઈ ડિસ્કશન ક્લબમાં પુતિનનું નિવેદન

1 ઓક્ટોબરના રોજ મોસ્કો વિસ્તારમાં યોજાયેલા વાલદાઈ ડિસ્કશન ક્લબના સત્રમાં બોલતા પુતિને કહ્યું કે, "PM મોદીને યુદ્ધનો અંત લાવવામાં ખૂબ જ ઊંડો રસ છે. તેમની પાસે આ સમસ્યાનો એવો ઉકેલ લાવવાના સારા વિચારો છે, જે બંને પક્ષોને મંજૂર હોય." પુતિને સ્વીકાર્યું કે આ મુદ્દે ભારતનો અભિગમ તદ્દન તટસ્થ રહ્યો છે, અને તેમનું મુખ્ય લક્ષ્ય કોઈપણ ભોગે જલ્દીથી સંઘર્ષનો અંત લાવવાનું છે. રશિયન રાષ્ટ્રપતિએ શાંતિપૂર્ણ ઉકેલ લાવવાની દિશામાં ભારતના વલણને હૃદયપૂર્વક આવકાર્યું હતું.

દરેક બેઠકમાં ઉઠે છે શાંતિનો મુદ્દો

આ મુલાકાત બાદ ક્રેમલિનના પ્રવક્તા દિમિત્રી પેસ્કોવે પણ પુષ્ટિ કરી હતી કે PM મોદી અને ચીનના રાષ્ટ્રપતિ શી જિનપિંગે અલગ-અલગ બેઠકોમાં પુતિન સાથે યુદ્ધના સમાધાન અંગે ચર્ચા કરી છે અને બંને દેશોએ ઉકેલ શોધવામાં મદદ કરવાની તૈયારી દર્શાવી છે.

ભારતનું સૈદ્ધાંતિક અને માનવતાવાદી વલણ

ભારતે શરૂઆતથી જ સ્પષ્ટ કર્યું છે કે યુદ્ધ કોઈ સમસ્યાનો ઉકેલ નથી. ઓગસ્ટ 2025માં જાપાનના પ્રખ્યાત અખબાર 'યોમિઉરી શિમ્બુન' ને આપેલા એક ખાસ ઇન્ટરવ્યૂમાં PM મોદીએ ભારતના આ વલણને 'સૈદ્ધાંતિક અને માનવતાવાદી' ગણાવ્યું હતું.

આ ઉપરાંત, 31 ઓગસ્ટે બિશ્કેકમાં થયેલી મુલાકાતમાં પણ મોદીએ પુતિન સામે આ મુદ્દો મૂક્યો હતો. એટલું જ નહીં, ઓગસ્ટ મહિનામાં અમેરિકાના રાષ્ટ્રપતિ ડોનાલ્ડ ટ્રમ્પ સાથે પુતિનની વાતચીત થયા બાદ પણ PM મોદીએ રશિયન રાષ્ટ્રપતિ સાથે ફોન પર ચર્ચા કરી હતી અને શાંતિ માટે ભારતનું સમર્થન જાહેર કર્યું હતું.

ભારત અને રશિયાના અકબંધ સંબંધો

યુક્રેન મુદ્દા પર તટસ્થ અને સ્પષ્ટ વલણ હોવા છતાં, ભારત અને રશિયાના સંબંધો સતત વધુ મજબૂત બની રહ્યા છે. બંને દેશો વેપાર, સંરક્ષણ, ઊર્જા અને સ્પેસ જેવા અગત્યના ક્ષેત્રોમાં સાથે મળીને કામ કરી રહ્યા છે. સપ્ટેમ્બરની મુલાકાત દરમિયાન પુતિને PM મોદીને આગામી 24 મી ભારત-રશિયા વાર્ષિક શિખર બેઠક માટે રશિયા આવવાનું આમંત્રણ આપ્યું હતું. PM મોદીએ આ આમંત્રણ સ્વીકારી લીધું છે અને હવે રાજદ્વારી ચેનલો મારફતે ટૂંક સમયમાં જ આ બેઠકની તારીખ નક્કી કરવામાં આવશે.

એક તરફ ભારત પોતાની આંતરરાષ્ટ્રીય મિત્રતા નિભાવી રહ્યું છે, તો બીજી તરફ વિશ્વમાં શાંતિ સ્થાપવા માટે પણ પોતાની જવાબદારી પૂરી નિષ્ઠાથી નિભાવી રહ્યું છે, જેની નોંધ ખુદ રશિયાએ લીધી છે.

આ પણ વાંચો- તમારું સપનાનું ઘર બનાવવું થશે મોંઘું! મોરબી સિરામિક ઉદ્યોગે ટાઈલ્સના ભાવમાં કર્યો 12%નો તોતિંગ વધારો