US-Iran War Ends: અમેરિકા અને ઈરાન વચ્ચે યુદ્ધનો અંત, ડોનાલ્ડ ટ્રમ્પ અને ઈરાની રાષ્ટ્રપતિએ શાંતિ કરાર પર કર્યા હસ્તાક્ષર

US-Iran War Ends: અમેરિકા અને ઈરાન વચ્ચે છેલ્લા 3 મહિનાથી વધુ સમયથી ચાલતા ભીષણ યુદ્ધનો આખરે અંત આવ્યો છે. બંને દેશો વચ્ચે યુદ્ધ સમાપ્ત કરવા માટે એક વચગાળાના સમજૂતી કરાર (MoU) પર ઔપચારિક રીતે હસ્તાક્ષર થઈ ગયા છે.

અમેરિકન રાષ્ટ્રપતિ ડોનાલ્ડ ટ્રમ્પે ગુરુવારે 18 જૂનના રોજ ફ્રાન્સના રાષ્ટ્રપતિ ઈમેન્યુઅલ મેક્રોન સાથેની બેઠક દરમિયાન પેરિસના વર્સેલ્સ પેલેસમાં આ ઐતિહાસિક દસ્તાવેજ પર સહી કરી હતી. ફ્રાન્સના રાષ્ટ્રપતિ દ્વારા આયોજિત રાત્રિભોજન કાર્યક્રમમાં આ પ્રક્રિયા પૂર્ણ થઈ હતી. બીજી તરફ ઈરાનના રાષ્ટ્રપતિ પઝશકિયાને પોતાના દેશમાંથી ઈલેક્ટ્રોનિક માધ્યમથી આ કરાર પર હસ્તાક્ષર કર્યા હતા.

ભારતીય સમય મુજબ ગુરુવારે વહેલી સવારે 5 વાગ્યે બંને નેતાઓની સહી થતાની સાથે જ આ કરાર અમલમાં આવી ગયો છે. ફ્રાન્સમાં G7 સમિટ પૂર્ણ કર્યા બાદ પત્રકારો સાથે વાત કરતા ડોનાલ્ડ ટ્રમ્પે પુષ્ટિ કરી કે સમજૂતી પર સત્તાવાર મહોર લાગી ગઈ છે અને આ એક મોટી કૂટનીતિક સફળતા છે.

ટ્રમ્પની જાહેરાત બાદ ઈરાને પણ આ મેમોરેન્ડમને અંતિમ સ્વરૂપ આપવાની વાત સ્વીકારી છે. ઈરાનના વિદેશ મંત્રાલયના પ્રવક્તા ઈસ્માઈલ બકાઈએ સરકારી મીડિયા સંસ્થાન IRIB ને જણાવ્યું કે બંને પક્ષો દ્વારા ડિજિટલ સહીની પ્રક્રિયા પૂરી થતાં હવે આ સમજૂતી સત્તાવાર બની ગઈ છે. તેમણે સ્પષ્ટ કર્યું કે ડિજિટલ હસ્તાક્ષર માટે અગાઉથી જ સહમતિ બની હતી.

આ સમજૂતી સાથે હવે શુક્રવારે જિનેવામાં થનારા ઔપચારિક હસ્તાક્ષર સમારોહની ખાસ જરૂર રહી નથી. જોકે સ્વિટ્ઝર્લેન્ડમાં બંને દેશો વચ્ચેની વાતચીત નિર્ધારિત કાર્યક્રમ મુજબ જ આગળ વધશે. આ ડીલ થકી મોટા ફેરફારો જોવા મળશે.

ઈરાનમાં સત્તાવાર રીતે યુદ્ધનો અંત આવશે.

લેબનોનમાં પણ ચાલી રહેલો સંઘર્ષ રોકવાની વાત સ્વીકારવામાં આવી છે.

અમેરિકાએ પોતાની નૌકા નાકાબંધી હટાવી લીધી છે.

હોર્મુઝ સ્ટ્રેટ ફરીથી ખોલવાનો રસ્તો સાફ થઈ ગયો છે.

અમેરિકન મીડિયાના અહેવાલો મુજબ આ કરારને સફળ બનાવવામાં પાકિસ્તાન અને કતાર સહિતના દેશોએ મધ્યસ્થી તરીકે મહત્વની ભૂમિકા ભજવી છે. પાકિસ્તાનના વડાપ્રધાન શાહબાઝ શરીફે અગાઉ જણાવ્યું હતું કે તેમનો દેશ 19 જૂને સ્વિટ્ઝર્લેન્ડમાં યોજાનાર કાર્યક્રમની મેજબાની કરશે.

ધ ન્યૂયોર્ક ટાઈમ્સના રિપોર્ટ મુજબ શુક્રવાર 19 જૂન સુધીમાં હોર્મુઝ જળડમરુમધ્ય સંપૂર્ણપણે ખુલી જવાની શક્યતા છે. આંતરરાષ્ટ્રીય બજારમાં તેલ અને ગેસનો પુરવઠો ઝડપી અને સરળ બનાવવા માટે મોટા ટેન્કરોની અવરજવરને સૌથી વધુ પ્રાથમિકતા આપવામાં આવશે.