IND vs PAK: 3 મોટી ભૂલો જેણે પાકિસ્તાનની ઈજ્જત કાઢી, ભારત સામે હાર માટે કેપ્ટન સલમાન આગા વિલન

Ind vs Pak: ક્રિકેટના મેદાનમાં જ્યારે ભારત અને પાકિસ્તાન આમને-સામને હોય ત્યારે રોમાંચ તેની ચરમસીમા પર હોય છે. ટી20 વર્લ્ડ કપ 2026ના હાઈવોલ્ટેજ જંગમાં ભારતે ફરી એકવાર પાકિસ્તાનને ધૂળ ચટાડી છે. કોલંબોના આર. પ્રેમદાસા સ્ટેડિયમમાં રમાયેલી મેચમાં પાકિસ્તાનને 61 રને કારમી હારનો સામનો કરવો પડ્યો છે. આ હાર સાથે જ પાકિસ્તાન ભારત સામે આંતરરાષ્ટ્રીય ક્રિકેટમાં સતત 10મી મેચ હારી ગયું છે.

જોકે, આ હાર બાદ પાકિસ્તાની ક્રિકેટ ફેન્સ અને વિવેચકોનો ગુસ્સો સાતમા આસમાને છે અને તેમના નિશાના પર છે કેપ્ટન સલમાન આગા. મેચમાં ખેલાડીઓના ખરાબ પ્રદર્શન કરતા પણ વધારે ચર્ચા સલમાન આગાની નબળી કેપ્ટનશિપની થઈ રહી છે. ચાલો જાણીએ એવી 3 મોટી ભૂલો વિશે, જેણે પાકિસ્તાનની જીતની બાજી બગાડી નાખી.

1. ટોસ જીતીને બોલિંગ કરવાનો નિર્ણય ‘આત્મઘાતી' સાબિત થયો

કોલંબોના આર. પ્રેમદાસા સ્ટેડિયમની પીચનો ઈતિહાસ રહ્યો છે કે અહીં બીજી ઈનિંગમાં પીચ ધીમી પડી જાય છે અને સ્પિનરોને મદદ મળે છે. આ વાત જાણવા છતાં સલમાન આગાએ ટોસ જીતીને પહેલા ફિલ્ડિંગ કરવાનો નિર્ણય લીધો, જે સૌથી મોટું ‘બ્લન્ડર' સાબિત થયું.

2. લયમાં હોવા છતાં પોતાની બોલિંગ રોકી દીધી

મેચની શરૂઆતમાં સલમાન આગાએ એક શાનદાર લીડરની જેમ જવાબદારી લીધી હતી. તેણે પહેલી જ ઓવરમાં ખતરનાક ભારતીય ઓપનર અભિષેક શર્માને 0 રન પર આઉટ કરીને ભારતને મોટો ઝટકો આપ્યો હતો. તે સમયે બોલ ટર્ન થઈ રહ્યો હતો અને ભારતીય બેટ્સમેનો સલમાન સામે સંઘર્ષ કરી રહ્યા હતા.

પરંતુ અચાનક શું થયું તે કોઈને સમજાયું નહીં. આટલી જબરદસ્ત શરૂઆત પછી પણ સલમાને માત્ર એક ઓવર બાદ જ પોતાની જાતને બોલિંગ એટેકથી હટાવી લીધી. આ ભૂલનો સીધો ફાયદો તિલક વર્મા અને ઈશાન કિશનને મળ્યો. બંને મેદાન પર સેટ થઈ ગયા અને મિડલ ઓવરોમાં રનની ગતિ વધારી દીધી. જો સલમાને બોલિંગ ચાલુ રાખી હોત તો ભારત પર વધુ દબાણ બનાવી શકાયું હોત.

3. ‘એક્સ-ફેક્ટર' ઉસ્માન તારિકનો મોડો ઉપયોગ

પાકિસ્તાન પાસે ઉસ્માન તારિક જેવો મિસ્ટ્રી સ્પિનર હતો, જેને ટીમનું 'એક્સ-ફેક્ટર' માનવામાં આવતો હતો. જ્યારે ભારતીય બેટ્સમેનો સ્પિન સામે મુશ્કેલી અનુભવી રહ્યા હતા, ત્યારે તેને જલ્દી એટેક પર લાવવાની જરૂર હતી. પરંતુ અહીં પણ કેપ્ટન સલમાન થાપ ખાઈ ગયો.

તેણે ઉસ્માન તારિકને બોલિંગ માટે ત્યારે બોલાવ્યો જ્યારે ભારતીય બેટ્સમેનો ક્રિઝ પર જામી ગયા હતા અને મોટા શોટ્સ રમવા માટે તૈયાર હતા. જો પાવરપ્લે પૂરો થયા પછી તરત જ ઉસ્માનને લાવવામાં આવ્યો હોત, તો ભારતના મધ્યક્રમને વહેલો પેવેલિયન ભેગો કરી શકાયો હોત.

ક્રિકેટમાં એક નાની ભૂલ પણ હારનું કારણ બની શકે છે, અને અહીં તો કેપ્ટન સલમાન આગાએ એક પછી એક ત્રણ મોટી ભૂલો કરી. જેના પરિણામે ભારતે ફરી એકવાર પાકિસ્તાનને વર્લ્ડ કપ જેવા મોટા મંચ પર શરમજનક હાર આપી છે.

આ પણ વાંચો- Ahmedabad-Vadodara School Bomb Threat: સ્કૂલોને બોમ્બથી ઉડાવી દેવાની ધમકી મળતા હડકંપ, હજારો વિદ્યાર્થીઓને તાત્કાલિક ઘરે મોકલાયા