ભારતનું સ્વપ્ન: 5જી પેઢીનું સ્ટેલ્થ ફાઇટર જેટ AMCA બનાવવા સરકારે ઉઠાવ્યું મોટું પગલું

5th Generation Fighter Jet: ભારતે સંરક્ષણ ક્ષેત્રે ઐતિહાસિક પગલું ભરતાં 5જી પેઢીનું સ્ટેલ્થ ફાઇટર જેટ ‘એડવાન્સ્ડ મીડિયમ કોમ્બેટ એરક્રાફ્ટ’ (AMCA) બનાવવા માટે પ્રથમ પગલું ભર્યું છે. સરકારે આ મહત્વાકાંક્ષી પ્રોજેક્ટ માટે એક્સપ્રેશન ઓફ ઇન્ટરેસ્ટ (EoI) જાહેર કર્યું છે. આ પગલું ભારતને અમેરિકા અને ચીન જેવા દેશોની શ્રેણીમાં લઈ જશે, જે પાસે હાલમાં 5જી પેઢીના સ્ટેલ્થ ફાઇટર જેટ્સ છે.

AMCA પ્રોજેક્ટ શું છે?

એડવાન્સ્ડ મીડિયમ કોમ્બેટ એરક્રાફ્ટએ ભારતનું સ્વદેશી 5જી પેઢીનું સ્ટેલ્થ ફાઇટર જેટ છે, જે ભારતીય વાયુસેના અને નૌસેના માટે ડિઝાઇન અને વિકસાવવામાં આવશે. આ જેટ એર સુપ્રીમસી, ગ્રાઉન્ડ સ્ટ્રાઇક, ઇલેક્ટ્રોનિક વોરફેર અને એન્ટી-એર ડિફેન્સ જેવા મિશન માટે સક્ષમ હશે. આ પ્રોજેક્ટનો ઉદ્દેશ ભારતને સંરક્ષણ ક્ષેત્રે આત્મનિર્ભર બનાવવાનો છે, જેના માટે સરકારે 15,000 કરોડ રૂપિયાનું બજેટ પણ ફાળવ્યું છે.

EoI શું છે અને તેનું મહત્વ

એરોનોટિકલ ડેવલપમેન્ટ એજન્સી દ્વારા 18 જૂન 2025ના રોજ જાહેર કરાયેલું એક્સપ્રેશન ઓફ ઇન્ટરેસ્ટ (EoI) એ આ પ્રોજેક્ટનું પ્રથમ ઔપચારિક પગલું છે. આ EoI દ્વારા ભારતીય કંપનીઓને AMCAના પ્રોટોટાઇપ ડેવલપમેન્ટ, ફ્લાઇટ ટેસ્ટિંગ અને સર્ટિફિકેશન માટે બોલી લગાવવાનું આમંત્રણ આપવામાં આવ્યું છે.

બોલી લગાવવાની પ્રક્રિયા: કંપનીઓ એકલા, જોઇન્ટ વેન્ચર અથવા કન્સોર્શિયમના રૂપમાં બોલી લગાવી શકે છે, પરંતુ તેમણે ભારતીય કાયદાઓનું પાલન કરવું પડશે.

અંતિમ તારીખ: બોલી જમા કરવાની છેલ્લી તારીખ 16 ઓગસ્ટ 2025 છે, અને જુલાઈ 2025ના પ્રથમ સપ્તાહમાં પ્રી-EOI બ્રીફિંગ યોજાશે.