ઈરાનની અમેરિકાને ખુલ્લી ચેતવણી: ‘જો હુમલો કર્યો તો કયામત લાવી દઈશું', રાષ્ટ્રપતિ ટ્રમ્પને આપ્યો સીધો પડકાર

Iran US Conflict: અમેરિકા અને ઈરાન વચ્ચેનો તણાવ હવે ચરમસીમાએ પહોંચી ગયો છે. ઈરાને અમેરિકા સામે અત્યાર સુધીનું સૌથી મોટું અને આક્રમક નિવેદન આપ્યું છે. ઈરાનના વિદેશ મંત્રી અબ્બાસ અરાઘચીએ રાષ્ટ્રપતિ ડોનાલ્ડ ટ્રમ્પને ખુલ્લી ચેતવણી આપતા સ્પષ્ટ કર્યું છે કે, જો અમેરિકા ઈરાન પર ફરીથી કોઈપણ પ્રકારની સૈન્ય કાર્યવાહી કરશે, તો ઈરાન ‘પ્રલયકારી યુદ્ધ'નો સામનો કરવા માટે પૂરી રીતે તૈયાર છે. જોકે, આ આક્રમક વલણ વચ્ચે પણ ઈરાને શાંતિ અને કૂટનીતિના દરવાજા ખુલ્લા રાખ્યા છે.

આ નિવેદન ત્યારે સામે આવ્યું છે જ્યારે ડોનાલ્ડ ટ્રમ્પે વ્યૂહાત્મક રીતે અતિ મહત્વના દરિયાઈ માર્ગ 'સ્ટ્રેટ ઓફ હોર્મુઝ' ને ખોલવા અંગેના ઈરાનના પ્રસ્તાવને ફગાવી દીધો છે. અરાઘચીએ સ્પષ્ટ શબ્દોમાં કહ્યું છે કે હવે નિર્ણય રાષ્ટ્રપતિ ટ્રમ્પે લેવાનો છે કે તેઓ યુદ્ધ ઈચ્છે છે કે ટેબલ પર બેસીને વાતચીત.

‘ચૂંટણીઓથી અમને કોઈ ફરક નથી પડતો'

અમેરિકન ન્યૂઝ ચેનલ NBCના પ્રોગ્રામ 'મીટ ધ પ્રેસ' માં વાતચીત દરમિયાન અબ્બાસ અરાઘચીએ અમેરિકાની ધમકીઓને હળવાશથી લેતા નકારી કાઢી હતી. તેમણે કહ્યું, "અમે યુદ્ધ ફરી શરૂ થવાની સ્થિતિ માટે સંપૂર્ણપણે સજ્જ છીએ. જો અમારા પર કોઈ નવો હુમલો થાય છે, તો ભલે તે કયામત લાવનારું યુદ્ધ કેમ ન હોય, અમે મજબૂતાઈથી ઊભા રહીશું." તેમણે વધુમાં ઉમેર્યું કે, "અમેરિકાની ચૂંટણીઓ સાથે અમને કોઈ લેવાદેવા નથી, અમને માત્ર અમારા દેશના રાષ્ટ્રીય હિતોની જ પરવા છે. તેમ છતાં અમે કૂટનીતિ માટે તૈયાર છીએ. હવે પસંદગી રાષ્ટ્રપતિ ટ્રમ્પના હાથમાં છે."

શું હતો ઈરાનનો ‘7 દિવસનો પ્રસ્તાવ'?

ઈરાને કતારની મધ્યસ્થીથી અમેરિકા સામે એક ખાસ પ્રસ્તાવ મૂક્યો હતો. આ ડીલની મુખ્ય શરતો નીચે મુજબ હતી:

શરત 1: દુનિયાના સૌથી મહત્વપૂર્ણ દરિયાઈ માર્ગ 'સ્ટ્રેટ ઓફ હોર્મુઝ' ને 7 દિવસ માટે ખુલ્લો મૂકવામાં આવશે.

શરત 2: તેના બદલામાં અમેરિકાએ ઈરાનના આંતરરાષ્ટ્રીય સ્તરે ફ્રીઝ કરાયેલા ફંડ અને સંપત્તિ પાછા આપવા પડશે.

શરત 3: ઈરાનને કોઈપણ જાતના પ્રતિબંધ વિના પોતાનું કાચું તેલ (Crude Oil) આંતરરાષ્ટ્રીય બજારમાં વેચવાની મંજૂરી આપવામાં આવે.

શરત 4: આ શરતો મંજૂર થયા બાદ પરમાણુ કાર્યક્રમ અને અન્ય વિવાદિત મુદ્દાઓ પર વિસ્તારથી વાતચીત શરૂ કરવામાં આવે.

જોકે, અરાઘચીનું કહેવું છે કે બંને દેશો વચ્ચે થયેલા અસ્થાયી યુદ્ધવિરામ કરારના આધારે આ પ્રસ્તાવ મુકાયો હતો. છતાં હજુ સુધી રાજદ્વારી માધ્યમથી ડીલ રદ થયાની કોઈ સત્તાવાર જાણકારી ઈરાનને મળી નથી.

‘અમે આ યુદ્ધ બહુ જલ્દી જીતવાના છીએ': ડોનાલ્ડ ટ્રમ્પ

બીજી તરફ, રાષ્ટ્રપતિ ડોનાલ્ડ ટ્રમ્પ પોતાની આક્રમક રણનીતિ પર અડગ છે. ફોક્સ ન્યૂઝ સાથે વાત કરતા ટ્રમ્પે કહ્યું કે, "ઈરાન અત્યારે ભારે દબાણ હેઠળ છે અને તેઓ યુદ્ધ હારી રહ્યા છે. મેં તેમની આ ડીલ ફગાવી દીધી છે. તેઓ ખરાબ રીતે હારી રહ્યા હોવાથી જ 'સ્ટ્રેટ ઓફ હોર્મુઝ' ખોલવાની લાલચ આપીને ડીલ કરવા માંગે છે. મને લાગે છે કે બહુ જલ્દી આપણે આ યુદ્ધ સંપૂર્ણ રીતે જીતી લઈશું." ટ્રમ્પે એવો પણ દાવો કર્યો છે કે યુદ્ધ ખતમ થતા જ વૈશ્વિક બજારમાં કાચા તેલની કિંમતો ઝડપથી નીચે આવશે.

આગળ શું થશે: યુદ્ધ કે શાંતિ?

વિશ્વના વેપાર અને તેલ સપ્લાય માટે 'સ્ટ્રેટ ઓફ હોર્મુઝ' જીવાદોરી સમાન છે. ઈરાન પોતાની ડૂબતી અર્થવ્યવસ્થાને બચાવવા માટે ફંડ અને તેલ વેચવાની છૂટ માંગી રહ્યું છે, જ્યારે અમેરિકા ઈરાનના પરમાણુ કાર્યક્રમ અને તેની વધતી સૈન્ય તાકાત પર કાયમી લગામ લગાવવા માંગે છે.

અરાઘચીએ અંતમાં કહ્યું છે કે, ભલે અમેરિકાના વર્તમાન વલણને જોતા કૂટનીતિનો રસ્તો મુશ્કેલ લાગે છે, પરંતુ ઈરાન શાંતિની કોઈ પણ તક ગુમાવવા માંગતું નથી. હવે આખી દુનિયાની નજર અમેરિકા પર છે કે તે તબાહી મચાવતા યુદ્ધનો રસ્તો પસંદ કરે છે કે પછી વાતચીતથી ઉકેલ લાવે છે.