સાવધાન! તમારા ઘરમાં આવતું દૂધ ઝેર તો નથી ને? ગુજરાતમાં 6 મહિનામાં 20000 લીટર નકલી દૂધ ઝડપાયું

Fake milk Gujarat: ગુજરાતમાં દરરોજ સવારે ઘરે આવતું સફેદ દૂધ હવે જીવલેણ બની ગયું છે. વિકાસના દાવાઓ વચ્ચે રાજ્યના નાગરિકો અને ખાસ કરીને માસૂમ બાળકોના સ્વાસ્થ્ય સાથે ખુલ્લેઆમ ખિલવાડ થઈ રહ્યો છે. તાજેતરના આંકડા મુજબ, રાજ્યમાં માત્ર છેલ્લા 6 મહિનાની અંદર જ 20 હજાર લીટર કરતાં વધુ નકલી અને ભેળસેળવાળું દૂધ પકડાયું છે. આ આંકડો સાબિત કરે છે કે સફેદ દૂધનો આ કાળો કારોબાર કેટલી હદે બેફામ બની ચૂક્યો છે.

નકલી દૂધ બનાવવાની ભયાનક રીત

મોટાભાગના લોકોને એ ખબર નથી હોતી કે તેઓ જે દૂધ પી રહ્યા છે તે ખરેખર ફેક્ટરીમાં બનતું એક કેમિકલ છે. માફિયાઓ આ નકલી દૂધ બનાવવા માટે ખતરનાક વસ્તુઓનો ઉપયોગ કરે છે:

ફેટ માટે: દૂધમાં ચરબીનું પ્રમાણ વધુ બતાવવા માટે સસ્તું પામોલીન તેલ, સોયાબીન તેલ અથવા વનસ્પતિ ઘીનો મોટા પાયે ઉપયોગ થાય છે.

ટેસ્ટિંગ પાસ કરવા માટે: દૂધમાં લેક્ટોઝ અને SNF ની માત્રા જાળવી રાખવા માટે યુરિયા, ખાંડ અને ગ્લુકોઝ ઉમેરાય છે.

દૂધ બગડે નહીં તે માટે: પ્રિઝર્વેટિવ તરીકે હાઇડ્રોજન પેરોક્સાઇડ અને ફોર્માલિન જેવા જીવલેણ કેમિકલ ભેળવવામાં આવે છે.

અમૃત સમાન દૂધ બન્યું મોતનું કારણ

નવજાત શિશુઓ અને બાળકોના શારીરિક વિકાસ માટે દૂધ ખૂબ જ જરૂરી છે, પરંતુ આજે તેમના ગ્લાસમાં દૂધ નહીં પણ કેમિકલ, યુરિયા અને ડિટર્જન્ટનું મિશ્રણ પીરસાઈ રહ્યું છે. આવું ઝેરીલું દૂધ પીવાથી શરીરને ભારે નુકસાન થાય છે. આનાથી ફૂડ પોઈઝનિંગ, લિવર અને કિડની ફેલ થવી, હૃદયની બીમારીઓ, બ્લડ પ્રેશર અને કેન્સર જેવી ગંભીર બીમારીઓ થવાનું જોખમ અનેકગણું વધી જાય છે.

કડક કાયદો, પણ તપાસ સાવ નબળી

દેશમાં ‘ધ ફૂડ સેફ્ટી એન્ડ સ્ટાન્ડર્ડ્સ એક્ટ, 2006' લાગુ છે. જેમાં લોકોના જીવ સાથે રમનારા આવા ભેળસેળિયાઓ માટે આજીવન કેદ અને મોટા દંડની જોગવાઈ છે. પરંતુ કમનસીબે આ બધી કડકાઈ માત્ર કાગળ પર જ સીમિત રહી ગઈ છે.

તંત્ર દ્વારા લેવાતા દૂધના સેમ્પલ માત્ર એક ઔપચારિક નાટક બની ગયા હોય તેવું લાગે છે. કાયદાની છટકબારીઓ અને તંત્રની નબળી તપાસનો સીધો ફાયદો આ માફિયાઓને મળે છે. સજા થવાનો કોઈ ડર ન હોવાથી આ મોતના સોદાગરો બેખોફ બનીને પોતાનો કાળો ધંધો ચલાવી રહ્યા છે.

આ પણ વાંચો- ટેક્સીની જેમ બુક થાય છે ‘પ્રાઇવેટ જેટ‘! અમદાવાદમાં ચાર્ટર પ્લેનની માંગમાં ઉછાળો, મહિને 200 ફ્લાઈટની અવરજવર

ગુજરાતમાં ઝડપાયેલું 20000 લીટર નકલી દૂધ તો માત્ર એક નાની ઝલક છે. જો તંત્ર હજુ પણ કડક હાથે કામ નહીં લે, તો આવનારી પેઢીઓ આ સફેદ ઝેરનો શિકાર બનતી રહેશે. નાગરિકોએ પણ હવે જાગૃત થઈને પોતાના ઘરે આવતા દૂધની શુદ્ધતા જાતે જ ચકાસવી પડશે.