Amazon સહિતની Tech કંપનીઓમાં છટણીનો દોર: શું નોકરીઓ જવા પાછળ ખરેખર AI જવાબદાર છે કે બીજું જ કંઈ કારણ? જાણો સત્ય

Tech Layoffs 2026: નવા વર્ષ 2026ની શરૂઆત ટેક ઇન્ડસ્ટ્રીમાં કામ કરતા કર્મચારીઓ માટે થોડી ચિંતાજનક રહી છે. દુનિયાભરની મોટી કંપનીઓમાં કર્મચારીઓની છટણીનો સિલસિલો અટકવાનું નામ નથી લઈ રહ્યો. ખાસ કરીને Amazon જેવી દિગ્ગજ કંપનીના તાજેતરના નિર્ણયોએ બધાને ચોંકાવી દીધા છે.

Amazon અને Oracleમાં મોટી છટણી

હાલમાં જ Amazon એ વૈશ્વિક સ્તરે 16,000 જેટલા કોર્પોરેટ કર્મચારીઓને છૂટા કરવાની જાહેરાત કરી છે. તમને જણાવી દઈએ કે ઓક્ટોબર 2025માં પણ કંપનીએ 14,000 લોકોને નોકરીમાંથી કાઢ્યા હતા. આમ જોવા જઈએ તો કુલ આંકડો 30,000ને પાર થઈ ગયો છે. માત્ર એમેઝોન જ નહીં, પરંતુ Oracle જેવી કંપનીમાં પણ 20,000થી 30,000 જેટલી નોકરીઓ કપાવાની શક્યતા છે. Pinterest, Expedia અને Dow જેવી કંપનીઓએ પણ મોટી સંખ્યામાં સ્ટાફ ઓછો કર્યો છે.

શું AI જ એકમાત્ર વિલન છે?

Pinterest: કંપનીએ સ્પષ્ટ કહ્યું કે તેમણે 15% સ્ટાફ એટલા માટે ઘટાડ્યો જેથી તે પૈસા અને સંસાધનો AI પ્રોજેક્ટ્સમાં લગાવી શકે.

Expedia: અહીં સ્થિતિ થોડી અલગ છે. કંપની AI અપનાવવાની વાત કરે છે, પરંતુ નવાઈની વાત એ છે કે તેમણે AI અને મશીન લર્નિંગના નિષ્ણાતોને પણ નોકરીમાંથી કાઢ્યા છે, જે થોડું વિરોધાભાસી લાગે છે.

Dow: આ કંપનીએ સ્પષ્ટ કહ્યું કે તેઓ પ્રોડક્ટિવિટી વધારવા અને શેરધારકોને સારો નફો આપવા માટે AI અને ઓટોમેશન તરફ વળ્યા છે, જેના કારણે 4,500 લોકોની છટણી થઈ.

એમેઝોનનું શું કહેવું છે?

Amazonના CEO એન્ડી જેસી (Andy Jassy)નું કહેવું છે કે AIથી કામમાં ઝડપ અને કાર્યક્ષમતા આવે છે, તેથી ઓછા લોકોની જરૂર પડે છે. જોકે, તેમણે એમ પણ કહ્યું કે કંપની બિનજરૂરી અમલદારશાહી ઘટાડવા અને 'સ્ટાર્ટઅપ' જેવી ઝડપ લાવવા માંગે છે. આ ઉપરાંત, Amazon Go અને Fresh સ્ટોર્સ બંધ થવાને કારણે પણ હજારો લોકોની નોકરી ગઈ છે, જેનું સીધું કારણ AI નથી.

નિષ્ણાતો અને પૂર્વ કર્મચારીઓનો શું મત છે?

આ આખી ઘટનામાં નિષ્ણાતોનો મત કંઈક અલગ જ છે. એક રિપોર્ટ અનુસાર, એમેઝોનની AI ટીમના પૂર્વ વડા એન લી પ્લમ, જેમને હાલમાં જ કાઢી મૂકવામાં આવ્યા હતા, તેમણે કહ્યું કે તેમની છટણીને AI સાથે કોઈ લેવાદેવા નથી. તેઓ તો ઉલટાનું AI ટૂલ્સનો સૌથી વધુ ઉપયોગ કરતા હતા.

તેમનું માનવું છે કે કંપનીઓ વધારાના સ્ટાફને દૂર કરવા માટે AI નું નામ આગળ ધરી રહી છે. જ્યારે કંપનીઓ કહે છે કે તેઓ AI પર ફોકસ કરી રહી છે, ત્યારે શેરબજારમાં તેમના ભાવ વધે છે અને રોકાણકારો ખુશ થાય છે. કોર્નેલ યુનિવર્સિટીના પ્રોફેસર કરણ ગીરોત્રાના મતે, હાલમાં AI નો પ્રભાવ સીમિત છે. તે વ્યક્તિગત કામ સરળ બનાવે છે, પણ આખી ટીમને બદલવામાં હજુ વાર લાગશે.

નિષ્ણાતો માને છે કે કોવિડ દરમિયાન ટેક કંપનીઓએ જરૂર કરતા વધારે ભરતી કરી લીધી હતી, અને હવે તે બેલેન્સ કરી રહી છે. ગોલ્ડમેન સૅક્સનો રિપોર્ટ પણ કહે છે કે માર્કેટિંગ અને ગ્રાફિક ડિઝાઈન જેવા ક્ષેત્રોમાં AI ની અસર દેખાય છે, પરંતુ મોટા પાયે નોકરીઓ જવા પાછળ હજુ AI મુખ્ય કારણ નથી.

ટેક કર્મચારીઓ માટે 2026નું વર્ષ પડકારજનક છે. AI ભલે ભવિષ્યમાં મોટી તકો લાવશે, પરંતુ હાલમાં તો તે બદલાવનું કારણ બની રહ્યું છે. નિષ્ણાતોનું માનવું છે કે AIની સાચી અસર આવનારા વર્ષોમાં વધુ સ્પષ્ટ થશે. હાલમાં તો કંપનીઓ ખર્ચ ઘટાડવા અને નફો વધારવા માટે ‘AI સ્ટોરી'નો ઉપયોગ કરી રહી હોય તેવું ચિત્ર ઉપસી રહ્યું છે.

આ પણ વાંચો- સિંગતેલના ભાવમાં ભડકો: સોના-ચાંદી જેવી સટ્ટાખોરી? 310 રૂપિયાના તોતિંગ વધારા સામે માત્ર 40 રૂપિયાનો ઘટાડો!