Layoffs: એમેઝોનમાં નોકરી પર સંકટ! આવતા અઠવાડિયે હજારો કર્મચારીઓની છટણી નક્કી, જાણો શું છે કારણ?

Amazon Layoffs: ટેક સેક્ટરમાં કામ કરતા કર્મચારીઓ માટે ફરી એકવાર ચિંતાજનક સમાચાર સામે આવ્યા છે. દુનિયાની સૌથી મોટી ઈ-કોમર્સ કંપનીઓમાંની એક એમેઝોન (Amazon) હવે ફરી એકવાર મોટા પાયે છટણી કરવા જઈ રહી છે. લેટેસ્ટ રિપોર્ટ્સ અનુસાર, કંપની આવતા અઠવાડિયાથી જ હજારો કર્મચારીઓને 'બહારનો રસ્તો' બતાવી શકે છે. આ સમાચાર આવતાની સાથે જ ગ્લોબલ ટેક ઇન્ડસ્ટ્રીમાં નોકરી કરતા લોકોમાં ફરી અસલામતીની ભાવના જાગી છે.

30,000 કર્મચારીઓ પર લટકતી તલવાર?

એક રિપોર્ટ અને અન્ય સૂત્રોના જણાવ્યા મુજબ, એમેઝોન આગામી સપ્તાહમાં છટણીનો નવો રાઉન્ડ શરૂ કરી શકે છે. આ વખતે સૌથી મોટો ફટકો કંપનીના કોર્પોરેટ સ્ટાફને પડે તેવી શક્યતા છે. એમેઝોન પાસે લગભગ 3.5 લાખ કોર્પોરેટ કર્મચારીઓ છે, જેમાંથી કંપની આશરે 30,000 જેટલા કર્મચારીઓની સંખ્યા ઘટાડવાનું આયોજન કરી રહી છે.

જોકે, છટણીનો ચોક્કસ આંકડો અને તેનો પૂરો વ્યાપ હજુ સત્તાવાર રીતે જાહેર થયો નથી, અને કંપનીની વ્યૂહરચનામાં છેલ્લી ઘડીએ ફેરફાર પણ થઈ શકે છે. પરંતુ અત્યાર સુધીના સંકેતો મુજબ આ કપાત ઘણી મોટી હોઈ શકે છે.

સૌથી મોટો પ્રશ્ન એ છે કે કયા ડિપાર્ટમેન્ટના લોકોની નોકરી જોખમમાં છે? મળતી માહિતી મુજબ, નીચે આપેલા વિભાગો આ છટણીની ઝપેટમાં આવી શકે છે:

* એમેઝોન વેબ સર્વિસીસ (AWS)

* રિટેલ ડિવિઝન

* પ્રાઈમ વીડિયો (Prime Video)

* હ્યુમન રિસોર્સિસ (HR)

આ છટણીની અસર માત્ર અમેરિકામાં જ નહીં, પરંતુ ભારત સહિત અન્ય દેશોમાં કામ કરતા એમેઝોનના કર્મચારીઓ પર પણ જોવા મળી શકે છે.

ખર્ચ ઘટાડવા અને AI પર કંપનીનું ફોકસ

કંપની શા માટે આટલા મોટા પાયે લોકોને છૂટા કરી રહી છે? તેના મુખ્ય બે કારણો સામે આવ્યા છે - ખર્ચમાં ઘટાડો અને ટેકનોલોજીમાં બદલાવ.

મેનેજમેન્ટ લેયર્સ: કંપની પોતાના માળખાને વધુ ચુસ્ત બનાવવા માંગે છે અને બિનજરૂરી મેનેજમેન્ટ લેયર્સ (વધારાના હોદ્દાઓ) દૂર કરવા માંગે છે.

AI તરફ ઝુકાવ: એમેઝોન હવે આર્ટિફિશિયલ ઇન્ટેલિજન્સ (AI) અને ક્લાઉડ ટેકનોલોજી પર મોટું રોકાણ કરી રહી છે. જેના કારણે એક તરફ AI અને ડેટાને લગતા પદો પર નવી ભરતી થઈ રહી છે, તો બીજી તરફ પરંપરાગત રોલ નિભાવતા કર્મચારીઓની છટણી કરવામાં આવી રહી છે.

ઉલ્લેખનીય છે કે, થોડા મહિના પહેલા જ એમેઝોને 14,000 પદો ખતમ કરવાની જાહેરાત કરી હતી અને સંકેત આપ્યો હતો કે 2026 સુધીમાં વધુ છટણી થઈ શકે છે.

કંપનીનું વર્કફોર્સ અને અગાઉની છટણી

રિપોર્ટના આંકડાઓ પર નજર કરીએ તો, 30 સપ્ટેમ્બર 2025 સુધી એમેઝોનમાં કુલ 15.7 લાખ કર્મચારીઓ કામ કરી રહ્યા હતા. જેમાં મોટી સંખ્યા વેરહાઉસ સ્ટાફની છે. અગાઉ 2022ના અંતમાં અને 2023ની શરૂઆતમાં પણ કંપનીએ લગભગ 27,000 કર્મચારીઓને છૂટા કર્યા હતા.

એમેઝોન એકલી એવી કંપની નથી જે આ રસ્તે છે. સમગ્ર ટેક ઇન્ડસ્ટ્રી અત્યારે પરિવર્તનના સમયગાળામાંથી પસાર થઈ રહી છે. કંપનીઓ AI ને ભવિષ્ય માનીને નવી રણનીતિઓ બનાવી રહી છે, જેના કારણે હજારો જૂના કર્મચારીઓની નોકરીઓ પર સંકટ આવ્યું છે. એમેઝોનની આ નવી હિલચાલ ટેક સેક્ટરમાં ડરના માહોલને વધુ ઘેરો બનાવી રહી છે.

આ પણ વાંચો - સોના-ચાંદીના ભાવે તોડ્યા તમામ રેકોર્ડ: ચાંદીમાં 12,638નો તોતિંગ ઉછાળો, સોનું 1.59 લાખને પાર