સિક્કિમમાં મોટું ભૂસ્ખલન: 1000થી વધુ પર્યટકો ફસાયા, તમામ ટ્રાવેલ પરમિટ રદ, ભારે વરસાદથી રસ્તાઓ બંધ

સિક્કિમમાં મોટું ભૂસ્ખલન: ઉત્તર સિક્કિમમાં ભારે ભૂસ્ખલનને કારણે લગભગ 1,000 પર્યટકો વિવિધ સ્થળોએ ફસાઈ ગયા છે. પ્રશાસને આગળના આદેશ સુધી તમામ ટ્રાવેલ પરમિટ રદ કરી દીધા છે. વિસ્તારમાં સતત ભારે વરસાદને કારણે ભૂસ્ખલનની ઘટનાઓ સામે આવી રહી છે, જેના કારણે ઉત્તર સિક્કિમના તમામ પર્યટન માર્ગો પર અવરજવર સંપૂર્ણપણે બંધ કરી દેવામાં આવી છે.

ભૂસ્ખલનની વિગતો

મળતી માહિતી અનુસાર, લગાતાર વરસાદને કારણે લાચેન-ચુંગથાંગ માર્ગ પર મુંશીથાંગ અને લાચુંગ-ચુંગથાંગ માર્ગ પર લેમા/બોબ નજીક મોટા પાયે ભૂસ્ખલન થયું છે. આ બંને માર્ગો ઉત્તર સિક્કિમના મુખ્ય પર્યટન સ્થળો જેવા કે લાચેન, લાચુંગ અને યુમથાંગને ગંગટોક સાથે જોડે છે.

તંત્રએ નિવેદન જાહેર કર્યું

મંગન જિલ્લાના પોલીસ અધિક્ષક સોનમ ડેચુ ભૂટિયાએ સમાચાર એજન્સી ANIને જણાવ્યું, “ભારે વરસાદને કારણે મુંશીથાંગ અને લેમા/બોબ નજીક મોટું ભૂસ્ખલન થયું છે. હાલ ચુંગથાંગ સુધીનો માર્ગ ખુલ્લો છે, પરંતુ ભારે વરસાદને કારણે રાત્રે મુસાફરી અસુરક્ષિત બની ગઈ છે. આથી આવતીકાલ માટે કોઈ નવી પરમિટ જારી કરવામાં આવશે નહીં અને અગાઉ જારી કરાયેલી તમામ પરમિટ રદ ગણાશે.”

પર્યટકોની સ્થિતિ

પોલીસ અધિકારીઓએ પુષ્ટિ કરી છે કે લગભગ 200 વાહનો ચુંગથાંગમાં ફસાયેલા છે, જેમાં મુસાફરો અસ્થાયી રૂપે સ્થાનિક ગુરુદ્વારામાં રોકાયા છે. ચુંગથાંગ ગંગટોકથી લગભગ 100 કિલોમીટર દૂર આવેલું છે. ભૂસ્ખલનને કારણે ઘણી જગ્યાએ રસ્તાઓ તૂટી ગયા છે, જેના કારણે મુસાફરી અત્યંત જોખમી બની ગઈ છે.

તંત્રની અપીલ

પ્રશાસને પર્યટકો અને સ્થાનિક લોકોને આ માર્ગો પર મુસાફરી ન કરવાની અપીલ કરી છે, કારણ કે વધુ ભૂસ્ખલન અથવા રસ્તા ધસી પડવાની શક્યતા છે. આ ઋતુમાં ઉત્તર સિક્કિમમાં પર્યટકોની ભીડ હોય છે, પરંતુ આ આફતે માત્ર ટ્રાફિક જ નહીં, પરંતુ સ્થાનિક વ્યવસાયો અને પર્યટન ઉદ્યોગ પર પણ મોટી અસર કરી છે.

બચાવ કાર્ય પૂરજોશમાં ચાલુ

રાહત અને બચાવ કાર્ય માટે ટીમો તૈનાત કરવામાં આવી છે. હવામાન વિભાગની દેખરેખ હેઠળ સ્થિતિનું મૂલ્યાંકન કરવામાં આવી રહ્યું છે. પ્રશાસન ફસાયેલા પર્યટકોને સુરક્ષિત સ્થળોએ પહોંચાડવાની યોજના બનાવી રહ્યું છે.

આ પણ વાંચો - Pahalgam Terror Attack: પાકિસ્તાનના મંત્રીનું વિવાદાસ્પદ નિવેદન, પહેલગામના આતંકવાદીઓને ગણાવ્યા ‘સ્વતંત્રતા સેનાની’