બર્લિનમાં પીયૂષ ગોયલે યુરોપિયન દેશોને બરાબરના સંભળાવ્યા: કાર્બન ટેક્સ પર આંકડા આપીને બોલતી બંધ કરી દીધી

Piyush Goyal speech: કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે યુરોપિયન યુનિયનની કાર્બન ટેક્સ નીતિઓ પર આકરા પ્રહારો કર્યા છે. બર્લિન ગ્લોબલ ડાયલોગમાં બોલતા તેમણે યુરોપિયન દેશોને સ્પષ્ટ શબ્દોમાં સંભળાવી દીધું કે સ્ટીલ અને અન્ય ઉત્પાદનો પર કાર્બન ટેક્સ લગાવીને યુરોપ પોતાના જ પગ પર કુહાડી મારી રહ્યું છે.

યુરોપ પોતાના જ દેશોમાં મોંઘવારી વધારશે

ગોયલે જણાવ્યું કે યુરોપિયન યુનિયન કાર્બન બોર્ડર એડજસ્ટમેન્ટ મિકેનિઝમ (CBAM) હેઠળ આયાત થતા સ્ટીલ પર 50% જેટલો ભારે ટેક્સ લગાવી રહ્યું છે. આનાથી યુરોપને જ નુકસાન થશે. જ્યારે યુરોપમાં નવા એરપોર્ટ, બંદર, હાઈવે કે પાણીની પાઈપલાઈન બનશે, ત્યારે તેમાં વપરાતું સ્ટીલ, સિમેન્ટ અને એલ્યુમિનિયમ ખૂબ મોંઘુ પડશે. આ બિનજરૂરી નિયમોને કારણે યુરોપમાં જીવનનિર્વાહનો ખર્ચ અને મોંઘવારી વધશે.

75 થી 77 નવા નિયમો અને વળતા પ્રહારની ચેતવણી

પીયૂષ ગોયલે જણાવ્યું કે યુરોપે વેપાર માટે 75 થી 77 જેટલા નવા નિયમો થોપી દીધા છે. સતત નવા પ્રતિબંધો લગાવીને યુરોપ પોતાના જ ઉદ્યોગોને નબળા પાડી રહ્યું છે. તેમણે આડકતરી રીતે ચેતવણી પણ આપી કે આજની દુનિયા 'જેવા સાથે તેવા' ના સિદ્ધાંત પર ચાલે છે. જો યુરોપ અન્ય દેશોના વેપારમાં અડચણ ઊભી કરવા એક નિયમ લાવશે, તો સામે વાળો દેશ તેમના વેપારને નુકસાન પહોંચાડવા બે નવા નિયમો લાવી શકે છે.

આંકડાઓ આપીને યુરોપનો અરીસો બતાવ્યો

પર્યાવરણ અને કાર્બન ઉત્સર્જનના મુદ્દે ગોયલે પશ્ચિમી દેશોને તેમનો અસલી ચહેરો બતાવ્યો. તેમણે સવાલ કર્યો કે, "આખી દુનિયાના પર્યાવરણને નુકસાન કોણે પહોંચાડ્યું? ઓઝોન લેયરમાં ગાબડાં કોણે પાડ્યા?" ગોયલે આંકડા આપતા કહ્યું કે, દુનિયાની 17% વસ્તી ભારતમાં રહે છે, છતાં વૈશ્વિક કાર્બન ઉત્સર્જનમાં ભારતનો હિસ્સો માત્ર 3 થી 3.5% છે. બીજી તરફ, યુરોપની વસ્તી દુનિયાની માત્ર 3 થી 4% છે, પણ તેમનું કાર્બન ઉત્સર્જન ઘણું વધારે છે. આજે પણ યુરોપની સરખામણીમાં ભારતનું પ્રતિ વ્યક્તિ કાર્બન ઉત્સર્જન 10 થી 15% કરતા પણ ઓછું છે. પર્યાવરણ પર યુરોપની અસર ભારત કરતા 7 થી 8 ગણી વધારે છે.