PM Modi and Trump Deal: ટ્રમ્પે આપી મોટી ભેટ, ટેક્સ 25%થી ઘટાડીને 18% કર્યો - મોદીને ગણાવ્યા ‘બેસ્ટ ફ્રેન્ડ'

India US Trade Deal: ભારત અને અમેરિકાના સંબંધોમાં એક નવો અને ઐતિહાસિક અધ્યાય ઉમેરાયો છે. ભારતને કૂટનીતિક સ્તરે એક મોટી જીત મળી છે, કારણ કે અમેરિકાએ ભારતીય નિકાસ પર લાગતા ટેક્સમાં મોટો ઘટાડો કરવાની જાહેરાત કરી છે. આ ડીલ બાદ વડાપ્રધાન નરેન્દ્ર મોદી અને અમેરિકી રાષ્ટ્રપતિ ડોનાલ્ડ ટ્રમ્પ વચ્ચે થયેલી વાતચીત અને નિર્ણયો હાલ ચર્ચાના કેન્દ્રમાં છે.

પીએમ મોદીનો ખાસ સંદેશ: ‘આત્મવિશ્વાસથી જ બનશે વિકસિત ભારત'

આ ઐતિહાસિક વ્યાપારી સમજૂતી બાદ વડાપ્રધાન નરેન્દ્ર મોદીએ સોશિયલ મીડિયા પ્લેટફોર્મ X પર દેશવાસીઓ માટે એક ખાસ સંદેશ શેર કર્યો છે. તેમણે સંસ્કૃતના શ્લોકો સાથેનો એક વીડિયો પોસ્ટ કરીને લખ્યું છે કે, "આત્મવિશ્વાસ એ જ શક્તિ છે, જેની મદદથી બધું જ શક્ય છે."

પીએમ મોદીએ ભારપૂર્વક કહ્યું કે દેશવાસીઓનો આ જ આત્મવિશ્વાસ ‘વિકસિત ભારત'ના સપનાને હકીકતમાં બદલવામાં સૌથી મોટી ભૂમિકા ભજવશે. પીએમ મોદીનું આ નિવેદન એવા સમયે આવ્યું છે જ્યારે ભારતને અમેરિકા સાથેના વેપારમાં મોટી રાહત મળી છે.

આ ટ્રેડ ડીલની સત્તાવાર જાહેરાત ખુદ અમેરિકી રાષ્ટ્રપતિ ડોનાલ્ડ ટ્રમ્પે કરી છે. પીએમ મોદી સાથે ફોન પર વાત કર્યા બાદ ટ્રમ્પે પોતાના સોશિયલ મીડિયા પ્લેટફોર્મ ‘ટ્રુથ સોશિયલ' પર જાણકારી આપી હતી. ટ્રમ્પે પીએમ મોદીને પોતાના 'સૌથી સારા મિત્ર' (Best Friend) ગણાવતા કહ્યું કે, ભારતીય સામાન પર લાગતો ટેરિફ જે પહેલા 25% હતો, તે હવે ઘટાડીને 18% કરી દેવામાં આવ્યો છે.

आत्मविश्वास वह शक्ति है, जिसके बल पर सब कुछ संभव है। विकसित भारत के सपने को साकार करने में देशवासियों की यही शक्ति बहुत काम आने वाली है। श्रीर्मङ्गलात् प्रभवति प्रागल्भ्यात् सम्प्रवर्धते। दाक्ष्यात् तु कुरुते मूलं संयमात् प्रतितिष्ठति॥ pic.twitter.com/FcQqHbSvI9

— Narendra Modi (@narendramodi) February 3, 2026

ટ્રમ્પના જણાવ્યા મુજબ, આ નિર્ણય બંને દેશો વચ્ચે ઉર્જા સહયોગ અને ભૌગોલિક રાજકીય લક્ષ્યોને ધ્યાનમાં રાખીને લેવામાં આવ્યો છે. આ ફોન કોલ દરમિયાન માત્ર વેપાર જ નહીં, પરંતુ રશિયા-યુક્રેન યુદ્ધ જેવા ગંભીર વૈશ્વિક મુદ્દાઓ પર પણ ચર્ચા થઈ હતી.

ભારતની ઉર્જા નીતિમાં મોટો ફેરફાર: રશિયાને બદલે અમેરિકાથી તેલ?

આ ડીલના બદલામાં ભારતે એક મોટો નિર્ણય લીધો હોવાનું સામે આવ્યું છે. રાષ્ટ્રપતિ ટ્રમ્પના દાવા મુજબ, પીએમ મોદી રશિયા પાસેથી તેલ ખરીદવાનું બંધ કરવા અને તેના બદલે અમેરિકા તેમજ વેનેઝુએલા પાસેથી તેલની ખરીદી વધારવા માટે સંમત થયા છે.

આ પગલું ભારત અને અમેરિકાના આર્થિક સંબંધોને નવી ઊંચાઈ પર લઈ જશે. જોકે, ભારતે હંમેશા સ્પષ્ટ કર્યું છે કે તેલ ખરીદવા સંબંધિત તેના નિર્ણયો રાષ્ટ્રીય હિત અને બજારની સ્થિતિ પર આધારિત હોય છે. હવે આ નવા કરારથી ભારત અમેરિકન માર્કેટમાં એક મુખ્ય બિઝનેસ પાર્ટનર તરીકે ઉભરી આવ્યું છે.

જયશંકર જશે અમેરિકા: ખનિજ અને રોકાણ પર થશે વાત

આ મહત્વપૂર્ણ ઘટનાક્રમ વચ્ચે ભારતના વિદેશ મંત્રી એસ. જયશંકર આ અઠવાડિયે અમેરિકાની મુલાકાતે જઈ રહ્યા છે. તેઓ વોશિંગ્ટનમાં અમેરિકી વિદેશ મંત્રી માર્કો રુબિયો દ્વારા આયોજિત 'ક્રિટિકલ મિનરલ્સ' (મહત્વપૂર્ણ ખનિજો) ની બેઠકમાં ભાગ લેશે. આ મુલાકાત દરમિયાન ભારત અને અમેરિકા વચ્ચે ખનિજ, રોકાણ અને સંરક્ષણ ક્ષેત્રે સંબંધો વધુ મજબૂત કરવા પર ચર્ચા થશે.

આ પણ વાંચો- Caste Census India: વસતી ગણતરીમાં હવે જ્ઞાતિ નક્કી કરવા પૂરાવા આપવા પડશે? સુપ્રીમ કોર્ટે કેન્દ્ર સરકારને આપી મોટી સલાહ