પેપર લીક કૌભાંડ પર PM મોદી એક્શન મોડમાં: રાતોરાત લીધો મોટો નિર્ણય, ફાસ્ટ ટ્રેક કોર્ટ અને કડક સજાનો કાયદો આવશે

PM Modi video message: જંતર મંતર પર ચાલી રહેલા આંદોલન વચ્ચે પેપર લીક મામલે એક મોટા સમાચાર સામે આવ્યા છે. વડાપ્રધાન નરેન્દ્ર મોદીએ મધ્યરાત્રિએ એક વીડિયો સંદેશ જાહેર કરીને પેપર લીક કૌભાંડ મુદ્દે અત્યંત કડક વલણ દાખવ્યું છે. તેમણે સ્પષ્ટ કર્યું છે કે ભવિષ્યમાં આવી ઘટનાઓ રોકવા અને ગુનેગારોને પાઠ ભણાવવા સરકાર કોઈ કચાશ નહીં છોડે.

પીએમ મોદીનો વિદ્યાર્થીઓને સીધો સંદેશ

વિદ્યાર્થીઓ અને દેશની જનતાને સંબોધતા પીએમ મોદીએ કહ્યું કે, પેપર લીક થવું એ કોઈ નાની કે સામાન્ય બાબત નથી. આનાથી લાખો વિદ્યાર્થીઓ અને તેમના માતા-પિતાને ભારે માનસિક ત્રાસ સહન કરવો પડે છે. તેમણે ખાતરી આપી છે કે આ કૌભાંડમાં સંડોવાયેલા કોઈપણ ગુનેગારને બક્ષવામાં નહીં આવે અને તેમની સામે કડકમાં કડક કાર્યવાહી થશે.

છેલ્લા 2.5 મહિનામાં બનેલી ઘટનાઓનો ઉલ્લેખ કરતા પીએમએ જણાવ્યું કે, સરકારે તાત્કાલિક પગલાં લઈને દોષિતોને પકડીને જેલના સળિયા પાછળ ધકેલી દીધા છે. સરકારની સૌથી મોટી પ્રાથમિકતા એ હતી કે વિદ્યાર્થીઓનું એક કિંમતી વર્ષ બગડે નહીં. તેથી જ ખૂબ જ ઓછા સમયમાં 22 લાખ વિદ્યાર્થીઓની પરીક્ષા ફરીથી લેવાની વ્યવસ્થા કરવામાં આવી અને 19 તારીખે તેના પરિણામો પણ જાહેર કરી દેવાયા છે.

More strict actions against paper leaks to come in tomorrow’s Cabinet! pic.twitter.com/NRysBukk5U

— Narendra Modi (@narendramodi) July 23, 2026

ફાસ્ટ ટ્રેક કોર્ટ અને કડક સજા માટે નવો કાયદો તૈયાર

સરકાર માત્ર અત્યાર સુધી થયેલી કાર્યવાહીથી અટકવાની નથી. પીએમ મોદીએ એક મોટો નિર્ણય લેતા સંબંધિત વિભાગોને પેપર લીકના કેસ ઝડપથી ચલાવવા માટે 'ફાસ્ટ ટ્રેક કોર્ટ' બનાવવાનો આદેશ આપ્યો છે.

ડ્રાફ્ટ તૈયાર: આ નવા કાયદાનો મુસદ્દો મોડી રાત્રે જ તૈયાર કરીને પીએમને સોંપી દેવામાં આવ્યો છે.

આકરી સજા: આ પ્રસ્તાવમાં ફાસ્ટ ટ્રેક કોર્ટની સાથે સાથે ગુનેગારોને અત્યંત કડક સજા ફટકારવાની જોગવાઈ કરવામાં આવી છે.

કેબિનેટમાં મંજૂરી: પીએમ મોદીએ સોશિયલ મીડિયા પ્લેટફોર્મ 'X' પર માહિતી આપતા જણાવ્યું કે, શુક્રવારે મળનારી કેબિનેટ બેઠકમાં આ પ્રસ્તાવ પર ચર્ચા કરી તેને અંતિમ ઓપ અપાશે.

સંસદમાં બિલ: સોમવારથી શરૂ થઈ રહેલા સંસદના સત્રના બીજા સપ્તાહમાં જ આ બિલને વહેલી તકે પસાર કરવાનો પૂરેપૂરો પ્રયાસ કરવામાં આવશે.

શિક્ષણ વિભાગમાં મોટો ફેરફાર: નવા સચિવની નિમણૂક

આ કડક નિર્ણયોની સાથે જ કેન્દ્ર સરકારે વહીવટી સ્તરે પણ મોટા ફેરફારો કર્યા છે. શિક્ષણ મંત્રાલય હેઠળ આવતા ઉચ્ચ શિક્ષણ વિભાગના સચિવ પદેથી સિનિયર IAS અધિકારી વિનીત જોશીની બદલી કરી દેવામાં આવી છે. તેમને હવે પંચાયતી રાજ મંત્રાલયના સચિવ બનાવવામાં આવ્યા છે. જ્યારે તેમની જગ્યાએ નવા સચિવ તરીકે IAS અધિકારી નરેશપાલ ગંગવારની નિમણૂક કરવામાં આવી છે.

સરકાર હવે શિક્ષણ વ્યવસ્થામાં રહેલી ખામીઓને દૂર કરવા અને ભવિષ્યમાં પેપર લીક જેવી ઘટનાઓ ક્યારેય ન બને તે માટે સંપૂર્ણપણે એક્શન મોડમાં આવી ગઈ છે. નવા કાયદા અને ફાસ્ટ ટ્રેક કોર્ટથી લાખો મહેનતુ વિદ્યાર્થીઓને મોટો ન્યાય મળવાની આશા બંધાઈ છે.

આ પણ વાંચો-NEET paper leak protest: વાંગચુકના 26 દિવસના અનશન પૂરા, પણ લડાઈ ચાલુ! અભિજિત દીપકેએ શિક્ષણ મંત્રીના રાજીનામા સુધી છેડ્યું આંદોલન