NEET પેપર લીક અને CJP ના વિરોધ વચ્ચે PM મોદીનું મોટું નિવેદન: 'ફાસ્ટ ટ્રેક કોર્ટ રચાશે, દોષિતોને બક્ષવામાં નહીં આવે'

કેન્દ્ર સરકારે દેશભરમાં ચકચાર મચાવનાર પેપર લીક મામલે હવે અત્યંત કડક વલણ અપનાવ્યું છે. NEET-UG 2026 ના પેપર લીકના આરોપોને લઈને દિલ્હીના જંતર-મંતર પર કોકરોચ જનતા પાર્ટી દ્વારા ઉગ્ર વિરોધ પ્રદર્શન કરવામાં આવી રહ્યું છે. આ જ વિરોધ પ્રદર્શન વચ્ચે ગુરુવારે, 23 જુલાઈએ વડાપ્રધાન નરેન્દ્ર મોદીએ પહેલીવાર આ મુદ્દે ખુલીને વાત કરી છે અને એક મોટો નિર્ણય લીધો છે.

પીએમ મોદીએ સ્પષ્ટ શબ્દોમાં ચીમકી આપી છે કે, યુવાનોના ભવિષ્ય સાથે રમત રમનાર કોઈ પણ વ્યક્તિને બક્ષવામાં નહીં આવે.

પીએમ મોદીનું મોટું એલાન: 'ફાસ્ટ ટ્રેક કોર્ટની રચના થશે'

વડાપ્રધાન નરેન્દ્ર મોદીએ સોશિયલ મીડિયા પ્લેટફોર્મ 'X' પર પોસ્ટ કરીને જણાવ્યું હતું કે, "દેશના યુવાનોનું હિત અને તેમનું ભવિષ્ય એ અમારી સરકારની સર્વોચ્ચ પ્રાથમિકતા છે. પેપર લીકના તમામ કેસોમાં દોષિતોને વહેલામાં વહેલી તકે કડકમાં કડક સજા મળે અને કેસનો ઝડપી નિકાલ થાય, તે માટે 'ફાસ્ટ ટ્રેક કોર્ટ' ની રચના કરવામાં આવશે."

Nothing is more important than the welfare and future of our youth! We have decided to set up fast-track courts to ensure swift and stringent punishment for those involved in paper leaks. Have directed the concerned authorities and officials to take all necessary steps in this…

— Narendra Modi (@narendramodi) July 23, 2026

CJPનું વિરોધ પ્રદર્શન અને રાજીનામાની માંગ

ઉલ્લેખનીય છે કે, NEET-UG 2026 પરીક્ષામાં થયેલી ગેરરીતિઓ અને પેપર લીક મામલે દિલ્હીના જંતર-મંતર પર કોકરોચ જનતા પાર્ટીના કાર્યકરો ભારે વિરોધ પ્રદર્શન કરી રહ્યા છે. પ્રદર્શનકારીઓ દ્વારા દેશના શિક્ષણ મંત્રી ધર્મેન્દ્ર પ્રધાનના રાજીનામાની ઉગ્ર માંગ કરવામાં આવી રહી છે.

જેપી નડ્ડાનો રાહુલ ગાંધી પર આકરો પ્રહાર

બીજી તરફ, આ મુદ્દે રાજકારણ પણ ગરમાયું છે. ભાજપના વરિષ્ઠ નેતા અને કેન્દ્રીય સ્વાસ્થ્ય મંત્રી જેપી નડ્ડાએ કોંગ્રેસના પૂર્વ અધ્યક્ષ રાહુલ ગાંધી પર આકરા પ્રહાર કર્યા છે. નડ્ડાએ આરોપ લગાવ્યો કે રાહુલ ગાંધી વિદ્યાર્થીઓના વિરોધ પ્રદર્શનના નામે પોતાની 'રાજકીય રોટલીઓ' શેકવાનો પ્રયાસ કરી રહ્યા છે.

વિપક્ષને સંસદમાં ચર્ચા માટે ખુલ્લું આમંત્રણ

જેપી નડ્ડાએ કેટલીક મહત્વની બાબતો પર ભાર મૂકતા કહ્યું કે,,મોદી સરકાર એક જવાબદાર અને સંવેદનશીલ સરકાર છે. અમે સંસદમાં આ મુદ્દે વિસ્તારપૂર્વક ચર્ચા કરવા માટે સંપૂર્ણપણે તૈયાર છીએ.વિપક્ષે માત્ર આક્ષેપબાજી કરવાને બદલે સંસદમાં ચર્ચામાં ભાગ લેવો જોઈએ અને પેપર લીકની સમસ્યાનો કાયમી ઉકેલ લાવવા માટે સરકારનો સાથ આપવો જોઈએ. નડ્ડાએ રાહુલ ગાંધીને આડેહાથ લેતા કહ્યું કે તેઓ માત્ર પસંદગીના રાજ્યોનો જ ઉલ્લેખ કરે છે. કોંગ્રેસ કે વિપક્ષ શાસિત રાજ્યોમાં પણ પેપર લીકની ઘટનાઓ બને છે, પરંતુ રાહુલ ગાંધી ત્યાં મૌન રહે છે. પેપર લીકનો મામલો તપાસનો વિષય છે અને સરકાર જનતા સમક્ષ એકે-એક પોઈન્ટનો જવાબ મુકશે.

આ પણ વાંચો-'અમારો સમય બગાડશો નહીં...': CJP પ્રદર્શનકારીઓ પર પોલીસ એક્શન મામલે સુપ્રીમ કોર્ટનો તાત્કાલિક સુનાવણીનો સ્પષ્ટ ઇનકાર