ગુજરાતમાં સોમનાથ મંદિર, કમલમ અને CM ઓફિસને બોમ્બથી ઉડાવી દેવાની ધમકી, જાણો શું છે સત્ય?

ગુજરાતમાં આજે એક મોટા સમાચાર સામે આવતા સુરક્ષા એજન્સીઓમાં ભારે દોડધામ મચી ગઈ છે. રાજ્યના સૌથી પવિત્ર યાત્રાધામથી લઈને રાજકીય અને વહીવટી કેન્દ્રોને નિશાન બનાવવાની ધમકી આપવામાં આવી છે. એક અજાણ્યા શખ્સે ઈમેઈલ મોકલીને રાજ્યભરમાં દહેશત ફેલાવવાનો પ્રયાસ કર્યો છે, જેના પગલે પોલીસ તંત્ર તાત્કાલિક હરકતમાં આવી ગયું છે.

કઈ કઈ જગ્યાઓને ઉડાવવાની ધમકી મળી?

અજાણ્યા ઈમેઈલમાં ગુજરાતની મુખ્ય જગ્યાઓને નિશાન બનાવવાની વાત કરવામાં આવી છે, જેમાં નીચેના સ્થળો સામેલ છે.

પ્રખ્યાત સોમનાથ મંદિર

અમદાવાદ શહેરનું ખાનપુર ભાજપ કાર્યાલય

મુખ્યમંત્રી ભૂપેન્દ્ર પટેલનું કાર્યાલય (CM ઓફિસ)

ઈમેઈલમાં શું લખવામાં આવ્યું હતું?

આ ધમકીભર્યા ઈમેઈલની શરૂઆતમાં 'અલ્લાહુ અકબર' સહિતના ધાર્મિક શબ્દો લખીને ભયનો માહોલ ઉભો કરવાનો પ્રયાસ કરાયો હતો. આ ઉપરાંત તેમાં દેશ વિરોધી નારા અને આતંકવાદી કનેક્શન દર્શાવતા સૂત્રો પણ લખેલા હતા. ઈમેઈલ મોકલનાર શખ્સે એવો દાવો કર્યો હતો કે તેણે આ તમામ મહત્વની જગ્યાઓ પર અગાઉથી જ બોમ્બ ફિટ કરી દીધા છે. આ વાંચતા જ સુરક્ષા એજન્સીઓ વધુ સતર્ક બની ગઈ હતી.

પોલીસ અને બોમ્બ સ્ક્વોડનું મેગા ઓપરેશન

ધમકીની જાણ થતા જ એક પણ મિનિટનો વિલંબ કર્યા વિના પોલીસ, ફાયર બ્રિગેડ, ડોગ સ્ક્વોડ અને બોમ્બ સ્ક્વોડની ટીમો ખાનપુર અને કોબા કાર્યાલય સહિતના સ્થળો પર પહોંચી ગઈ હતી. શાહપુર પોલીસે ખાનપુર ભાજપ કાર્યાલયની ઝીણવટભરી તપાસ હાથ ધરી હતી.

રાહતના સમાચાર: ઈમેઈલ ફેક નીકળ્યો

સઘન ચેકિંગ બાદ રાહતના સમાચાર એ છે કે કોઈપણ જગ્યાએથી કોઈ શંકાસ્પદ વસ્તુ કે વિસ્ફોટક મળી આવ્યો નથી. પ્રાથમિક તપાસમાં સ્પષ્ટ થઈ ગયું છે કે આ માત્ર લોકોમાં ડર ફેલાવવા માટે મોકલવામાં આવેલો એક 'ફેક ઈમેઈલ' હતો. પોલીસે પણ સ્પષ્ટતા કરી છે કે સ્થિતિ સંપૂર્ણપણે કાબૂમાં છે અને નાગરિકોએ જરા પણ ગભરાવાની જરૂર નથી.

આગળની તપાસ શરૂ

અહીં એ નોંધવું જરૂરી છે કે, થોડા દિવસો પહેલા પણ ગુજરાતની કેટલીક શાળાઓ અને કોર્ટને આવી જ રીતે બોમ્બથી ઉડાવવાની ધમકીઓ મળી હતી. તે સમયે તપાસમાં ખાલિસ્તાની કનેક્શન સામે આવ્યું હતું.

આ પણ વાંચો-સાવધાન! તમારા ઘરમાં આવતું દૂધ ઝેર તો નથી ને? ગુજરાતમાં 6 મહિનામાં 20000 લીટર નકલી દૂધ ઝડપાયું