US Travel Ban: અમેરિકાના દરવાજા વધુ 20 દેશો માટે બંધ, ટ્રમ્પનો મોટો નિર્ણય, જુઓ સંપૂર્ણ લિસ્ટ

US Travel Ban: ટ્રમ્પ વહીવટીતંત્રે અમેરિકામાં પ્રવેશ માટેના નિયમોને વધુ કડક બનાવતા એક મોટી જાહેરાત કરી છે. મંગળવારે લેવાયેલા આ નિર્ણય હેઠળ, યુનાઇટેડ સ્ટેટ્સના ટ્રાવેલ બેનનો વ્યાપ વધારવામાં આવ્યો છે, જેમાં 5 નવા દેશોના નાગરિકો પર સંપૂર્ણપણે પ્રતિબંધ મૂકી દેવામાં આવ્યો છે, જ્યારે અન્ય 15 દેશો માટે ઇમિગ્રેશન અને મુસાફરીના નિયમો અત્યંત કડક કરી દેવાયા છે. આ નિર્ણયને અમેરિકાની રાષ્ટ્રીય સુરક્ષા અને ઇમિગ્રેશન કાયદાને મજબૂત કરવાના પ્રયાસના ભાગરૂપે જોવામાં આવી રહ્યો છે.

વ્હાઇટ હાઉસ દ્વારા જારી કરાયેલા એક સત્તાવાર નિવેદનમાં જણાવાયું છે કે, "આ પ્રતિબંધો એવા વિદેશી નાગરિકોના પ્રવેશને રોકવા માટે જરૂરી છે જેમની પૃષ્ઠભૂમિ વિશે અમેરિકા પાસે પૂરતી માહિતી ઉપલબ્ધ નથી. આ પગલું અમારા ઇમિગ્રેશન કાયદાના અમલીકરણ અને આતંકવાદ વિરોધી ઉદ્દેશ્યોને આગળ વધારવા માટે પણ અનિવાર્ય છે."

આ 5 દેશો પર લાગ્યો સંપૂર્ણ પ્રતિબંધ

નવા આદેશ મુજબ, 5 દેશોના નાગરિકો પર અમેરિકામાં પ્રવેશવા પર સંપૂર્ણ પ્રતિબંધ લગાવી દેવામાં આવ્યો છે. આ દેશોની યાદી નીચે મુજબ છે:

* માલી

* નાઇજર

* દક્ષિણ સુદાન

* સીરિયા

આ ઉપરાંત, પેલેસ્ટિનિયન ઓથોરિટી દ્વારા જારી કરાયેલા મુસાફરી દસ્તાવેજો ધરાવતા વ્યક્તિઓ પર પણ સંપૂર્ણ પ્રતિબંધ લાગુ કરવામાં આવ્યો છે. આ જાહેરાત એવા સમયે કરવામાં આવી છે જ્યારે તાજેતરમાં થેંક્સગિવિંગ વીકએન્ડ પર બે નેશનલ ગાર્ડ સૈનિકોને ગોળી મારવાના શંકાસ્પદ અફઘાન નાગરિકની ધરપકડ કરવામાં આવી હતી.

15 દેશો માટે મુસાફરી બની મુશ્કેલ

સંપૂર્ણ પ્રતિબંધ ઉપરાંત, અન્ય 15 દેશોને આંશિક મુસાફરી પ્રતિબંધો હેઠળ રાખવામાં આવ્યા છે. આનો અર્થ એ છે કે આ દેશોના નાગરિકોને અમેરિકામાં પ્રવેશ માટે વધારાની કડક ચકાસણી અને મુશ્કેલીઓનો સામનો કરવો પડશે. આ યાદીમાં અંગોલા, એન્ટિગુઆ અને બારબુડા, બેનિન, કોટે ડી આઇવર, ડોમિનિકા, ગેબોન, ગેમ્બિયા, માલાવી, મોરિટાનિયા, નાઇજીરીયા, સેનેગલ, તાંઝાનિયા, ટોંગા, ઝામ્બિયા અને ઝિમ્બાબ્વેનો સમાવેશ થાય છે.

શા માટે લેવાયો આ કડક નિર્ણય?

વહીવટીતંત્રે આ કડક નિયમો પાછળના કારણો સ્પષ્ટ કર્યા છે. તેમના જણાવ્યા અનુસાર, પ્રતિબંધિત દેશોમાંથી ઘણા દેશો વ્યાપક ભ્રષ્ટાચાર, નકલી કે અવિશ્વસનીય નાગરિક દસ્તાવેજો અને ગુનાહિત રેકોર્ડ જેવી સમસ્યાઓથી પીડાઈ રહ્યા છે. આ કારણે અમેરિકન અધિકારીઓ માટે પ્રવાસીઓની યોગ્ય રીતે તપાસ કરવી અત્યંત મુશ્કેલ બની જાય છે. આ સિવાય, કેટલાક દેશોમાં વિઝા ઓવરસ્ટે (વિઝાની અવધિ કરતાં વધુ રોકાણ)નો દર ઊંચો છે, તેઓ દેશનિકાલ કરાયેલા નાગરિકોને પાછા સ્વીકારવાનો ઇનકાર કરે છે અથવા ત્યાં રાજકીય અસ્થિરતા અને સરકારના નબળા નિયંત્રણ જેવી સમસ્યાઓ છે.

જૂની યાદીમાં કયા દેશો હતા સામેલ?

ઉલ્લેખનીય છે કે આ પ્રતિબંધો કોઈ નવી નીતિ નથી, પરંતુ જૂની નીતિનો જ એક વિસ્તાર છે. આ અગાઉ જૂનમાં લાદવામાં આવેલા પ્રતિબંધોમાં અફઘાનિસ્તાન, મ્યાનમાર, ચાડ, કોંગો, ઇક્વેટોરિયલ ગિની, એરિટ્રિયા, હૈતી, ઈરાન, લિબિયા, સોમાલિયા, સુદાન અને યમનના નાગરિકોનો સમાવેશ થતો હતો. આ ઉપરાંત, બુરુન્ડી, ક્યુબા, લાઓસ, સિએરા લિયોન, ટોગો, તુર્કમેનિસ્તાન અને વેનેઝુએલાના મુસાફરો પર પણ પહેલાથી જ કડક નિયમો લાગુ કરાયેલા છે.

આ પણ વાંચો- Stock market : નિફ્ટી 26100 નીચે, રોકાણકારો માટે શું છે સંકેત? જાણો કયા લેવલ છે મહત્વના