Crude-Sensitive Stocks: ક્રૂડ ઓઈલ 97 ડોલરને પાર, BPCL અને Asian Paints સહિતના શેરોમાં 2% સુધીનો કડાકો

Crude-Sensitive Stocks: ઈરાન અને ઈઝરાયેલ વચ્ચે ફરી એકવાર સૈન્ય તણાવ ચરમસીમાએ પહોંચ્યો છે. આ યુદ્ધની સીધી અને નકારાત્મક અસર ગ્લોબલ માર્કેટ પર પડી રહી છે. બ્રેન્ટ ક્રૂડ ઓઈલના ભાવ આસમાને પહોંચતા સોમવારે ભારતીય શેરબજારમાં ક્રૂડ-સેન્સિટિવ કંપનીઓના શેરોમાં ભારે વેચવાલી જોવા મળી હતી. ક્રૂડ મોંઘુ થવાથી ઇનપુટ કોસ્ટ વધવાની ચિંતાએ રોકાણકારોને ડરાવી દીધા છે.

ક્રૂડ ઓઈલમાં ભડકો કેમ?

બેરૂત પર ઈઝરાયેલના હુમલા બાદ ઈરાને ઈઝરાયેલ પર વળતા પ્રહાર રૂપે મિસાઈલો દાગી છે. આ ઘટનાથી યુદ્ધ વહેલું પૂરું થવાની આશાઓ પર પાણી ફરી વળ્યું છે. આંતરરાષ્ટ્રીય બજારમાં બ્રેન્ટ ક્રૂડ ઓઈલ લગભગ 4 ટકા ઉછળીને 97 ડોલર પ્રતિ બેરલની સપાટીને પાર કરી ગયું છે.

કયા શેરોમાં જોવા મળ્યો ઘટાડો?

ઓઈલ માર્કેટિંગ કંપનીઓ (OMCs): ક્રૂડ મોંઘુ થવાથી ઓઈલ કંપનીઓના માર્જિન ઘટે છે. પરિણામે HPCL નો શેર 1.68 ટકા ઘટીને 378.60 રૂપિયા પર આવી ગયો હતો, જ્યારે દિગ્ગજ કંપની BPCL 1.83 ટકાના ઘટાડા સાથે 289.60 રૂપિયાના સ્તરે ટ્રેડ થતો જોવા મળ્યો.

પેઇન્ટ કંપનીઓના શેર: પેઇન્ટ બનાવતી કંપનીઓ માટે ક્રૂડ ઓઈલ એક મુખ્ય કાચો માલ છે. ખર્ચ વધવાની બીકે એશિયન પેઇન્ટ્સ 0.81 ટકા તૂટીને 2663.30 રૂપિયા અને બર્જર પેઇન્ટ્સ 0.97 ટકા ઘટીને 485.40 રૂપિયા પર આવી ગયા હતા.

ફૂડ ડિલિવરી પ્લેટફોર્મ: ઈંધણના ભાવ વધવાથી ફૂડ ડિલિવરી પ્લેટફોર્મ્સના ડિલિવરી માર્જિન પર પણ ખરાબ અસર પડે છે, જેના કારણે આ સેક્ટરના એક મુખ્ય શેરમાં પણ 1.64 ટકાનો ઘટાડો નોંધાયો અને તે 252.30 રૂપિયા પર આવી ગયો હતો.

હોર્મુઝ સ્ટ્રેટને લઈને ઈરાનની નવી શરતો

આ બધા વચ્ચે સપ્લાય ચેઈનને લઈને એક મોટા સમાચાર સામે આવ્યા છે. મોસ્કોમાં ઈરાનના રાજદૂત કાઝમ જલાલીએ એક રશિયન અખબારને જણાવ્યું છે કે, વેપાર માટે અત્યંત મહત્વનો ગણાતો હોર્મુઝ સ્ટ્રેટ ખુલ્લો તો રહેશે, પરંતુ હવે તેની શરતો બદલાશે. ઈરાન અને ઓમાન આ રૂટ પર અપાતી સર્વિસ અને સુરક્ષા માટે જહાજો પાસેથી નવી ફી વસૂલી શકે છે.

આ પણ વાંચો-અદાણી ગ્રુપના શેરોમાં તેજીનો પવન: સંસ્થાકીય રોકાણકારોએ 15000 કરોડ ઠાલવ્યા, બ્રોકરેજ ફર્મ્સે આપ્યા મોટા ટાર્ગેટ

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.