HFCL Q1 Results: નુકસાનમાંથી બહાર આવી આ કંપનીએ કર્યો 229 કરોડનો નફો, 6 મહિનામાં રોકાણકારોને મળ્યું 250% રિટર્ન

HFCL Q1 Results: શેરબજારમાં સારા રિટર્નની શોધમાં રહેલા રોકાણકારો માટે ટેલિકોમ ઇક્વિપમેન્ટ અને ઓપ્ટિકલ નેટવર્કિંગ સેક્ટરની દિગ્ગજ કંપની HFCL Ltd તરફથી મોટા સમાચાર આવ્યા છે. કંપનીએ તેના એપ્રિલ-જૂન ક્વાર્ટરના પરિણામો જાહેર કર્યા છે, જે અત્યાર સુધીનું સૌથી શાનદાર પ્રદર્શન માનવામાં આવે છે. કંપનીની આવક બમણા કરતા પણ વધુ થઈ ગઈ છે અને તે ગત વર્ષની ખોટમાંથી બહાર આવીને જંગી નફામાં આવી ગઈ છે.

ખોટમાંથી સીધી કરોડોના નફામાં મારી છલાંગ

રિઝલ્ટના આંકડાઓ પર નજર કરીએ તો, HFCL એ જૂન ક્વાર્ટરમાં 228.6 કરોડ રૂપિયાનો કન્સોલિડેટેડ ચોખ્ખો નફો નોંધાવ્યો છે. તમને જણાવી દઈએ કે, ગયા વર્ષે આ જ ક્વાર્ટરમાં કંપની 32.2 કરોડ રૂપિયાની ખોટમાં હતી.

વાર્ષિક ધોરણે કંપનીની આવક 120% ઉછળીને 1,915 કરોડ રૂપિયાના રેકોર્ડ સ્તરે પહોંચી ગઈ છે.ઓપરેટિંગ નફો 29 કરોડ રૂપિયાથી જબરદસ્ત ઉછાળો લઈને 414 કરોડ રૂપિયા થઈ ગયો છે. કંપનીનું EBITDA માર્જિન પણ 3.3% થી સીધું 21.6% પર પહોંચી ગયું છે.

શાનદાર રિઝલ્ટના કારણે બુધવારે નેશનલ સ્ટોક એક્સચેન્જ પર HFCL નો શેર 6.5% ના ઉછાળા સાથે 228 રૂપિયાના ઇન્ટ્રા-ડે હાઈ પર પહોંચ્યો હતો. જોકે, બાદમાં પ્રોફિટ બુકિંગ આવતા આ શેર 217.95 રૂપિયા પર સપાટ બંધ રહ્યો હતો. આશ્ચર્યની વાત એ છે કે, છેલ્લા માત્ર 6 મહિનામાં જ આ શેરે રોકાણકારોને 250% જેટલું તગડું રિટર્ન આપ્યું છે.

એક્સપોર્ટ બન્યું કંપનીનું સૌથી મોટું હથિયાર

HFCL ની આ શાનદાર કમાણી પાછળ એક્સપોર્ટનો સૌથી મોટો ફાળો છે. જૂન ક્વાર્ટરમાં કંપનીએ નિકાસ દ્વારા 1,063.3 કરોડ રૂપિયાની આવક મેળવી છે, જે કુલ આવકના 55.5% જેટલી છે. ગયા વર્ષે એક્સપોર્ટથી માત્ર 209.7 કરોડ રૂપિયા (24.1%) ની જ આવક થઈ હતી. કંપનીની ઓર્ડર બુક પણ ઐતિહાસિક સ્તરે પહોંચીને 26,665 કરોડ રૂપિયા થઈ ગઈ છે. આ આંકડો નાણાકીય વર્ષ 2026ની અંદાજિત આવક કરતા લગભગ 5 ગણો છે.

આર્ટિફિશિયલ ઇન્ટેલિજન્સ કનેક્ટિવિટી માટે 215 કરોડનું નવું રોકાણ

ભવિષ્યની ટેકનોલોજીને ધ્યાનમાં રાખીને HFCL ના બોર્ડે 215 કરોડ રૂપિયાના નવા રોકાણને લીલી ઝંડી આપી છે. આ ફંડમાંથી એડવાન્સ AI ડેટા સેન્ટર કનેક્ટિવિટી માટે એક નવી મેન્યુફેક્ચરિંગ ફેસિલિટી ઉભી કરવામાં આવશે. કંપની પોતાની ઓપ્ટિકલ ફાઈબર કેબલની ક્ષમતા પણ 3.4 કરોડથી વધારીને 4.3 કરોડ ફાઈબર કિલોમીટર કરવા જઈ રહી છે.

ભવિષ્ય માટે 40% ગ્રોથનો મોટો ટાર્ગેટ

કંપનીના મેનેજિંગ ડિરેક્ટર મહેન્દ્ર નાહટાના જણાવ્યા અનુસાર, AI, ડિજિટલ ઈન્ફ્રાસ્ટ્રક્ચર અને ડિફેન્સ ક્ષેત્રે નવી તકો ઝડપથી વધી રહી છે. ક્વાર્ટર 1ની આ ધમાકેદાર શરૂઆત બાદ કંપનીએ નાણાકીય વર્ષ 2027 માટે પોતાનો રેવન્યુ ગ્રોથ ટાર્ગેટ વધારીને 40% કરી દીધો છે.

ડિસ્ક્લેમર: આ જાણકારી ફક્ત સૂચના હેતુ આપવામાં આવી રહી છે. અહીં બતાવુ જરૂરી છે કે માર્કેટમાં રોકાણ બજાર જોખમોના આધીન છે. રોકાણકારોની રીતે પૈસા લગાવાથી પહેલા હંમેશા એક્સપર્ટથી સલાહ લે. મનીકંટ્રોલની તરફથી કોઈને પણ પૈસા લગાવાની અહીં ક્યારેય પણ સલાહ નથી આપવામાં આવી છે.

આ પણ વાંચો-Closing Bell: શેરબજારમાં ભારે કડાકો, સેન્સેક્સ 715 પોઈન્ટ તૂટ્યો, નિફ્ટી 24000ની નીચે સરક્યો, રોકાણકારોના કરોડો રૂપિયા ડૂબ્યા