Jio IPO ના સૌથી મોટા સમાચાર: બોર્ડે આપી મંજૂરી, આજે જ સેબીમાં રજૂ થશે ડ્રાફ્ટ પેપર્સ

Reliance AGM 2026: શેરબજારના રોકાણકારો જેની મહિનાઓથી ચાતક નજરે રાહ જોઈ રહ્યા હતા તે સમાચાર આખરે આવી ગયા છે. રિલાયન્સ ઇન્ડસ્ટ્રીઝની 49મી વાર્ષિક સાધારણ સભામાં ચેરમેન મુકેશ અંબાણીએ જિયો આઈપીઓ અંગે બજારને સૌથી મોટી ભેટ આપી છે.

જિયો પ્લેટફોર્મ્સના બોર્ડે તેના બહુચર્ચિત આઈપીઓ માટેના ડ્રાફ્ટ રેડ હેરિંગ પ્રોસ્પેક્ટસને સત્તાવાર રીતે લીલી ઝંડી આપી દીધી છે. બજાર અને રોકાણકારો માટે સૌથી મોટી ખુશખબર એ છે કે આ ડ્રાફ્ટ આજે 19 જૂનના રોજ જ માર્કેટ રેગ્યુલેટર સેબીસમક્ષ જમા કરી દેવામાં આવશે. આ ઐતિહાસિક જાહેરાત પર અત્યારે આખા શેરબજારની નજર ટકેલી છે.

શેરધારકોને સંબોધતા મુકેશ અંબાણીએ આ જાહેરાતને ખૂબ જ લાગણીસભર ક્ષણ ગણાવી હતી. તેમણે જણાવ્યું કે આ તેમના માટે, સમગ્ર રિલાયન્સ પરિવાર અને લાખો શેરધારકો માટે એક ગૌરવની વાત છે. અત્યારે આકાશ અંબાણી, ઈશા અંબાણી અને અનંત અંબાણી જિયો આઈપીઓની સમગ્ર પ્રક્રિયાનું નેતૃત્વ કરી રહ્યા છે. આ નવી પેઢી જ ભવિષ્યમાં કંપનીના બિઝનેસ અને વેલ્યુ ક્રિએશનની કમાન સંભાળશે.

મુકેશ અંબાણીએ નવા રોકાણકારોને પૂરો વિશ્વાસ અપાવતા કહ્યું કે જિયોનું આ લિસ્ટિંગ આખી દુનિયાને બતાવી દેશે કે ભારત પણ વૈશ્વિક કક્ષાની અને દુનિયાને ટક્કર આપે તેવી ટેકનોલોજી કંપનીઓ બનાવી શકે છે. તેમણે તમામ રોકાણકારોને ખાતરી આપી છે કે જિયોનું ભવિષ્ય ખૂબ જ ઉજ્જવળ છે.

ડિસ્ક્લેમરઃ મનીકંટ્રોલ ડૉટ કૉમ નેટવર્ક 18 સમૂહનો હિસ્સો છે. મનીકંટ્રોલ ડૉટ કૉમ અને અન્ય ડિઝિટલ, પ્રિન્ટ અને ટીવી ચેનલ નેટવર્ક 18 ના અંતર્ગત આવે છે. નેટવર્ક 18 ના સ્વામિત્વ અને પ્રબંધન રિલાયન્સ ઈન્ડસ્ટ્રીઝના હાથમાં છે.