Share Market Crash: ભારતીય શેરબજારમાં આજે સવારે સામાન્ય નબળાઈ જોવા મળી રહી હતી, પરંતુ બપોર પડતા પડતા માર્કેટમાં જાણે વેચવાલીનું વાવાઝોડું આવી ગયું. અમેરિકી રાષ્ટ્રપતિ ડોનાલ્ડ ટ્રમ્પે અચાનક જાહેરાત કરી કે અમેરિકા અને ઈરાન વચ્ચેનું સીઝફાયર હવે ખતમ થઈ ચૂક્યું છે. આ એક જ સમાચારને કારણે ગ્લોબલ માર્કેટની સાથે સાથે ભારતીય શેરબજારના મુખ્ય ઇન્ડેક્સ સેન્સેક્સ અને નિફ્ટી પત્તાના મહેલની જેમ તૂટી પડ્યા.
Share Market Crash: ટ્રમ્પની એક જાહેરાત અને શેરબજાર ધડામ! સેન્સેક્સમાં 1700 પોઈન્ટથી વધુનો કડાકો, નિફ્ટી પણ ક્રેશ
અમેરિકન રાષ્ટ્રપતિ ડોનાલ્ડ ટ્રમ્પે ઈરાન સાથે સીઝફાયર ખતમ કરવાની જાહેરાત કરતા જ ભારતીય શેરબજારમાં ભૂકંપ. સેન્સેક્સ 1700 પોઈન્ટથી વધુ તૂટ્યો. જાણો કયા શેરને સૌથી મોટું નુકસાન થયું.
અપડેટેડ 02:51:07 PM Jul 08, 2026 પર
માર્કેટમાં ચારેતરફ વેચવાલીને કારણે નિફ્ટી સ્મોલકેપ 100 ઇન્ડેક્સ 1.97% તૂટ્યો, જ્યારે નિફ્ટી મિડકેપ 100 ઇન્ડેક્સ 1.57% ગગડ્યો હતો.
બજારના આંકડા: સેન્સેક્સ અને નિફ્ટી ક્યાં પહોંચ્યા?
બપોરે 2:00 વાગ્યે: નિફ્ટી 1.84% (434 પોઈન્ટ) ઘટીને 23,971 પર આવી ગયો હતો. જ્યારે સેન્સેક્સ 1500 પોઈન્ટ (1.84%) નો ગોથું ખાઈને 76,740 પર પહોંચી ગયો હતો.
બપોરે 2:37 વાગ્યે: વેચવાલીનું દબાણ વધુ વધ્યું. નિફ્ટી 2.22% (542 પોઈન્ટ) તૂટીને 23,849 ના સ્તરે આવી ગયો. જ્યારે સેન્સેક્સમાં 1746 પોઈન્ટનો ભયંકર કડાકો બોલી ગયો.
બેન્કિંગ શેરોમાં પણ ભારે ધોવાણ થતાં 'બેન્ક નિફ્ટી'2.43% ક્રેશ થઈ ગયો.
નાના-મોટા તમામ શેરોમાં ભારે નુકસાની
આજના આ કડાકામાં લાર્જ કેપથી લઈને સ્મોલ કેપ સુધીના તમામ શેરો પીટાયા છે.
સૌથી વધુ તૂટનારા શેરોમાં જિયો ફાઈનાન્શિયલ, શ્રીરામ ફાઈનાન્સ, ઈન્ટરગ્લોબ એવિએશન (ઈન્ડિગો), યુનિયન બેન્ક ઓફ ઈન્ડિયા, HDFC એસેટ મેનેજમેન્ટ અને મારુતિ સુઝુકીનો સમાવેશ થાય છે. આ કંપનીઓના શેરોમાં 5% સુધીનો મોટો ઘટાડો જોવા મળ્યો હતો.
નિફ્ટીના તમામ ઈન્ડેક્સ લાલ નિશાનમાં
માર્કેટમાં ચારેતરફ વેચવાલીને કારણે નિફ્ટી સ્મોલકેપ 100 ઇન્ડેક્સ 1.97% તૂટ્યો, જ્યારે નિફ્ટી મિડકેપ 100 ઇન્ડેક્સ 1.57% ગગડ્યો હતો.
ખાસ કરીને, યુદ્ધની શક્યતાઓને કારણે બ્રેન્ટ ક્રૂડ ઓઇલનો ભાવ ઉછળીને 78 ડોલર પ્રતિ બેરલને પાર કરી ગયો છે. ક્રૂડ મોંઘુ થવાના ડરથી ઓઇલ એન્ડ ગેસ ઇન્ડેક્સ 1.5% તૂટ્યો. આ ઉપરાંત ઓઇલ માર્કેટિંગ કંપનીઓ, પેઈન્ટ બનાવતી કંપનીઓ, એરલાઈન્સ અને ટાયર કંપનીઓના શેરો પર સૌથી વધુ દબાણ જોવા મળ્યું.
એશિયન માર્કેટની પણ ખરાબ હાલત
અમેરિકા અને ઈરાન વચ્ચે તણાવ વધવાની સીધી અસર માત્ર ભારત પર જ નહીં, પરંતુ એશિયાના અન્ય બજારો પર પણ પડી છે. જાપાન, ઈન્ડોનેશિયા અને ચીનના બજારો પણ મોટા ઘટાડા સાથે લાલ નિશાનમાં જોવા મળ્યા.
સૌથી ખરાબ હાલત સાઉથ કોરિયાના શેરબજારની થઈ છે. 8 જુલાઈના આ મોટા કડાકા બાદ સાઉથ કોરિયાનો મુખ્ય ઇન્ડેક્સ જૂન મહિનાના તેના ઓલ-ટાઇમ હાઈથી 20% ક્રેશ થઈ ચૂક્યો છે અને સત્તાવાર રીતે 'બેયર માર્કેટ' (મંદીના બજાર) માં પ્રવેશી ચૂક્યો છે.
India VIXમાં મોટો ઉછાળો: આગળ શું થશે?
બજારમાં ડર અને અસ્થિરતા માપતા ઇન્ડેક્સ 'ઈન્ડિયા વિક્સ' માં અચાનક 28% નો મોટો ઉછાળો આવ્યો છે અને તે 15 ના સ્તર પર પહોંચી ગયો છે. સામાન્ય રીતે વિક્સ વધવાનો અર્થ એ છે કે આવનારા દિવસોમાં માર્કેટમાં હજુ વધુ ઉતાર-ચઢાવ અને દબાણ જોવા મળી શકે છે.
MoneyControl News
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.
