SEBIનો મોટો નિર્ણય: 10 લાખથી ઓછા દંડવાળા કેસોનું થશે 'ફાસ્ટ-ટ્રેક સેટલમેન્ટ', જાણો નવા નિયમો

SEBI fast track settlement: શેરબજારના રેગ્યુલેટર સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા એ તેની કાનૂની અને સેટલમેન્ટ પ્રક્રિયાને વધુ સરળ અને ઝડપી બનાવવા માટે એક મહત્વનો નિર્ણય લીધો છે. સેબીએ હવે 10 લાખ રૂપિયાથી ઓછી સેટલમેન્ટ રકમ ધરાવતા કેસો માટે 'ફાસ્ટ-ટ્રેક સેટલમેન્ટ'ને મંજૂરી આપી દીધી છે. આ નવા પગલાથી નાના કેસોનો નિકાલ ખૂબ જ ઝડપથી થઈ શકશે.

ફાસ્ટ-ટ્રેક સેટલમેન્ટ કેવી રીતે કામ કરશે?

નવા સુધારેલા માળખા મુજબ, જે કેસોમાં સેટલમેન્ટની રકમ 10 લાખ રૂપિયાથી ઓછી હશે, તે કેસો હવે સેબીની આંતરિક સમિતિ પાસે જવાને બદલે સીધા જ 'પૂર્ણકાલીન સભ્યોની પેનલ' પાસે જશે. વચેટિયા પ્રક્રિયા દૂર થવાથી સમાધાનની પ્રક્રિયા ટૂંકી અને ઝડપી બનશે.

નોટિસના પૈસા ભરો અને કેસ પૂરો

અમુક ચોક્કસ પ્રકારના ઉલ્લંઘનો માટે, સેબી હવે સીધી એક નોટિસ જારી કરશે જેમાં સેટલમેન્ટની રકમ લખેલી હશે. સંબંધિત કંપની કે વ્યક્તિ નોટિસમાં દર્શાવેલી રકમ ચૂકવીને સીધો જ કાર્યવાહીનો નિકાલ લાવી શકશે. આ નવી સિસ્ટમમાં નાણાકીય નિવેદનોમાં કરવામાં આવેલી ખોટી રજૂઆત, ભંડોળની ઉચાપત અથવા ફંડને અન્ય જગ્યાએ વાળી દેવા જેવા ગંભીર કેસોને પણ આવરી લેવામાં આવ્યા છે.

દંડની ગણતરી માટે નવી ફોર્મ્યુલા

સેબીએ સેટલમેન્ટ રકમ નક્કી કરવા માટે એક નવી ફોર્મ્યુલા પણ રજૂ કરી છે. નિયામકે સ્પષ્ટ કર્યું છે કે 'બેઝ પેનલ્ટી' નક્કી કરતી વખતે તેમાં ગેરકાયદેસર રીતે કમાયેલા નફાને ઉમેરવામાં આવશે નહીં. આનાથી દંડની રકમની ડબલ ગણતરી થવાની જે શક્યતાઓ હતી તે હવે દૂર થશે.