Share Market Crash: શેરબજારમાં ભૂકંપ! સેન્સેક્સ 1250 પોઈન્ટ તૂટ્યો, નિફ્ટી 25,400 ની નીચે, જાણો કડાકાના 5 મોટા કારણો

Share Market Crash: ભારતીય શેરબજાર માટે આજનો મંગળવાર (24 ફેબ્રુઆરી) અમંગળ સાબિત થયો છે. છેલ્લા બે દિવસથી બજારમાં જે તેજી જોવા મળી રહી હતી, તેના પર આજે બ્રેક લાગી ગઈ છે. બજાર ખુલતાની સાથે જ ચોતરફી વેચવાલી જોવા મળી હતી અને સેન્સેક્સ તથા નિફ્ટી બંને મહત્વના લેવલ તોડીને નીચે પટકાયા હતા.

ખાસ કરીને IT સેક્ટરના શેરોમાં ભારે કડાકો અને નબળા વૈશ્વિક સંકેતોને કારણે રોકાણકારોનો ભરોસો ડગમગ્યો છે. બપોરે 1:40 વાગ્યાની આસપાસ, બોમ્બે સ્ટોક એક્સચેન્જનો સેન્સેક્સ1,221.99 પોઈન્ટ એટલે કે 1.47% તૂટીને 82,072.67 ના સ્તરે ટ્રેડ કરી રહ્યો હતો. બીજી તરફ નિફ્ટી પણ 337.55 પોઈન્ટ એટલે કે 1.31% ઘટીને 25,375.45 પર આવી ગયો હતો. આમ નિફ્ટી 25,400 ના મનોવૈજ્ઞાનિક સ્તરની નીચે જતો રહ્યો છે. મિડકેપ અને સ્મોલકેપ ઇન્ડેક્સમાં પણ 0.5% સુધીનો ઘટાડો નોંધાયો છે.

શેરબજારમાં કડાકાના 5 મુખ્ય કારણો

આજે માર્કેટમાં જે હાહાકાર મચ્યો છે, તેની પાછળ નીચે મુજબના 5 મોટા કારણો જવાબદાર છે:

આજના ઘટાડાનું સૌથી મોટું કારણ IT સેક્ટર છે. દુનિયાભરમાં આર્ટિફિશિયલ ઇન્ટેલિજન્સ (AI) ને લઈને નવી ચિંતાઓ ઉભી થઈ છે. અમેરિકન AI કંપની 'Anthropic' એ દાવો કર્યો છે કે તેમનું નવું 'ક્લોડ કોડ ટૂલ' (Claude Code Tool) જૂના સોફ્ટવેર સિસ્ટમને અપડેટ કરવાનું કામ ખૂબ જ સસ્તામાં અને સરળતાથી કરી શકે છે. આ સમાચારથી પરંપરાગત IT કંપનીઓના બિઝનેસ પર જોખમ ઉભું થયું છે. જેના કારણે સવારે નિફ્ટી IT ઇન્ડેક્સ 3% સુધી તૂટી ગયો હતો.

2. રૂપિયો ગગડ્યો

શેરબજારની જેમ કરન્સી માર્કેટમાં પણ નરમાઈ જોવા મળી છે. મંગળવારે રૂપિયો ડોલર સામે 7 પૈસા તૂટીને 90.96 ના સ્તરે પહોંચી ગયો હતો. વિદેશી ફંડ્સની લેવાલી હતી છતાં, ક્રૂડ ઓઈલના વધતા ભાવ અને મજબૂત થતા ડોલરે રૂપિયા પર દબાણ બનાવ્યું હતું.

3. નબળા ગ્લોબલ સંકેતો અને ટ્રમ્પનું નિવેદન

અમેરિકા અને એશિયાના બજારોમાં પણ આજે મંદીનો માહોલ છે. ડોનાલ્ડ ટ્રમ્પે સુપ્રીમ કોર્ટના નિર્ણય બાદ ચેતવણી આપી છે કે કોઈ પણ દેશ ટ્રેડ ડીલ (વ્યાપાર કરાર) માંથી પાછળ ન હટે. તેમણે કહ્યું કે જરૂર પડ્યે તેઓ વધારે ટેરિફ (ટેક્સ) લગાવી શકે છે. આ નિવેદનથી ગ્લોબલ માર્કેટમાં અનિશ્ચિતતા ફેલાઈ છે અને વોલ સ્ટ્રીટમાં પણ ઘટાડો જોવા મળ્યો હતો.

4. ક્રૂડ ઓઈલ મોંઘું થયું

આંતરરાષ્ટ્રીય બજારમાં બ્રેન્ટ ક્રૂડ ઓઈલના ભાવ 1% વધીને 72.13 ડોલર પ્રતિ બેરલ થઈ ગયા છે. ભારત તેની જરૂરિયાતનું મોટાભાગનું તેલ આયાત કરે છે, તેથી ઓઈલના ભાવ વધવાથી વ્યાપાર ખાધ અને મોંઘવારી વધવાનો ડર રહે છે, જેની અસર શેરબજાર પર પડે છે.

5. નિફ્ટીની વીકલી એક્સપાયરી

આજે મંગળવારે નિફ્ટીના ડેરિવેટિવ કોન્ટ્રાક્ટ્સની વીકલી એક્સપાયરી છે. એક્સપાયરીના દિવસે ટ્રેડર્સ પોતાના જૂના સોદા (Positions) સેટલ કરતા હોય છે અથવા આવતા અઠવાડિયા માટે રોલઓવર કરતા હોય છે. જેના કારણે બજારમાં ભારે વોલેટિલિટી (ઉતાર-ચઢાવ) જોવા મળી રહી છે.

ચાર્ટ શું સંકેત આપે છે?

જિયોજીત ઇન્વેસ્ટમેન્ટ્સના ચીફ માર્કેટ સ્ટ્રેટેજિસ્ટ આનંદ જેમ્સના જણાવ્યા મુજબ, નિફ્ટી 25,700 ની ઉપર ટકવા માટે સંઘર્ષ કરતો દેખાયો હતો, જે બતાવે છે કે તેજીનો પવન ધીમો પડ્યો છે. ટેકનિકલ સંકેતો અત્યારે સંપૂર્ણ મંદી નથી બતાવતા, તેથી 25,550 ની આસપાસ નાના ઉતાર-ચઢાવ પર નજર રાખવી જોઈએ. નિફ્ટીની રેન્જ 25,300 થી 25,840 ની વચ્ચે રહી શકે છે.

આ પણ વાંચો-Sectoral and Thematic Funds: રોકાણકારોનો મોહ ભંગ? જાન્યુઆરીમાં રોકાણ 88% ઘટ્યું, જાણો હવે શું કરવું

ડિસ્ક્લેમર: અહીં આપેલી માહિતી બ્રોકરેજ ફર્મના રિપોર્ટ પર આધારિત છે. શેરબજારમાં રોકાણ જોખમોને આધીન હોય છે. કોઈપણ રોકાણનો નિર્ણય લેતા પહેલા, કૃપા કરીને સર્ટિફાઇડ નિષ્ણાત અથવા તમારા નાણાકીય સલાહકારની મદદ લો. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.