Market View: શેરબજારમાં હજુ એક કડાકો બાકી! નિષ્ણાતોની સલાહ- ઉછાળે ફસાયેલા શેરોમાંથી નીકળી જાઓ

Share Market View: શેરબજારમાં સળંગ 3 દિવસના ભારે કડાકા બાદ આજે રોકાણકારોને થોડી રાહત મળી છે. માર્કેટમાં આજે એક 'રિલીફ રેલી' જોવા મળી રહી છે. નિફ્ટી 100 પોઈન્ટથી વધુના ઉછાળા સાથે 24600 ની પાર ટ્રેડ થતો જોવા મળ્યો છે. જોકે, બેંક નિફ્ટીમાં ઉપરના સ્તરેથી દબાણ જોવા મળી રહ્યું છે. બીજી તરફ મિડકેપ અને સ્મોલકેપ શેરોમાં તેજી યથાવત છે અને બજારનો ડર દર્શાવતો INDIA VIX ઈન્ડેક્સ આજે 12% જેટલો તૂટ્યો છે.

બજારમાં કયા શેરો અને સેક્ટરમાં એક્શન છે?

ટોપ ગેનર બન્યો રિલાયન્સ: ઈરાન યુદ્ધ અને ક્રૂડ ઓઈલની સપ્લાયની ચિંતા વચ્ચે ચીને ડીઝલ અને ગેસોલિનની નિકાસ રોકવાનો મોટો આદેશ આપ્યો છે. આનાથી સિંગાપોર GRM માં જબરદસ્ત ઉછાળો આવ્યો છે. માર્જિન સુધરવાની આશાએ રિલાયન્સ અને અન્ય રિફાઇનિંગ કંપનીઓમાં આજે જોરદાર તેજી છે. નિફ્ટીમાં રિલાયન્સ લગભગ 3% ના ઉછાળા સાથે સૌથી મોટો ગેનર બન્યો છે.

વોડાફોન માટે મોટા સમાચાર: AGR મામલે વોડાફોનને મોટી રાહત મળી શકે તેવી સંભાવના છે. CCA એ લાયસન્સ ફીનું રિ-એસેસમેન્ટ પૂરું કરી લીધું છે. સૂત્રોના જણાવ્યા મુજબ, કંપનીની લાયસન્સ ફીમાં 60 થી 65% જેટલો મોટો ઘટાડો કરવામાં આવી શકે છે.

ડિફેન્સ અને મેટલ શેરો દોડ્યા: ડિફેન્સ, મેટલ, સરકારી કંપનીઓ અને કેપિટલ માર્કેટના શેરોમાં જબરદસ્ત તેજી જોવા મળી છે. આ તમામ સેક્ટરના ઈન્ડેક્સ 2% થી વધુ વધ્યા છે. જર્મન સબમરીન માટેના કરારના સમાચારે મઝગાંવ ડોકમાં 10% ની અપર સર્કિટ લગાવી દીધી છે. સાથે જ GRSE, કોચીન શિપયાર્ડ અને BEL પણ 4 થી 6% ઉછળ્યા છે. એલ્યુમિનિયમના ઊંચા ભાવને કારણે નાલ્કો અને હિંડાલ્કો 6% થી વધુ વધ્યા છે. જ્યારે બીજી તરફ IT અને FMCG સેક્ટરમાં હળવું દબાણ જોવા મળ્યું છે.

માર્કેટમાં રિકવરી છે, પણ મજબૂતી નથી: નિષ્ણાતોની ચેતવણી

બજારની આગામી ચાલ વિશે વાત કરતાં CNBCના મેનેજિંગ એડિટર અનુજ સિંઘલના જણાવ્યા અનુસાર, બજારમાં ભલે રિકવરી આવી હોય પરંતુ દરેક ઉછાળે (રૅલીમાં) વેચવાલી આવી રહી છે. નિફ્ટી 24,650 થી 24,700 નો આંકડો પાર કરવામાં નિષ્ફળ રહ્યો છે. બેંક નિફ્ટીમાં પણ ઉપરના સ્તરેથી વેચાણ જોવા મળ્યું છે. માત્ર રિલાયન્સે નિફ્ટીને વધુ પડતો બચાવ્યો છે. બજારની ઓવરઓલ સ્થિતિ સવારની સરખામણીએ નબળી પડી છે. હવે સૌથી મોટો સવાલ એ છે કે શું 24,300 નું નીચલું સ્તર સચવાશે કે નહીં?