Bank Nifty View : ટ્રમ્પના એક નિવેદને શેરબજારમાં મચાવી અફરાતફરી! બેન્ક નિફ્ટી 2%થી વધુ તૂટ્યો, જાણો હવે શું કહે છે માર્કેટ એક્સપર્ટ્સ?

Bank Nifty View : બુધવારે બપોર પછી બેન્કિંગ શેરોમાં જબરદસ્ત વેચવાલી જોવા મળી હતી. આ ભારે દબાણના કારણે બેન્ક નિફ્ટી 2 ટકાથી પણ વધુ ગગડી ગયો છે. અમેરિકાના રાષ્ટ્રપતિ ડોનાલ્ડ ટ્રમ્પે ઈરાન વિશે આપેલા એક નિવેદન બાદ બજારનો આખો મૂડ બગડી ગયો. રોકાણકારોમાં ડરનો માહોલ છવાતા 'રિસ્ક-ઓફ'વેચવાલી અચાનક શરૂ થઈ ગઈ.

માર્કેટના લેટેસ્ટ આંકડા પર એક નજર

હાલમાં નિફ્ટી બેન્ક ઈન્ડેક્સ 2.10 ટકા તૂટીને 56,977 ની આસપાસ આવી ગયો છે, જે તેના 57,000 ના મહત્વના સપોર્ટ લેવલથી નીચે છે.નિફ્ટી PSU બેન્ક ઈન્ડેક્સમાં 2.30 ટકાનો મોટો ઘટાડો નોંધાયો છે.

નિફ્ટી પ્રાઈવેટ બેન્ક ઈન્ડેક્સ 2.08 ટકા ગગડ્યો છે. સમગ્ર માર્કેટ પર દબાણ હોવાથી સેન્સેક્સ 1,514.13 પોઈન્ટ (1.94%) ના કડાકા સાથે 76,666.59 પર આવી ગયો છે. નિફ્ટી 50 ઈન્ડેક્સ પણ 462.40 પોઈન્ટ (1.90%) તૂટીને 23,936.30 ના સ્તર પર પહોંચી ગયો છે.બીજી તરફ, બજારમાં અસ્થિરતા દર્શાવતો ઈન્ડિયા VIX ઈન્ડેક્સ 25 ટકાથી વધુ ઉછળ્યો છે, જે બજારમાં મોટા ઉતાર-ચઢાવ આવવાનો સીધો સંકેત આપે છે.

અમેરિકી રાષ્ટ્રપતિ ડોનાલ્ડ ટ્રમ્પે નિવેદન આપ્યું છે કે, તેમને લાગે છે કે ઈરાન સાથેનું યુદ્ધવિરામ હવે ખતમ થઈ ગયું છે. આ એક જ નિવેદનથી ગ્લોબલ ફાઈનાન્સિયલ માર્કેટમાં ભૌગોલિક-રાજકીય તણાવ વધવાની ચિંતા ફરીથી જાગી ગઈ અને રોકાણકારોએ ગભરાટમાં ફટાફટ પોતાના શેર વેચવાનું શરૂ કરી દીધું.

કયા બેન્કિંગ શેરોમાં સૌથી વધુ નુકસાન?

બેન્કિંગ શેરોમાં આજે ભારે ધોવાણ થયું છે. તેમાં પણ યુનિયન બેન્ક ઓફ ઈન્ડિયાનો શેર સૌથી વધુ 3.4 ટકા જેટલો તૂટ્યો છે. આ ઉપરાંત બેન્ક ઓફ બરોડા, પંજાબ નેશનલ બેન્ક અને કોટક મહિન્દ્રા બેન્કના શેરોમાં પણ 2 ટકાથી વધુનો કડાકો જોવા મળ્યો છે.

જ્યારે ICICI બેન્ક, કેનેરા બેન્ક, IDFC ફર્સ્ટ બેન્ક, યસ બેન્ક, HDFC બેન્ક, સ્ટેટ બેન્ક ઓફ ઈન્ડિયા, ઈન્ડસઈન્ડ બેન્ક, AU સ્મોલ ફાઈનાન્સ બેન્ક અને એક્સિસ બેન્કના શેરમાં પણ 1 થી 2 ટકા સુધીનો ઘટાડો નોંધાયો છે.

બેન્ક નિફ્ટી ટેકનિકલ વ્યૂ: માર્કેટ દિગ્ગજો શું કહે છે?

બુધવારના આ મોટા કડાકા છતાં, માર્કેટના એક્સપર્ટ્સ બેન્ક નિફ્ટીના ઓવરઓલ ટેકનિકલ સ્ટ્રક્ચરને હજુ પણ પોઝિટિવ જ માની રહ્યા છે.

એનરિચ મનીના CEO પોનમુડી આર ના મતે, ઈન્ડેક્સ હજુ પણ તેના મુખ્ય મૂવિંગ એવરેજથી ઉપર ટકેલો છે. હાલમાં 58,600 થી 58,700 નો ઝોન એક મોટો રેઝિસ્ટન્સ એરિયા છે. જો માર્કેટ આ લેવલને મજબૂતીથી પાર કરીને ટકી રહેશે, તો બેન્ક નિફ્ટી માટે 59,000 થી 60,000 સુધી જવાનો રસ્તો ખુલી જશે.

બીજી તરફ, બજાજ બ્રોકિંગ ના નિષ્ણાતોએ 57,000 થી 56,800 ના લેવલને એક મોટો ડિમાન્ડ એરિયાગણાવ્યો છે. છેલ્લા ત્રણ સપ્તાહમાં આ જ લેવલ પરથી બજારમાં નવી ખરીદી જોવા મળી હતી. જો આ સપોર્ટ જળવાઈ રહેશે, તો હાલના ઘટાડાને સારા બેન્કિંગ શેરો ધીમે-ધીમે ખરીદવાની એક સારી તક તરીકે જોવી જોઈએ. આ ઉપરાંત શોર્ટ ટર્મ માટે 57,800 થી 57,500 નો વિસ્તાર પણ મહત્વનો સપોર્ટ બની રહેશે.

આ પણ વાંચો-Share Market Crash: ટ્રમ્પની એક જાહેરાત અને શેરબજાર ધડામ! સેન્સેક્સમાં 1700 પોઈન્ટથી વધુનો કડાકો, નિફ્ટી પણ ક્રેશ

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.